Den Bybel met groter neersticheyt ghecorrigeert (Liesveltbijbel 1542)

¶ Hier wort den sonen Kahath, Gerson, ende Merari haren dienst ende officie bestelt

Dat .iiij. Capittel.

1

⁺ENde die HERE sprack met Mose ende Aaron seggende,

+ A vers 1

2

Neemt die somme der kinderen van Kahath, wt den kinderen Leui, nae haren geslachten ende vaders huysen,

3

van dertich iaren ende daer ouer, tot in dat vijftichste iaer, alle die totten heyre bequaem sijn, dat si die wercken doen inder tenten des ghetuychnis.

4

Dit sal der kinder van Kahaths officie zijn, in dye tente des getuychnis, dat het dalder heylichste is.

5

Als dat heyr op breect, so sal Aaron met sinen sonen ingaen binnen, ende dat voorhangende cleet af nemen, ende die arcke des getuichnis daer in winden,

6

ende daer ouer doen dat hemelblau decsel, ende bouen daer op een gants gelu cleet spreyden, ende sijn boomen daer toe leggen,

7

Ende ouer die thoon tafele, ooc een geel cleet spreyden, ende daer op setten scotelen, lepelen, scalen, ende cannen, om wt ende in te gieten, ende dat dagelicx broot sal daer op liggen

8

ende sullen daer ouer spreyden een roset root cleet, ende dat selue bedecken met eenen decsel van hemelblaus vellen, ende zijn hantboomen daer bi leggen,

9

ende si sullen een geel cleet nemen ende daer in winden den candelaer des lichts, ende zijn lampen, met sinen snutters, ende nappen, ende alle olie vaten die totten officie behooren,

10

⁺ende si sullen daerom een decsel doen van hemelblaus vellen, ende si sullense op hantboomen leggen,

+ B vers 10

11

Also sullen si ooc ouer den gulden outaer, een geel cleet spreyen, ende dat selue bedecken, met dat decsel van hemelblaus vellen, ende zijn hantboomen daer toe doen.

12

Alle de gereetscap, daer si mede bereiden inden heylichdom sullen si nemen, ende een geel cleet daer ouer doen, ende met een decsel van hemelblaus vellen decken, ende op hantboomen leggen,

13

si sullen die asscen ooc vanden outaer vegen, ende een scaerlaken cleet daer ouer spreyden,

14

ende zijn gereescap daer op doen, daer mede dat si daer op bereiden, coolpannen, crauwels, scuppen, beckens, met alle die gereescap

[p. *]

ende si sullen daer ouer spreyden een decsel van hemelblaeus vellen ende sijn hantboomen daer toe doen

15

Als Aaron ende sijn sonen dat also gedaen hebben ende dat Heylichdom ende al tgereetscap gedect hebben als dat heyr op breect, daer na sullen Kahats kinderen in gaen, dat sijt dragen, ende en sullen dat heylichdom niet geraken, anders sullen si steruen.

16

Dit is Kahats kinderen last, aen die tente des getuychnis. Ende Eleazar Aaron des priesters soon, sal dat officie hebben, dat hi ordinere die olie om te lichten, ende die specerie totten ruecwerc, ende dat dagelicx spijsoffere, ende die falfolie dat hi bescicke alle die tabernakels, ende al wat daer in is, inden Heylichdom ende sinen gereetschap

17

Ende die HERE sprac met Mose ende Aaron, seggende.

18

Ghi en sult die afcoemst des geslachts der Kahathiten niet verderuen onder die Leuiten,

19

mer dat suldi met hen doen dat si leuen ende niet en steruen, ist dat si aen roepen dat alder Heylichste, Aaron ende sijn sonen sullen daer in gaen, ende eenen yegelijcken stellen tot sinen wercke ende laste,

20

maer si en sullen daer niet ingaen, om te besien onbedacht dat Heylichdom, oft si steruen.

21

⁺Ende die HERE sprac met Mose ende Aaron seggende,

+ C vers 21

22

Neemt die somme vanden kinderen Gerson ooc na haers vaders huys ende geslachte,

23

van dertich iaren aen, ende daer ouer, tot int vijftichste iaer, ende ordineert alle die gene die totten heyr bequaem zijn, dat si een officie hebben, in die tente des getuychnis,

24

dit sal des geslachts der Gersoniten, officie sijn, dat si besorgen ende dragen,

25

Si sullen die gordinen des tabernakels, ende der tenten des getuychnis dragen, ende sijn decksel, ende dat decsel van hemelblau vellen die daer bouen ouer is, ende dien doec inder duere der tenten des getuychnis,

26

ende dat hangende cleet des voorhofs, ende den doec in die duere der poorten des voorhofs, dwelcke om die tabernakel, ende al om den outaer ghaet, ende haer zeylen, ende gereetschap van haerder officien, ende al dat tot haren officie behoort,

27

na dat woort van Aaron ende sinen sonen, sal die officie der kinderen Gerson gaen, al dat si dragen ende besorgen sullen,

28

ende ghi sult toe sien, dat si alle haren last wachten, dat sal die officie des geslachts der kinderen der Gersoniten sijn, in die tente des getuychnis, Ende haer bewaringe sal onder Ithamars hant Aarons des priesters soon sijn.

29

⁺Merari kinderen, na haren gheslachte ende vaders huyse suldy ooc ordineren, van dertich iaren aen ende daer ouer, tot int vijftichste iaer

+ D vers 29

30

alle die totten heyre bequaem sijn, dat si een offitie hebben in die tente des getuychnis,

31

Dit sijn haer lasten dat si waer nemen na wtwijsen haers diensts dat si inder tenten des getuygenis dragen die barderen des tabernakels, ende die rijchelen, ende calomnen, ende voeten

32

ende ooc die calomnen des voorhoofs al omme, ende die voeten, ende nagelen ende die seylen met alle haren gereetschap, na alle haerder officien, eenen yegelijcken suldy sinen deel des lasts aen die gereetschap, te wachten ordineren,

33

Dit sal sijn die officie der geslachten der kinderen Merari, al dat si besorgen sullen inder tenten des getuychnis, onder Ithamars hant des priesters Aarons soon

34

⁺Ende Mose ende Aaron, metten hooftlieden der ghemeynten telden die kinderen der Kahathiten, na haren gheslachten ende vaders huysen,

+ E vers 34

35

van dertich iaren, ende daer ouer, tot int vijftichste alle die int heir bequaem zijn, dat si een officie in die tente des getuychnis hadden,

36

ende die somme was twee duysent, seuenhondert ende vijftich.

37

Dat is die somme des gheslachts der Kahathiten, die alle te beschicken hadden, in dye tente des ghetuychnis die Mose ende Aaron telden, na den woorde des HEREN door Mose.

38

Gersons kinderen werden ooc ghetelt, in haren gheslachten, ende vaders huysen,

39

van dertich iaren, ende daer ouer, tot int vijftichste, alle die int heyr bequaem waren, dat si officien in dye tente des ghetuygenis hadden,

40

ende die somme was twee .M. ses .C. ende .xxx

41

Dat is die somme des gheslachts der kinderen van Gerson, die al te bescicken hadden in die tente des getuychnis, die welcke Mose ende Aaron telden, na dat woort des HEREN.

42

Merari kinderen werden oock getelt na haren geslachten ende vaders huysen,

43

van dertich iaren ende daer ouer, tot int vijftichste, alle die bequaem int heyr waren, dat si officien hadden in die tente des getuychnis

44

ende die somme was drie duysent, ende .CC.

45

Dat is die somme des geslachts der kinderen Merari die Mose ende Aaron telden, na den woorde des HEREN door Mose

46

Die somme alder Leuiten, die Mose ende Aaron met den hooftlieden van Israel telden na haren geslachten ende vaders huysen,

47

van dertich iaren, ende daer ouer tot in .L. alle die ingingen om te doen een yegelijc sijn officie ende om te dragen den last, in die tente des getuychnis

48

was acht duysent, vijfhondert, ende tachtentich, die getelt werden

49

na den woorde des HEEREN, door Mose, een yegelic tot sinen officie ende last, so die HERE Mose geboden hadde