Den Bybel met groter neersticheyt ghecorrigeert (Liesveltbijbel 1542)

¶ Die HEERE seyt Mosi noch van eender straffinghe dye hy ouer Egypten wilde seynden. Hi beueelt dat die Israeliten vanden Egyptenaers gulden ende silueren clenodien souden ontleenen, ende haer die ontdraghen.

Dat .xi. Capittel.

[afbeelding]

1

⁺ENde die HERE sprack tot Mose, ick wil noch een plage ouer Pharao ende Egypten laten comen, ⁺ daer na sal hy v van hier laten gaen, ende niet alleen laten gaen, Mer ooc van hier drijuen.

+ A vers 1

+ ps. c.iiij. Eccle xliiij a

2

Daerom segt nv alle den volcke, dat een yegelic man van sinen gebuer, ende een yegelijc wijf van haer ghebuerinnen, leene ende eyssche, silueren ende ghulden vaten

3

Want die HERE sal den volc gratie geuen voor den Egyptenaren. Ende Mose was een seer groot man in Egypten lant voor die knechten van Pharao, ende voor den volcke.

4

⁺Ende Moses sprac, ⁺ Aldus seyt die HEERE, Ick sal ter middernacht wtgaen in Egypten lant,

+ B vers 4

+ ps. lxvij cxxxiiij

5

ende alle eerste geboren des lants sal steruen, Van Pharaos eerste geboren soon aen, dye op sinen stoel sidt, totten eersten sone der dienstmaecht die achter die molen is, ende alle eerste geboren des vees,

6

ende het sal eenen grooten roep sijn in alle Egypten landt, dat des gelijc niet geweest en is, noch sijn en sal,

7

⁺Mer bi al den kinderen van Israel en sal niet een hont met sijnder tongen grimmen, van aenden menschen tot aen dat vee, Om dat ghi weten sult hoe wonderliken dat die HERE Egypten ende Israel scheyde,

+ C vers 7

8

Want alle dese uwe knechten, sullen af comen tot mi, ende mi te voet vallen ende segghen, Trect wt, ghi ende alle v volc dat onder v is. Daer na sal ic wt trecken, ende Moses ginc van Pharao seer gram.

9

⁺Die HERE sprac tot Moses, Pharao en hoort v niet, om datter veel wonders gheschieden soude, in Egypten lant.

+ D vers 9

10

Ende Mose ende Aaron hebben dit wonder al ghedaen voor Pharao, Mer die HEERE verstocte sijn herte, also dat hi die kinderen van Israel wt sinen lande niet laten en wilde.