Den Bybel met groter neersticheyt ghecorrigeert (Liesveltbijbel 1542)

Balam wort bestelt dat volck Gods te veruolgen

Dat .xxiij. Capittel.

1

⁺ENde des morghens nam Balak Bileam met hem, ende si gingen wech op die hoochte van Baal, dat hi van daer sien conde tot aen dat eynde des volcx Ende Bileam sprac tot Balak,

+ A vers 1

2

Maect mi hier seuen outaren, ende besorcht mi hier seuen verren, ende seuen rammen Balak deet so hem Bileam geseyt had,

3

Ende si beyde Balak ende Bileam offerden op elcken outaer, eenen verre, ende eenen ram.

4

Ende Bileam sprac tot Balak, Gaet bi dien brantoffer, ic sal wech gaen oft mi by auontueren die HERE gemoete, ende mi roept, ⁺ dat ic v bootscappen soude, wat hi mi thoonen sal, ende Balak ghinc wech so hi gheseyt hadde

+ B vers 4

5

Ende die HERE ghemoete Bileam, ende Bileam sprac tot den HERE, seuen outaren heb ick bereyt, ende op elcken outaer eenen verre, ende eenen ram gheoffert,

6

Die HERE gaf Bileam dat woort inden mont, ende sprac. Gaet weder tot Balak, ende segt alsoo.

7

Ende als hi weder tot hem quam, siet, doen stont hi bi sinen brantoffer, met alle den vorsten der Moabiten.

8

Doen hief hi sijn woort op, ende seyde Balak der Moabiten coninc heeft mi wt Syrien laten halen, vanden geberchte dat tegen dat oosten leyt, ende seyde. Coemt ende vermaledijt mi Iacob, comt lachtert Israel

9

Hoe sal ic vermaledien, den welcken God niet en vermaledijt? Hoe sal ic ghelachteren den welcken God niet en lachtert?

10

Want van die hooge steenrootse sie ic hem wel, ende vanden hueuelen merck ic hem Siet dat volc sal ^a alleen woonen, ende onder die heydenen niet gerekent worden,

a Alleen wonen dat is vrij sonder tribuyt van eenigen heydenen te geuen

11

Wie can gerekenen dat stof Iacob, ende dat getal des vierendeels van Israel, Mijn siele moet steruen die doot der oprechtiger, ⁺ ende mijn eynden moeten worden ghelijc deser lieden eynden

+ C vers 11

12

Doen sprac Balak tot Bileam, Wat ist, dat ghi mi doet? Om dat ghi mijn vianden vermalediden soudt, heb ic v ontboden, ende siet, ghi gebenedijtse

13

Ende Bileam antwoorde ende sprac, Moet ic niet behouden ende spreken dat mi die HERE inden mont gheeft.

14

Balak antwoorde, coemt doch met mi aen een ander plaetse, daer ghi dat eynde van Israel siet, ende doch niet al en siet, ende vermaledijtse aldaer

15

Ende hi leyden hem op een ander plaetse, op die hoochte van Pisga, ende timmerde seuen outaren, ende offerde op elcken outaer eenen verre ende eenen ram.

16

Ende Bileam sprac tot Balak, staet also bi uwen brantoffer, ick sal derwaerts gaen suecken.

17

Ende die HERE ghemoete Bileam, ende gaf hem twoort in sinen mont, ende sprack Gaet weder tot Balak, ende spreect also,

18

Ende als hy weder tot hem quam, siet doen stont hi bi sinen brantoffer metten vorsten der Moabiten, ⁺ ende Balak sprac tot hem, Wat heuet die HERE gheseyt

+ D vers 18

19

Ende Bileam hief sijn woort op ende sprac, staet op Balak ende hoort, vaet ter ooren mijn ghetuygenis ghi die sijt Ziphors soon,

20

God en is niet als een man die lieget, noch als eens menscen soon die berou heeft, soudet hi seggen ende niet doen, soude hijt spreken ende geen stadt grijpen?

21

Siet om te gebenedien ben ic hier gebracht, ic gebenedije, ende en cans niet gekeeren,

22

Men en sie geen moeyte in Iacob, noch geenen arbeyt in Israel. Die HERE sijn God, is bi hem, ende dat trompette des conincx is onder hen,

23

God heeftse wt Egipten geleyt, sijn vryheyt is als eens Eenhorens,

24

want daer en is geen toouerije in Iacob, noch geen waersegger in Israel. Tsijnder tijt salmen tot Iacob seggen, ende tot Israel wat God doet.

25

Siet, dat volck sal op staen, als een ionge leeuwinne, ende sal sijn borst wt steken als een leeu Ende ten sal niet neder liggen, tot dattet den roof verslindt heeft, ende dat bloet des verslagens drincken

26

Doen sprac Balak tot Bileam, en vloectse niet noch en gebenedijtse niet. Bileam antwoorde, seggende tot Balak,

27

En heb ict v niet gheseyt, dat, al wat die HERE spreken sal, dat sal ic doen.

28

Balak sprac tot hem, comt doch, ic sal v aen eenen anderen hoec leyden, oft God bi auontueren belieue, dat ghijse aldaer vermaledijt.

29

Ende hi leyde hem op dat alderhoochste vanden berge Peor, die daer keert tegen die woestijne,

30

ende Bileam sprac tot Balak, Maect mi hier seuen outaren ende bereit mi seuen verren, ende seuen rammen.

31

Balak dede also, als Bileam hem seyde, Ende hi offerde op elcken outaer, eenen varre, ende eenen ramme