Den Bybel met groter neersticheyt ghecorrigeert (Liesveltbijbel 1542)

¶ Van die melaetscheyt, ende hoemen metten Lazarisschen handelen sal.

Dat .xiij. Capittel

1

⁺ENde die HERE sprac tot Mose ende Aaron seggende,

+ A vers 1

2

als een mensche aen die huyt zijns vleeschs yet af gaet, oft scorft oft yet claer wit wordet, al oft ^a lazarie worden wilde aen die huyt zijns vleesch, salmen hem totten priester Aaron brengen oft tot sinen sonen een vanden priesteren,

a Lazarie is hier alderhande scorftheyt. nu. xvij.b.

3

ende zijn die hayren wit gheworden, ende die ghedaente aen dye plaetse dieper is dan die ander huyt zijns vleeschs, so is die sekerlijck lazarich, daeromme sal hem die priester besien, ende voor onreyn oordeelen.

4

Maer is yewaert yet wits aen die huyt zijns vleeschs, ende dat schijnsel zijns vleeschs, niet dieper dan die ander huyt des vleeschs, ende die hayren niet in wit verandert en sijn, so sal die priester den seluen besluyten seuen dagen,

5

ende ten seuensten daghe besien, ist dat dat teeken staet in sinen ooghen, ⁺ soot eerst werf stont, ende en heuet niet voorder gheten aen die huyt, so sal hem dye priester noch seuen daghen besluyten.

+ B vers 5

6

Ende als hi noch eens ten seuenden daghe hem besiet, ende beuint dattet teeken verduystert is, ende niet voorder gheten en heeft aen dye huyt, so sal hi hem suyuer oordeelen, want het is grillentheit,

7

ende hi sal sijn cleederen wasschen, so is hi reyn, Mer als die grillentheyt voorder eet in die huyt, na dien dat hi vanden priester besien ende reyn ghesproken is, ende wort hi noch eens vanden priester besien,

8

als die priester siet dat die grillentheit voorder gheten heeft, in die huyt, dan sal hi hem onreyn oordeelen, want hy is sekerlijc lazarich.

9

Als die lazarie inden mensche is, dan salmen hem tot-ten priester brengen,

10

Als hi siet ende beuint, dat daer witheit op gecomen is aen die huyt, ende die hayren wit geworden zijn, ende datter root vleesch in die sweeringe is

11

so is sekerlijc een oude lazarie in dye huyt zijns vlees, daerom sal hem die priester onreyn oordelen, ende niet wech sluyten, want hi is onreyn.

12

Als die lazarie vloeyt in die huyt, ende bedecket alle die huyt, van aen dat hooft totten voeten, alle dat ghene dat die priester voor ooghen sien mach,

13

Als nv dye priester siet ende beuint, dat die lazarie al dat vleesch bedect heeft so sal hi hem onreyn oordeelen, om dat alle zijn huyt wit worden is, want hi is suuer.

14

Maer is sijn vleesch root geworden inden dage als hi besien wort so is hi onreyne.

15

Ende als die priester dat root vleesch besiet so sal hi hem onreyn oordelen, want hi is onreyn, ende hi is sekerlijck lazarich.

16

Maer verandert dat root vleesch weder, ende wort wit, so sal hi tot den priester comen.

17

Ende als die priester besiet ende beuint dat dat teeken wit gheworden is, so sal hi hem reyn oordeelen, want hi is reyn.

18

⁺Als in yemants vleesch aen die huyt eenen sweer coemt, ende weder heelt,

+ C vers 18

19

ende daer na in die selue plaetse yet wits oft rootachtich op comt, ende wordt claer wit, so sal hi vanden priester besien worden.

20

Als dan die priester siet dat die plaetse der lazarien neder is dan die ander huyt, ende dat die hayren wit gheworden sijn dan so sal hi hem onreyn oordeelen, want daer is sekerlijc een teeken der lazarien, vanden sweere ghecomen.

21

Siet die priester dan, ende vindet hi dat die hayren niet wit en sijn, ende dattet niet neder en is, dan die ander huyt, ende is duyster worden, so sal hi hem seuen dagen besluyten,

22

etet voorder in die huyt, so sal hi hem dan onreyn oordeelen, want het is sekerlijck een litteeken der lazarien,

23

maer blijft die claer witheyt alsoo staende, ende en etet niet voorder, so ist die scrabbe vanden sweere, ende die priester sal hem reyn oordeelen.

24

⁺Als yemants vleesch aen die huyt met vier ghewont wordet, ende eest dat dat teeken vanden brande rootachtich, oft widt is,

+ D vers 24

25

ende als die priester hem besiet, ende beuint dat dat hayr wit gheworden is aen des brants teeken, ende die plaetse dieper dan die ander huyt, so ist sekerlijc lazarie, vanden litteken des brants worden.

26

Daerom sal hem die priester onreyn oordeelen, want het is een teeken der lazarien.

Maer siet die prester ende beuint, dat dat hayr aenden brant teeken niet wit gheworden is, ende niet neder en is, dan die ander huyt, ende is ooc verduystert, sal hi hem seuen dagen besluyten

27

Ende ten seuensten daghe sal hi hem besien, heuet voorder gheten aen die huyt soo sal hi hem onreyn oordeelen, want het is lazarie.

28

Maer ist blijuen staende aent teeken des verbrants, ende niet voorder gheten aen die huyt, daer toe ist ooc verduystert, so ist een sweeringe des brants teeken, ende die priester sal hem reyn oordeelen, want het is een scramme des brants teekens.

29

⁺Wanneer een man oft wijf opt hooft oft aenden baert scorft wort,

+ E vers 29

30

ende die priester dat teeken besiet, ende beuint dat die plaetse dieper is, dan die ander huyt, ende is dat hayr aldaer goutverwich ende dunne, so sal hi hem onreyn ordelen, want het is een lazarige grillentheyt des hoofts oft des baerts,

31

Maer siet die priester dat die grillentheit niet dieper en scijnt dan die huyt, ende dattet hayr niet vael en is, so sal hi den seluen .vij. daghen opsluyten,

32

ende als hi hem ten seuenden daghe besiet, ende beuint dat die grillentheit niet voorder gheten en heeft, ende datter gheen gulden hayr aen en is, ende dye plaetse

[p. *]

des grillentheits niet dieper en is dan die ander huyt,

33

so sal hi gheschoren worden, maer niet in die grillentheyt, ende die Priester sal hem noch seuen daghen wech sluyten.

34

Ende als hy ten seuenden dage besiet ende beuindt dat die grillentheyt niet voorder in die huyt gheten en heeft, ende en schijnt niet dieper dan die ander huyt, so sal hem die priester reyn seggen. Ende hi sal zijn cleederen wasschen, want hi is reyn,

35

Mer eet die grillicheyt voorder in die huyt, na dien dat hi reyn gheseydt is,

36

ende die priester besiet ende beuint, dat dye grillicheyt also voorder gheten heeft in die huyt, so en sal hy nyet meer daer na vragen, oft die hayren goutuerwich sijn want hi is onreyn.

37

Maer schijnt die grillentheit stil gestaen te hebben, ende isser vael hayr daer op gegaen so is die grillentheyt heel ende reyn, daerom sal hem dye priester reyn seggen.

38

Als een man oft wijf aen dye huyt haers vleeschs yet claer wits heeft,

39

⁺ende die priester siet, dat dye clare witheyt verduystert is, so isser een witte grillenheit ghecomen inder huyt, ende is reyn.

+ F vers 39

40

Als eenen manne oft wijue die hayren des hoofts wt vallen, dat hi calu wordt, die is reyn,

41

Vallen si hem wten voorhoofde, so is si suuer ende reyn,

42

Mer comt daer hi bloot oft calu is, een wit oft rootachtich teeken, so is hem ghecomen lazarie aen die blootheyt oft aent calu hooft, daerom sal hem die priester besien,

43

ende als hi beuindt dat wit oft rootachtich teeken opgheloopen is aen sijn hooft oft caluwe hooft, soo sal die huyt des vleeschs als lazarich sijn, daerom is hy een lazarich man, ende onreyn.

44

Ende die priester sal hem onreyn segghen om sijns teekens wille, dat op sijn hooft is.

45

Als nv yemant lazarich is, diens cleederen sullen ghesuuert sijn, ende dat hooft bloot, ende die lippen verhult, ende hi sal allesins onreyn ghenaemt worden,

46

Ende so lange als dat teeken aen hem is, sal hi onreyn sijn, alleen woonen, ende sijn woninghe sal buyten den legere sijn.

47

Als in een cleet een lazarich teeken zijn sal, het sy wullen oft lijnen,

48

oft aenden wtslach oft inslach, tsy lijnen oft wullen, oft aen een vel,

49

oft aen yet dat van vellen ghemaect wort. Ende als dat teeken bleeck oft rootachtich is, in cleederen oft vellen, oft aen wtslach oft aen inslach, oft aen eenigerley dinc dat van vellen ghemaect is, dat is sekerlijc een teeken der lazarien,

50

daerom salt die priester besien. Ende als hi dat teeken siet, sal hijt seuen daghen opsluyten.

51

Ende als hijt ten seuensten dage siet, dat dat teeken voorder heeft gheten dan aen dat cleet, aenden wtslach, ende aenden inslach, aent vel oft aen alle datmen van vellen maect, so ist een etende teeken der lazarien, ende is onreyn,

52

ende sal dat cleedt verbernen, oft den wtslach, oft den inslach, het si wullen oft lijnen, oft een velwerck, daer alsulcken teeken in is, Want het is een teeken der lazarien, ende salt met viere verbernen.

53

Ist dat die priester sien sal, dat dat teeken niet voorder gheten en heeft, ⁺ aen cleet oft aenden wtslach, oft aenden inslach, oft aen alderley velwerc,

+ G vers 53

54

so sal hi gebieden, datmen wassche daer dat teeken in is, ende salt insluyten noch ander seuen daghen.

55

Ende als die priester sien sal na dien dat een teeken ghewasschen is, dat dat teeken niet verandert en is, in sijn eerste ghedaente, ende ooc niet voorder gheten en heeft, so ist onreyne, ende salt met viere verbernen, want het is diep inwaerts gheten, ende heeft schorft gemaect,

56

Als dye priester siet dat dat teeken verduystert is, na dattet ghewasschen is, so sal hijt afschueren vanden cleede, vanden velle, vanden wtslach, oft vanden inslach,

57

Wordet noch meer gesien, aent cleet aenden wtslach, aenden inslach oft aen alderley velwerck, so ist een smette, ende men salt met viere verbernen, dat daer sulc teeken in is,

58

Maer dat cleet oft wtslach oft inslach, oft alderley velwerc dat ghewasschen is, ende dat teeken achter ghelaten heeft, salmen noch eens wasschen, so ist reyn.

59

Dat is die wet ouer die teekenen der lazarien van die cleederen, oft si wullen zijn oft lijnen, aenden wtslach oft aenden inslach, ende aen alderley werck van vellen, reyn oft onreyn te spreken.