Den Bybel met groter neersticheyt ghecorrigeert (Liesveltbijbel 1542)

Og de Coninc van Basan wort verslaghen, die landen worden inghenomen ende verdoruen, van Ruben, Gad, ende den haluen stamme Manasse hier aen dese side des Iordaens. Iosua werdt in Moyses plaetse geordineert.

Dat .iij. Capittel

1

⁺ENde wi keerden ons, ⁺ ende trocken opten wech tot Basan, Ende Og die Coninck tot Basan, trock wt ons tegen met al sinen volcke, om te strijden tot Edrei,

+ A vers 1

+ nu. xxi g

2

Mer de HERE sprac tot mi, en vreeset hem niet, want ic heb hem ende alle sijn volc, met alle sinen lande, in v hant gegeuen, ende ghi sult met hen doen gelijc ghi met Sihon den coninc der Amoriten gedaen hebt, die te Hesbon sadt,

3

Also gaf ons die HERE onse God, ooc dan Coninc Og tot Basan, in onsen handen, met alle sinen volcke, dat wi hem sloegen tot datter niet van hen ouer en bleef.

4

Doe wonnen wi tot dier tijt alle sijn steden, ende daer en was gheen stede, ⁺ die wi hen niet en namen Tsestich steden, alle dat lantscap Argob, inden Conincrijcke Og tot Basan,

+ B vers 4

5

Alle dese steden waren vast met hoogen mueren, poorten ende grendelen, behaluen seer vele ander steden sonder mueren,

6

ende wi destrueerdense, gelijc wi met Sihon den coninc van Hesbon deden, Alle sine steden die verdoruen wi, beyde mannen, wijuen, ende kinderen,

7

Mer alle dat vee ende den roof der steden, roofden wi voor ons.

8

Also namen wi dat lant tot dier tijt, wt der hant van twee coningen der Amoriten, op geen side vander Iordonen, van die beke Arnon aen, tot aent geberchte Hermon,

9

dat welcke die Sidoniten Sireon heeten, Mer de Amoriten heeten hem Senir.

10

Al de steden die op dat plein sijn, ende tgeheele Gilead, ende dat geheele Basan, tot Salcha toe, ende Edrei, die steden des conincrijcx Og, tot Basan,

11

Want alleen die Coninck Og tot Basan noch ouerbleuen was vanden Ruesen, Siet sijn yseren bedde al hier tot Rabath, der kinderen Ammon, negen ellen lanc, ende .iiij. breet na eens mans ellenboge.

12

Alsucken lant namen wi in, tot dier seluer tijt, van Aroar aen, die aen die beke Arnon leyt, Ende ic gaf dat half geberchte Gilead met sinen steden den Rubeniten, ende den Gadditen,

13

mer dat ouerbliuende van Gilead, ende allen dat gantse Basan des conincrijcx Og, gaf ic den haluen geslachte Manasse, dat gantse lantscap Argob, totten gantsen Basan, dat heet der Ruesen lant,

14

Iair Manasses soon besadt al dat lantscap Argob, tot aen die palen Gessuri ende Maachati ende hi hiet Basan na sinen naem Hanoth Iair, tot opten dach van heden,

15

Mer Mechier gaf ic Gilead,

16

ende den Rubeniten, ende den Gadditen gaf ic een deel van Gilead, tot aen die beke Arnon, midden in dye beke die daer de pale is, ende totter beken Iaboc, die de pale is der kinderen Ammon,

17

ende ooc die velden ende den Iordaen, die die pale is van Cinereth aen, ⁺ tot aen die zee aenden velde, te weten, dye soute zee aenden berch Pisga, teghent Oosten.

+ C vers 17

18

Ende ic geboot v ooc ter seluer tijt ende ic sprac, die HERE v God heeft v dit lant gegeuen te besitten Daeromme trect nv, ende bereyt voor uwen broederen den kinderen van Israel, alle dat strijtbaer is,

19

sonder v wijuen, ende v kinderen, ende v vee (want ick weet dat ghi veel vees hebt) latet in uwen steden blijuen, die ic v gegheuen hebbe,

20

tot dat die HERE v God v broederen ooc te rusten brengt ghelijc v, dat si dat lant ooc besitten, dat hen die HERE v God geuen sal op gheen side vanden Iordane, dat sult ghy weder keeren tot uwer besittingen die ic v gegeuen hebbe.

21

Ende ic geboot Iosua ter seluer tijt, ende ic sprac. V oogen hebben gesien al wat de HERE v God desen twee coningen gedaen heeft, ⁺ also sal die HERE ooc allen conincrijcken doen daer ghi henen treckt, ende en vreestse niet, want die HERE v God strijt voor v

+ D vers 21

22

Ende ic badt den HEERE ter seluer tijt, ende ick sprac,

23

HERE, HERE, ghi hebt begonst te thoonen uwen knecht, v grote stercke hant.

24

Want waer isser een God inden hemel ende inder aerden, die v wercken ende uwe macht soude connen na gedoen?

25

laet my ghaen, ende besien dat goede landt, op gheen side vanden Iordane, ende dat goede gheberchte, ende Libanum,

26

Maer die HERE was toornich op my om uwen wille, ende hi en verhoorde mi nyet, mer hi sprac tot mi, Het is genoech, ende en segt my daer niet meer af,

27

climt opt hoochste vanden gheberchte Pisga, ende heft v oogen op tegen twesten, ende teghent noorden, ende tegent suyden, ende tegent oosten, ende besiet metten oogen, want ghi en sult ouer dese Iordane niet gaen,

28

Ende gebiet Iosua, ende sterct hem, ende vermaent hem, want hi sal ouer dye Iordane gaen voor dat volc, ende hi sal hen dat landt wtdeylen, dat ghi sien sult.

29

Aldus bleuen wi in dat dal, dat daer leyt tegen dat huys Peor.