Den Bybel met groter neersticheyt ghecorrigeert (Liesveltbijbel 1542)

¶ Hoe dat Abraham Gode ghehoorsaem was, Isaac sinen soone te offeren, ende daeromme weder dye beloofte ondtfinck.

Dat .xxij Capitel

1

⁺NA dien dat dese dingen gesciet waren proefde God Abraham, ⁺ ende sprac tot hem, Abraham? Ende hi antwoorde, hier ben ic,

+ A vers 1

+ Iudith. viij.c. Ho. xi.d

2

ende God sprac, Neemt Isaac uwen ^a eenigen sone dien ghi lief hebt, ende gaet henen in dat lant Mocla ende offert hem aldaer tot brantoffer op eenen berch dien ic v seggen sal,

a Eenighen dat is uwen beminsten par. iiij.a ge. xiij d

3

Doen stont Abraam tsmorgens vroech op ende bereyde sinen ezel, ende nam met hem twee knapen, ende sinen sone Isaac, ende cloof hout tot brantoffer, hi stont op ende ginc henen ter plaetsen daer hem God af geseyt hadde.

4

Ten derden dage hief Abraham sijn ooghen op ende sach die stede van verde,

5

ende sprack tot sinen knape blijft hier met den ezel, Ic ende die knecht willen daer henen gaen, ende wanneer wi aengebeden hebben, so sullen wi weder tot v comen,

6

Ende Abraham nam dat hout totten brantoffer, ende leyt op sinen sone Isaac, mer hi nam dat vier ende het mes in sijn hant, ende die twee gingen tsamen

7

⁺Doen sprac Isaac tot sinen vader, Abraham mijne vader, ⁺ Abraham antwoorde, Hier ben ic mijn sone, ende hi sprac, Siet, hier is vier ende hout, mer waer is dat scaep totten brantoffer?

+ B vers 7

+ Iu. viij. He. xi.d

8

Abraam antwoorde, Mijn sone, God sal toonen dat scaep totten brantoffer, ende die twee gingen met malcanderen.

9

Ende als si quamen aen de plaetse die hem God geseit had, stelde Abraham aldaer eenen outaer, ende hi leyde hout daer op, ende bant sinen sone Isaac ende leyde hem op den outaer bouen op dat hout,

10

ende recte zijn hant wt, ende vaette dat mes om sinen sone te slaen.

11

⁺Doen riep hem die engel des HEREN vanden hemel ende seide Abraham Abraham ⁺ Hi antwoorde, hier ben ick

+ C vers 11

+ mat. ij.c.

12

De engel seide en legt v hant niet aenden knecht, ende en doet hem niet, want nv weet ic dat ghi God vreest, ende en hebt niet gespaert uwen eenigen soon voor mi,

13

Doen hief Abraham zijn oogen op, ende sach eenen ram achter hem verwert inder hagen, met zijn hoornen, ende ginc henen ende nam den ram, ende offerden tot eenen brantoffer, in zijns soons stede

14

Ende Abraham hiet die stede, ⁺ Die HERE sal thoonen daer af seytmen noch heden op dezen dach. Op den berch daer die HERE thoonen sal.

+ ec. xlij.d he. vi.d

15

Ende die Engel des HEREN riep Abraham noch eens vanden hemel ende sprac

16

Ic heb v mi seluen gesworen spreect die HERE, Nv ghi dat gedaen hebt, ⁺ ende en hebt uwen eygen sone niet gespaert,

+ Hier wordt Cristus belooft.

17

dat ic v saet ghebenedien ende vermeerderen sal als die sterren des hemels, ende als dat sant aenden oeuer der zee, ende uwe saet sal besitten die poorten sijnder vianden,

18

⁺ende door uwen sade sal alle volc der aerden gebenedijt worden, ⁺ om dat ghi mijnder stemmen gehoorsaem geweest hebt

+ D vers 18

+ gal. iij.a

19

Also keerde Abraham weder totten knapen, ende stont op ende togen te samen te Bersaba, ende woonde aldaer.

20

Nae desen gebuerdet dat Abraam gebootscapt wert, Siet Milca heeft ooc kinderen gebaert uwen broeder Nahor

21

Te weten Vz, den eersten geborenen sone, ende Bus sijn broeder ende Kemuel, van welcken die van Sirien ghecomen sijn,

22

ende Cesed, ende Haso ende Pildas, ende Iedlaph ende Bethuel,

23

mer Bethuel wan Rebeca, Dees acht gebaerde Milca Nahor Abrahams broeder,

24

Ende sijn concubijn ghenaemt Rehuma, wan ooc te weten Thebath, Gaham, Thahas ende Maacha.