Den Bybel met groter neersticheyt ghecorrigeert (Liesveltbijbel 1542)

Hoe dat die slange den mensche bedrooch, ende vermaledijt wordt Hoe Adam ende Eua tgebot braken, ende daerom haer cruys van Gode ontfingen ende wt den Paradijse gedreuen worden.

Dat .iij. Cap

[afbeelding]

1

ENde die ^a slange was listigher dan alle dieren op aertrijcke die God die HERE ghemaect had, ende sprack totten wijue, Ia soude God gheseyt hebben, Ghi en sult niet eten van alderley boomen inden Lusthoue?

a slanghe hier is die duuel.. iob. iij

2

Doen sprac dat wijf totter slanghen Wi eten vanden vruchten der boomen des Lusthoofs,

3

Mer vanden vruchten des booms die midden inden

[p. *]

Lusthof is, heeft God gheseyt, En etet daer niet af en rueres oock niet aen, op dat ghy niet en sterft.

4

Ende die slange sprac totten wijue, Ghi en sult die doot gheensins steruen,

5

⁺want God weet dat in welcken dage, dat ghi daer af eten sult, so sullen v oogen geopent worden, ende sult sijn als God, ende weten wat goet ende quaet is.

+ B vers 5

6

Ende twijf aensach dat dien boom goet ende lustich was, om daer af te eten, ende lieflic te aensien, dat eenen lustighen boom was, want hise verlocte, ende si brack dye vrucht af, ende adtse, ende si gaf haren man ooc daer af, ende hi adt.

7

Doen werden haerder beyder oogen geopent ende bekenden dat si naect waren, ende vlochten vijchbladeren, ende maecten hen eenen voorschoot.

8

⁺Ende si hoorden die stemme Gods des HEREN wandelen inden lusthof, doen den dach koel worden was, ende Adam borch hem met sinen wijue vanden ^a aensicht Gods des HEREN, onder die boomen inden lusthoue,

+ C vers 8

a Aensicht Gods, dat is die kennisse der tegenwoordicheydt Gods spalmo xxvi

9

Ende God die HERE riep Adam, ende seyde tot hem, Waer sidi?

10

Ende hi sprac, Ic hoorde v stemme inden Lusthoue, ende vreesde mi om dat ick naect was, ende daerom borchde ic mi

11

Dye HERE seyde, wie heuet v gheseyt, dat ghi naect sijt. Hebdi niet gheten vanden boom, daer ic v af gheboot, ghi en soudet niet daer af eten?

12

Doen sprac Adam, dat wijf die ghi mi ghegeuen hebt, gaf mi vanden boom, ende ic adt.

13

Ende God die HERE sprack totten wijue. Waerom hebdi dat gedaen? Dat wijf antwoorde, die slange bedrooch mi ende ic adt

14

Ende God die HERE sprac totter slangen, Want ghi dit ghedaen hebt, suldi sijn veruloect voor alle vee ende alle dieren opten velde, ghi sult op uwen buyc gaen ende aerde eten al v leuen lanc,

15

Ende ic sal v viantscap setten tusschen v ende den wijue, ende tusschen uwen sade ende haren sade, Dit selue sal v dat ^b hooft vertreden, ende ghi sult hem in die versenen bijten.

b hooft dat is macht tonder doen psalmo. c.xxxix

16

Ende totten wijue sprac hi, Ick sal v veel catiuicheden toe seynden, als ghi groot sult gaen, ghi sult v kinderen in pijne baren, Ende ghi sult wesen onder des mans macht, ende hi sal v heere sijn.

17

Ende tot Adam seyde hi, Om dat ghi verhoort hebt ws wijfs stemme, ende hebt gheten vanden boom, daer ic v af geboot, ende seyde. Ghi en sult daer niet af eten, veruloect si die aerde om dijnen wil, met arbeit suldi v daer af geneeren, al v leuen lanc,

18

doornen ende dijstelen sal si v draghen, ende ghi sult dat cruyt des velts eten,

19

In tsweet ws aensichts suldy v broodt eten, tot dat ghi weder aerde wort, daer ghi af gecomen sijt, want ghi sijt stof, ende sult weder tot stof werden

20

Ende Adam hiet sijn wijf Heua, daerom dat si een moeder is alder leuender menscen,

21

ende God die HERE maecte Adam ende sinen wijue, rocken van vellen ende trocse hen aen.

22

Ende God die HERE sprac Siet Adam is geworden als onser een, ende weet wat goet ende quaet is. Mer nv dat hi niet wt en steke sijn hant, ende oock breke vanden boom des leuens, ende ete, ende leue eewelic

23

God die HERE liet hem doen wt den Lusthoue Eden dat hi dat aertrijc soude bouwen daer hi af gecomen was,

24

ende dreef Adam wt, Ende stelden voor den Lusthoue. Eden den Cherubim, ende een blinckende vierich sweert, om te bewaren den wech totten boom des leuens