Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens

Dit Liedeken is van den soeten name van onser lieve vrouwem, Maria.

Ende gaet op de wijse: met vruechden willen wy singhen.

Ghy Mannen ende Vrouwen
Die op die werelt zijt,
Wildy v ziel behouwen,
En beteren uwen tijt,
Wildy den vyant mincken
Die ons altijt volght nae,
Hebt altijt in v gedincken
Den name van Maria.

Maria is so soeten

Ende so wel genaemt
Datse die Engelen groeten
Also haer wel betaemt,
Het is die Coninginne

[p. 84]

 

Die Godt zijn boodtschap sandt,

 

Vol gratien ende vol minne,

 

Maria is zy ghenaemt.

 

Des heyligen Kersnacht

 

Woude hy gheboren zijn,

 

Van haer die op bracht,

 

Des Hemelschen doctrijn,

 

Sonder wee oft smerte,

 

In Maechdelijcker vreucht,

 

Nu loven wy met herte

 

Maria die suyver jeucht.

 

By des Enghels salute

 

Datse Iesum ontsinck,

 

Wert die vyant te buyte

 

Van ons die bevinck,

 

Het landt en Godt die Vader,

 

Al Marien lijf:

 

Wy dancken alle gader

 

Marien dat reyne wijf.

 

Die neghen Enghelen chooren,

 

Die salighe Seraphin,

 

Altoos sonder verhooren

 

Loven met herten fijn,

 

Die soete suyver name

 

Die elck met herten dient

 

Die Godt wel is bequame

 

Maria des menschen vrient.

 

Maria is die vlame,

 

Die t’Paradijs verlicht,

 

Maria sonder blame

 

Vol gratien is ghesticht:

 

Sy is die tresorie

 

Van gratien, dat is certeyn,

 

Met love willen wy vercieren

[p. 85]

 

Maria al gemeyn.

 

So wie dat in dit leven

 

Maria eere doet,

 

Sy en sal hem niet begeven

 

Al ist dat hy misdoet,

 

Gratie sal hy vercrijgen,

 

Als dede Theophilus,

 

Hy en wilde den lof niet swijgen

 

Mariam die Moeder Iesus.

 

Die can Maria eeren,

 

Ende dienen met herten geheel,

 

Sy sal hem inpetreren

 

Van gratien sulck ghedeel,

 

Dat hy niet en sal mogen

 

Verdoemt zijn na zijner doot

 

Nu laet ons allen loven

 

Mariam, wy hebbens noot

 

Maria draeght die croone

 

Naest Iesus haer lieve kint,

 

Sy sal hem waerlijck loonen,

 

Diese met herten mint,

 

Nu bidden wy alle gemeyne

 

Mariam de suyver jeucht,

 

Dat sy ons verleene

 

Haer gratie ende haer deucht.

Hier eynden die Leysen van dat Hoochtijdt van Kersmissen.