Den Bybel met groter neersticheyt ghecorrigeert (Liesveltbijbel 1542)

Iosua wort in Moses plaetse den volcke tot eenen hooftman ghegheuen, Een prophetie van toecomende ouertredinghen, ende daer bi die straffinge

Dat .xxxi. Capittel

1

⁺ENde Mose ginc henen, ende hi sprac dese woorden tot alle Israel, segghende tot hen,

+ A vers 1

2

Ic ben heden hondert iaer ende twintich out, Ick en can niet meer ^a wt ende in gaen,

a Wt ende ingegaen, dat is rechter sijn ende leytsman ouer dat volc ende haer saken Io. x.a. Deu iij a

3

Ooc heeft die HERE tot mi geseyt, ghi en sult niet ouer dese Iordaen gaen, Die HERE uwe God, sal seluer voor v henen gaen ouer den Iordaen, Hi sal selue dit volc voor v verdoen, dat ghyse besitten sult Iosua sal voor v henen ouer gaen, so die HERE geseyt heeft,

4

Ende die HERE sal haer doen so hi Sihon ende Og den coningen der Amoriten, ende haren lande gedaen heeft, die welcke hi verderf

5

Als die HERE dese ooc voor v geuen sal, so suldy hen doen na alle die gheboden die ic v heden gheboden hebbe,

6

Weest getroost ende vredelic, ende en vreest niet, ende en grouwelt voor haer niet, Want die HERE uwe God, sal selue met v wandelen, ende hi en sal die hant niet afdoen noch v verlaten

7

⁺Ende Mose riep Iosua, ⁺ ende sprac tot hem voor die oogen van alle Israel, Weest getroost ende vredelijc, want ghi sult dit volc int lant brengen, dat die HERE uwen vaderen gesworen heeft hen te gheuen, ende ghi sullet onder hen wtdeylen.

+ B vers 7

+ Iosu. i.b

8

Die HERE die selue voor v gaet die sal met v sijn, die en sal die hant niet afdoen noch v verlaten, ende en vreest niet, ende en verscrict v niet.

9

Ende Mose screef dese wet, ende gaft den priesteren, den kinderen Leui, die die Arcke der verbonts des HEEREN droegen, ende al den Ouderen van Israel, ende hi geboot hen ende sprac,

10

Ouer seuen iaer, ter tijt des Vry iaers, in die feest der Louertenten,

11

als alle dat Israel coemt om te vertoonen voor den HERE uwen God, in die plaetse die hi verkiesen sal, suldi laten wtroepen dese wet voor alle Israhel, voor hare ooren,

12

te wetene, voor die vergaderinge des volcx, ⁺ beide der mannen ende der wijuen, kinderen, ende ws vreemdelincx, die in uwer poorten is, op dat si hooren ende leeren, dat si den HERE uwen God vreezen, ende houden dat si alle die woorden deser wet doen,

+ C vers 12

13

Ende dat hare kinderen die niet en weten, ooc hooren ende leeren, daer mede si den HERE uwen God vreesen alle uwe leefdagen die ghi inden lande leeft daer ghi toe gaet ouer den Iordaen om te besitten.

14

Ende die HERE sprac tot Mose, siet uwen tijt is gecomen, dat ghi steruen sult, roept Iosua ende gaet in die tente des getuygenis, dat ic hen gebiede. Mose ghincker henen met Iosua, ende ginghen in die tente des getuygenis.

15

Ende die HERE openbaerde in die tente in die calomne eenre wolcken, ende die selue calomne der wolcken, stont inder tenten duere

16

Ende die HERE sprac tot Mose, siet ghi sult slapen gaen tot uwen vaderen, ⁺ Ende dit volck sal op comen, ende het sal vreemde Goden des lants na hoereren daer si in comen sullen, ende tsal mi laten, ende laten dat verbont varen, dat welc ic met hen ghemaect hebbe,

+ D vers 16

17

Ende mijnen toren sal vergrammen, ouer haer ter tijt, ende seluer ic salse verlaten ende verbergen mijn aensicht van hen tot dat si verteert worden Ende alse dan veel ongelucx, ende ancxt beuangen sal, sullen si seggen, Heeft mi alle dit quaet niet beuangen, om dat God met mi niet en is?

18

Ende ic sal mijn aensicht verbergen tot dier tijt om allet quaets wille, dat si gedaen hebben, dat si haer tot ander Goden gekeert hebben.

19

⁺So scrijft nv dit liet ende leert den kinderen van Israel, ende legget in haren mont, dat mi dat liet een getuyge si onder die kinderen van Israel,

+ F vers 19

20

Want ic salse int lant brengen, dat ic haren vaderen gesworen heb, daer melck ende honich in vloeyt, ende als si eten, ende sadt ende vet worden, so sullen si haer tot andere Goden keeren, ende hen dienen ende mi lasteren, ende laten mijn verbont varen,

21

Ende als hen dan veel ongelucx ende ancxts beuangen sal, so sal dit liet voor hen antwoorden, tot een getuygenis, Want si en sullen dat niet vergeten wten monde haers saets want ic weet haer opset, daer si nv mede omgaen, eer dat icse int lant brenge dat ic gesworen hebbe,

22

Alsoo screef Mose dit liet ter seluer tijt, ende hi leerdet den kinderen van Israel,

23

ende hi beual Iosua Nuns soon, seggende, Weest getroost ende sterc, want ghi sult die kinderen van Israel int lant leyden, dat ic hen gesworen heb, ende ick sal met v sijn.

24

Doen Mose die woorden van deser wet, al wt gescreuen hadde in eenen boec, ⁺

+ Ontrent deser tijt leefde Ianus, ende dat rijck van Italien begonst Dese Ianus was die eerste coninc van Italien dat volc van Ialien eerden hem voor eenen groten god, ende si maecten hem met twee aensichten, Ende dye werelt hadde ghestaen drie .M vij.c. ende xxv iaer voor cristus gheboorte .M.cccc. ende lxxvij. Iaer

25

geboot hi den Leuiten, die de Arcke des getuygenis des HEREN droegen, seggende.

26

Neemt dat boec van deser wet, ende legget aen die side vander Arcken des verbonts des HEREN ws Gods, dattet aldaer een getuyghe si teghen v,

27

want ic kenne v ongehoorsaemheyt ende hartneckicheit Siet, want heden die wijle dat ic met v leue, sidi ongehoorsaem geweest tegen den HEERE, Hoe veel meer nae mijnder doot

28

Vergadert nv voor mi alle die Outsten van uwen geslachten ende uwe officiers, dat ic dese woorden voor haren ooren spreke, ende dat ic hemel ende aerde tegen hen tot getuyghen neme,

29

Want ic weet, dat ghijt na mijn doot qualic maken sult, ende vanden wege treden, den welcken ic v geboden hebbe, ende dan sal v ongeluc ouer comen hier na, om dat ghi qualic gedaen hebt, voor des HEREN ooghen, dat ghi hem vertorent hebt, door die wercken van uwen handen.

30

Aldus sprac Mose die woorden van desen liet geheel wt, voor die ooren van alder ghemeynten van Israel