Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1626.
Copie van zeker requeste ghepresenteert anden Raedt van Vlaenderen.

Supplierende vertooghen reverentelick Coninck, Heuverdeken, Deken ende Proviseerders vanden souverainen Gulde van S^t Anthuenis, onderhouden by de busschieters ende cannoniers binnen deser Stede van Ghendt, dat zy uuyt crachte van hunne privilegien, zoo by hoogher ghedachten den Keysere Carele als by haerlieder S^me hoocheden gheaccordeert, vernieut ende gheconfirmeert hebben recht tot conservatie ende beter directie vande affairen van tvoorseyde Gulde te statueren ende maecken zulcke publicque ordonnantien statuyten als zy daertoe noodich vinden, ende dat op

[p. 104]

het adveu vanden Hoochbailliu ende Schepenen der voorseyde Stede, in ghevolghe van welcke privilegien de supplianten, over menichte jaren, by politicque ordonnantien hebben ghestatueert op het faict vande bancquetten ende oncosten dat de guldebroeders, in zoodanighe vergaderinghen, commende, ghehouden zouden wesen hunne ghelaeghen promptelick te furnieren inde handen vande Hofmeesters, uuyterlick binnen drye daeghen naer het doen vande rekenynghe, up peyne van daervooren faictelick gheexecuteert te moghen worden byden eersten officier daertoe versocht, welcke ordonnantie byden voorseyden Hoochbailliu ende Schepenen gheratifficeert wesende, hebben de supplianten daernaer ghenootsaeckt gheweest, van hemlieden, tot het vulcommen vande voorseyde executie tot laste vande diffaillanten, te vercryghen lettren executoriaele, die hemlieden oock gheaccordeert zyn gheweest, tot laste van alle de guldebroeders indistinctelick als alle te dier ende ghelycke causen voor de Proviseerders ende daernaer voor de Weth deser Stede privativelick te rechte staende, zoo meer dan notoir is, up welcken voet tot laste van alle guldebroeders indistinctelick veele jaeren de voorseyde innynghe gheschiet is, nu eyst zoo dat in diveersche jaeren herrewaerts, een groot deel vande supposten van desen Hove oock gheworden zynde guldebroeders onder den voorseyden tytle ende patronaetschap, somwylen ghecoren worden Proviseerders ende jaerlicx compareren in alle solempneele vergaderynghen ende ander recreatien int zelve ordinaire, ende naer het scheeden vande vergaderynghe in faulte blyfven huns ghetauxeerde ghelaeghen, neffens hunne confreren, te betaelen ofte de boeten daerinne zy deur absentien zyn vervallen, tot groote schade van tvoorseyde Gulde ende dHofmeesters ofte Bailliu tot innynghen vande pennynghen danof dependerende ghecommitteert, jae dat arger es, en connen de supplianten nyemandt vinden

[p. 105]

die de zelve ghelaeghen ende boeten theurlieder laste wilt innen ofte executeren, midts zy mainteneren ter zelver causen hier tHove te rechte te staene, ende by nyemandt, dan by deurwaerder vanden zelven Hove, gheexecuteert te moghen worden, allessins contrarie d'institutie ende de notoritheyt van dat alle guldebroeders, in zaecken tGulde raeckende ofte d'appendentie vandiere, aldaer in prima instantie te rechte staen, ende daernaer by appeele voor het magistraet van Ghendt, inder voughen dat de supplianten, om voorder confusie te eviteren, ghenootsaeckt worden hunne toevlucht te nemen anden Hove.

Biddende tzelve ghedient zy de supplianten te verleene lettren executoriaele tot laste van alle guldebroeders, wesende supposten vanden Hove, omme hemlieden, uuyt crachte van diere, by officier ofte deurwaerdre, te moghen bedwinghen tot betalynghe van hunne verteerde ghelaeghen, vervallen messe ende eedtboeten, absentieboeten ende dierghelycke, ghelyck men int regardt van andere guldebroeders is doende, te meer midts alle guldebroeders in hunne admissie, zoo wel de voorseyde supposten als andere, ghezworne hebben de statuyten van het Gulde t'observeren ende Heere ende Weth, in zaecken het Gulde raeckende, onderdanich te zyne, twelck doende, enz.

Copie vande ordonnantie daerop staende.

Al ghesien, tHof accordeert de supplianten de lettren executoriaele alhier vermelt. Actum xxvi^en meye 1626. (Onderteeckent), Jacobssen.

Copie van het executoriael.

De President ende Raedslieden, sConincx van Castillen, van Leon, van Arragon, enz., grave van Vlaenderen, enz.,

[p. 106]

gheordonneert in Vlaenderen den eersten deurwaerdere vande camere vanden zelven Rade, ofte anderen princelicken officier in Vlaenderen hierop versocht, saluyt. Wy ontbieden ende bevelen u van sConincx weghe, daertoe committerende by desen eyst noodt, dat ghy alsulcke acten ghewesen by Coninck, Heuverdeken, Deken ende Proviseerders vanden souverainen Gulde van S^te Anthuenis, onderhouden binnen deser Stede van Ghendt, ten laste vande ghecondempneerde, soo wel supposten van desen Hove als andere guldebroeders, in ghevolghe vande ordonnantie vanden xxv^en meye 1626, danof u blycken sal ter executie leght, naer huere vorme ende inhouden, soo verre die executie begheert tot volcommynghe vandiere, ter betalynghe vanden redelicken uwen sallaris van dese uwe executie ende vanden rechte van desen, bedwynghen alle diet behoort, by alle weghen van bedwanghen in ghelycke zaecken onderhouden, want wy u dies gheven volle macht ende speciael bevel, ontbieden ende bevelen van sConincx weghe alle zyne officieren ende ondersaten, dat zy u dit doende neerstelick verstaen ende obedieren. Ghegheven te Ghendt, onder den zeghel vande voorseyde camere, den vii^en juny 1626. Onderstondt: by myne heeren vanden Rade gheordonneert in Vlaenderen, onderteeckent, M. Gomicourt, ende ghezeghelt met eenen zeghele van rooden wasse⁽¹⁾.

(1) Reg. b, f^o xxxix v^o.