Den Bybel met groter neersticheyt ghecorrigeert (Liesveltbijbel 1542)

Hoe dat water ophielt, ende Noe wt die arcke ginc, ende Gode offerde, ende God beloofde niet meer die werelt metten water te bederuen, ende dat den zaet tijt, oost, coude, hitte, somer, winter, nacht, ende dach, nyedt rusten en sullen tot des werelts eynde.

Dat .viij. Capittel

1

⁺GOd ghedachte Noah, ende alle dieren, ende alle beesten, die met hem inder arcken waren, ende liet wint opter aerden comen, ende die wateren vielen,

+ A vers 1

2

ende die fonteynen des afgronts werden verstopt, met den vensteren des hemels, ende die reghen des hemels wert verboden,

3

ende dat water liep vander aerden, ende minderde na .C. ende .L. daghen.

4

Ende opten .xxvij. dage des .vij. maents quam die arcke neder op tgheberchte ^a Ararat,

a Ararat dats armenien, ende leydt in asia.

5

dwater minderde voort aen, ende minderde tot op die .x. maent. Ten eersten daghe des thienden maents sachmen die toppen vanden berghen

6

⁺Nae .xl. dagen dede Noah, die venster der arcken op die hi gemaect had,

+ B vers 6

7

ende liet een rauen wt vlieghen die vlooch wt, ende en quam niet weder, alsoo lange tot dat water verdroochde opter aerden.

8

Daer na liet hi een duyue van hem wt vliegen, op dat hi wiste, oft dat water gheuallen ware opter aerden,

9

ende doen die duyue niedt en vant daer haren voet op gherusten conste, so quam si weder tot hem inder arcken, want twater was noch opt heel aertrijck, doen stack hi die hant wt, ende namse weder tot hem inder arcken.

10

Ende doen heeft hi noch ander seuen dagen gebeyt, ende hi liet noch een ander duyue vlieghen wter arcken,

11

die quam tot hem te vesper tijt, ende siet, een olijfblat hadsi af ghebroken, ende droecht in haren beck. Doen verstont Noah dattet water geuallen was opter aerden

12

Maer hi beyde noch seuen dagen, ende liet een duue wt vlieghen, die en quam niet weder tot hem

13

⁺Inden .vi.C. ende eenen iaer des ouderdoms Noah ten eersten dage der eerster maent, verdroochde dat water opter aerden. Doen dede Noah dat dac vander arcken, ende sach dat alle die aerde drooch was,

+ C vers 13

14

Also wert die aerde geheel drooghe den seuentwintichsten dach der tweeder maent

15

Doen sprac God tot Noah, ende seyde

16

gaet wt der arcken ghi ende v wijf, v sonen, ende uwer sonen wijuen met v

17

Alderley dier dat bi v is van alderley ^b vleesch van vogelen, van beesten, ende alderley ghewormte, dat opter aerden cruypt, dat gae met v wt, ende wast opter aerden, ende sijt vruchtbaer, ende vermeert v opter aerden.

b vlees is hier alle onrelijke dieren

18

Also ghinc Noah wt met sinen sonen, met sinen wijue, ende met sijnder sonen wijuen,

19

ooc alderley dier ende gewormte, alderley vogel, ende al wat opter aerden cruypt dat ghinc wter arcken, eene yegelijc tot sinen gelijcken.

20

Ende Noah maecte den HERE eenen outaer, ende nam van alderley vee, ende van alderley reyne gheuogelte, ende offerde ^c brantoffer op den outaer,

c Brantoffer was een sacrifitie diemen heel verbrande, le. i.a. vi b

21

ende die HERE roock den lieflijcken rueck, ende sprack in sijn herte. ⁺ Ic en wil daerde niet meer voortaen vermaledien om der menschen wille, want des menschen opset des herten is quaet van sijnder ioncheyt aen. Ende ick wil voort aen niet meer slaen alle datter leeft, gelijc ic gedaen heb,

+ D vers 21

22

Also langhe als die aerde staet, en sal niet ophouden, zaeyen, ende den oogst, coude, ende hitte, somer, ende winter, dach ende nacht.