Den Bybel met groter neersticheyt ghecorrigeert (Liesveltbijbel 1542)

Dat den stamme Leui ende dat priesterdom Aarons ghecoren sijn vanden HEERE, wort bediet door dat groenen des stocx.

Dat .xvij. Capittel.

1

⁺ENde die HERE sprac met Mose, seggende.

+ A vers 1

2

Segt den kinderen van Israel, ende neemt van hen twaelf stecken, van elcken hooftman, van sijns vaders huys eenen steck, ende scrijft een yeghelijcx naem op sinen steck,

3

maer Aarons naem suldy scrijuen op Leui stecke, Want voor een hooft haerder vaders huys, sal eenen stec wesen,

4

ende legtse in die tente des getuychnis, voor dat getuychnis, daer ic v betuyge,

5

ende den welcken ic van desen kiesen sal, diens stec sal groene worden, dat ick die murmuratie der kinderen van Israel stille, die si tegen v murmureren.

6

Mose sprac metten kinderen van Israel, ende alle haer hooftlieden gauen hem twaelf stecken, een yegelijc hooftman eenen steck, ⁺ na den huyse haers vaders, ende Aarons steck was ooc onder haer stecken,

+ B vers 6

7

ende Mose leyde die stecken voor den HERE, in die tente des getuychnis.

8

Des morgens als Mose in de tente des getuygenis ginc, vant hi Aarons steck, vanden huyse Leui groen, ende gebloeyt opgegaen, ende Amandelen dragende,

9

ende Mose bracht alle die stecken wt vanden HERE, voor alle die kinderen van Israel, dat sijt saghen, ende een yeghelijc nam sinen steck.

10

⁺Die HERE sprac tot Mose, draecht Aarons steck weder voor dat getuyghenis, dat hi bewaert worde, tot een teeken den wederspannigen kinderen, dat si niet meer tegen mi en morren, op dat si niet en steruen.

+ C vers 10

11

Mose dedet so hem die HERE gheboden hadde

12

⁺Ende de kinderen van Israel spraken tot Mose Siet, wi minderen ende verderuen alle, vergaen, ende gaen te niete

+ D vers 12

13

Wie datter totter tenten des HEEREN gaet, die sterft. Sullen wi dan alle geheel vergaen?