Den Bybel met groter neersticheyt ghecorrigeert (Liesveltbijbel 1542)

Hier beghint dat boeck Leuiticus opt Hebreeusch Varijkra.

¶ Van die ordinantie ende ghebruyck der brantofferen, ende vee oft voghelen.

Dat eerste Capittel

1

⁺ENde dye HERE riep Mose, ende sprac met hem vander tenten des ghetuyghenis, segghende,

+ A vers 1

2

Spreect metten kinderen van Israel, ende segt hen, Wie dat van v lieden offeren wil die offere vanden vee, vanden runderen ende vanden schapen.

3

Wilt hi een brantoffer doen van ossen, soo offert een onbesmet manneken, voor die duere der tenten des getuychnis, om hem te versoenen voor den HERE,

4

ende legge sijn hant op des brantoffers hooft, so sal hy versoent worden, dat hem God ghenadich worde.

5

⁺Ende hi sal dat ionge runt slaen voor den HERE, ende die priesters Aarons sonen sullen dat bloet brengen, ende sprengent al om, ende om den outaer, die voor de duere der tenten des ghetuygenis is.

+ B vers 5

6

Ende die huyt sal vanden brantoffer afghetrocken worden, ende het sal in stucken gehouden worden.

7

Ende Aarons sonen des priesters, sullen een vier opten outaer maken, ende hout daer bouen op leggen,

8

ende sullen die stucken, te weten, thooft ende die crauweye op dat hout leggen, dat opt vier opten outaer leyt.

9

⁺Dat ingewant ende die schenckelen salmen met water wasschen, ende die priester sal dat al ontsteken opten outaer tot eenen brantoffer ende eenen ^a sueten rueck den HERE.

+ C vers 9

a Sueten ruec is een offerhande des gheloofs, ende suyuerder affectien ende betrouwen Waer in god een welbehagen heeft, gelijc de mensche hem verhuecht in eenen goeden ruec der spijsen, ghelijck van Noe gheseyt wort ge. viij d

10

Oft wilt hi vanden lammeren, oft vanden gheyten een brantoffer offeren, so sal hi offeren een iarich manneken sonder smette,

11

ende sal dat slaen voor den HERE, voor aenden hoeck des outaers teghent Noorden, voor den HERE. Ende die priesters Aarons sonen sullen dat bloet opten outaer al om ende om sprenghen,

12

men salt in stucken houwen, Ende die Priester salse met den hoofde ende die crauweye op dat hout, op tvier, dat op den outaer is legghen,

13

Maer dat ingewant, ende die schenckelen salmen met water wasschen, Ende die priester salt al offeren ende ontsteken opten outaer, tot eenen brantoffer, Dat is een offer dat wel riect voor den HERE.

14

⁺Mer wilt hi een brantoffer van vogelen den HERE offeren, so doet hijt van tortelduyuen oft van ionge duyuen.

+ D vers 14

15

Ende die priester salt tot den outaer brenghen, ende daer voor hem den hals af steken, dattet op den outaer ontsteken worde, ende dat bloet laten wtbloeyen aenden wandt des outaers,

16

ende den crop met den pluymen salmen neffens den outaer tegent oosten op den asschen hoop worpen,

17

ende hi sal sijn vlogelen croken mer niet afbreken Ende also salt die priester opten outaer opt hout leggen, ende dat vier ontsteken tot eenen brantoffer. Dat is een offer dat wel riect voor den HERE.