Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens
(1605)–Anoniem Leysen-boeck der catholijcken–
Auteursrechtvrijop de wijse: Alst begint.Het viel een hemels douwe
Al in een cleyn Maechdelijn,
Ten was noyt beter vrouwe
Dat dede haer cleyn kindekijn
Dat van haer was gheboren.
| |
[pagina 63]
| |
Ende sy bleef Maghet fijn
O Maghet uytvercoren,
Lof moet u altoos zijn.
Die Maghet ginck met kinde,
Gheen swaerheyt hinck haer aen:
Als Ioseph dat versinde,
Die goede rechtveerdighe man,
Hy dachte, ick wilse laten
Ick en ben de Vader niet,
Ende trecken mijner straten
Eer my meer schanden gheschiet.
Al van des Hemels throone,
Sprack hem den Engel aen,
Ioseph Davids sone
O waerde salighe Man,
Blijft alle beyde te gader,
Het is boven natueren cracht,
Dat Godt almachtich Vader
In haer dus heeft ghebracht.
Corts daer nae is ghecomen
Een keyserlijck ghebodt:
Dat niemant uyt ghenomen,
Hy en quame sonder spot
Al daer hy was gheboren
Ende brenghen zijn tribuyt
Dat dede men daer hooren
En roepen overluyt.
Maria en Ioseph mede
quamen te Bethlehem waert,
Want daer was Iosephs stede
Als ons die Schriftuer verclaert,
Maer zy mochten nieuwers inne,
Men wijs dese altoos voort
Die Hemelsche Coninginne
| |
[pagina 64]
| |
En was daer niet ghehoort.
Int veldt hebben zy ghevonden
Een huys seer dinne ghedaeckt,
Binnen soo Corte stonden
Hebben zy daer logijs gemaeckt,
Daer wert die Maghet Moeder
Al sonder wee oft sonder pijn
Dies t’smenschen soon en Broeder,
Hoe mocht hy ons naerder zijn.
Wt moederlijcker minnen
Leyde zy hem op haren schoot,
Haer herte verblijden van binnen
Dat dede zijn mondeken root:
Sy custen aen zijn wanghen,
Sy custen menichfout
Dat hy quam zijn ghevanghen
Verlossen ionck en out.
Maria suyver Fonteyne
Daer Godt zijn ruste in nam,
Bidt voor ons al ghemeyne
Ende versoent dat Godlijck Lam,
Soo dat wy moghen gheraken
Met hem in dat soete dal
Daer vreucht is boven maten
Die eewelijck dueren sal.
|
|