Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens
(1605)–Anoniem Leysen-boeck der catholijcken–
Auteursrechtvrij
[pagina 43]
| |
Zoo ons die Schriftuer tuycht van hem
Soos al hy wesen ons middelaer:
Wilt vreucht bedryven, Mannen ende wijven,
Al in dat soete nieuwe Iaer.
Een sterre wt Iacob is op gheresen
Soo ons Balam heeft ghepropheteert:
Abrahams gheloofte is gheschiet door desen,
Ons Salichmaker is ghedescendeert,
Den dach die Symeon heeft begheert
Die is nu ghecomen, noyt blyder maer:
Wilt vreuchden rapen, ghy Christen schapen,
Al in dat soete nieuwe Iaer.
Den bant van Adam is nu ghebroken
Vrede wert vercondicht over al aertrijck
Daer ons Ioannes af heeft ghesproken,
Is nu ghecomen tot aller tijt
Wt liefden geworden mensch, ons ghelijck
Om ons te verlossen alle gaer
Wilt hem aencleven, om zijn woort te beleven
Al in dat soete nieuwe Iaer.
Ierusalem wilt u verblijden
Ghy dochter van Syon, laet droefheyt staen:
Ons Salichmaker is nu ten tijden
Gheboren nae der Scriftueren vermaen,
Die Herderkens hebben die bootschap ontfaen
Dat licht schijnt inde werelt claer
Wilt hem aenbeden met vrolijckheden
Al in dat soete nieuwe Iaer.
Ghy heydenen, wilt nu ontwaken,
Want dat woort is vleesch geworden rechte voort,
Ende wilt den ouden Adam versaken
Want dat woort is Godt, ende Godt is dat woort
Door hem geheel comt ons confoort,
Door niemant anders, alsoo voorwaer
| |
[pagina 44]
| |
Wilt hem aencleven, om zijn woort te beleven
Al in dat soete nieuwe Iaer.
Prince der Acoleyen, dit is u gheschoncken
Al van de Broeders, liefde is t’fundament,
Nu laet Godts woort in u herte voncken,
T’welck vanden vade ris neder ghesent:
Ghecomen wt der Hemelen tent,
Om ons te verlossen allegaer:
Dus wilt hem loven, die daer was verschoven
Al in dat soete nieuwe Iaer.
|
|