Publications de la Société Historique et Archéologique dans le duché de Limbourg. Deel 10

Anno 1591.

In desen jaere syn burgermeisters geweest Jacob van Lom, Jan Golstein.

Den 2 January heeft men begonnen de soldaten bynnen Ruremunde te betaelen heuft voir heuft ende dat opt s'heeren huys doir de burgermeisters Jan van Nederhouen ende Mathis Maroyen van 10 tot 10 daegen ende jeder op syne leeninge gestelt ende verbetert: den capitein 28 gulden, vendrichs 12 gl. 13 st., sergeanten 7 gl., corporaels 3 gl. 15 st., landtpassaden ende oick sommige gevryden 2 gl. 10 st., adelborsten ende gevryde 3 gl. ende sommige 4 gl., musquetiers ende dobbel soldners 2 gl. 8 st., schutten 2 gl.

Den 1 Juny heeft den vendrich Straesborch de compagnie van Alexandre Cigoigne beginnen te betaelen in syn huys.

Den lesten Juny heeft der heer ridder Cigoigne het borger vendel tot sich genomen, het welck te voeren was

[p. 281]

aen Joseph de Decquere ende tselue gestelt opden duytschen voet soe mit beuelhebbers als andersints: Johan Andrea Cigoigne hopman, Cristoffer Widtman van Straesborch vendrich, Marten van Aken lieutenant, Reyner Cortgens veltwyfel, Lenart Steymets gemeyn weyffel, Thomas Smidtz gemeyn weyffel, Guert Ingelmans forrier. Wyders het vendele gegaigeert ende geordonneert opde duytsche maniere ende dweil sy alle diensten moesten doen gelyck andere soldaten en wert van dyen tyt aff nyet meer borger vendel geheeten.

Als den coronnel Verdugo om desen tyt mitten leger te Swaemen lagh ende byden sergeant major Alexandre Cigoigne te gast geladen was, is hem byde stadt Ruremunde aen wyn vereert 28 quart ende daer naer byden ridder Cigoigne als gouuerneur 42 quart.

Den 1 July is de huysfrouwe vanden capitein Joseph de Decquere vertrocken naer Gelre, alwaer hy mit syne nieuwe aengenomene compagnie duytsche knechten in garnisoen lach.

Op heylich sacramenti dach is den hertoch van Parma als gouuerneur generael ende veltheer mit syne Mats. leger, om Nymegen te ontsetten, aen desen ordt van Ruremunde aencomen ende ten huyse vanden ridder Cigoigne gelogeert geweest, alwaer de stadt Ruremunde syne hoicheyt mit einen toulast wyns ad 4 ahmen, 22 malder haueren ad 4 gulden mitte sacken, 10 hamels ende 11 cappounen vereert heeft. T'seluige mael aen verscheydene andere heeren, als monsieur de la Motte, generael vande artillerie, aen 2 andere groote heeren, den einen inden Cathuseren ende den anderen byden sergeant maior Alexandre Cigoigne, den president Richardot, audiencier Verreycken, den secretaris Vasseur oft Morienzart, don Pedro de Castra, aen cost, wynen etc. vereert ouer de 111 gulden.

[p. 282]

Aende vourluyden vande bagagie van syne hoicheit naerden Rhyn te vhueren aende stadt Ruremunde gecost 216 gulden ongevher.

Den 27 July is den hertoch van Parma getrocken vuyt Nymegen, verlaetende de schantse van Qnodsenborch.

Den 4 Septembris heeft den vendrich Christoffer van Straesborch int hertzhorn bynnen Ruremunde questie ende differentie gehadt mit eenen edelman, Warenberch genant, alwaer is gecomen den capitein Alexandre Cigoigne, sergeant maior der seluer stadt, (wesende der ridder Cigoigne der tyt tot Bruessel) om te willen weten watter te doen was ende aldaer mitten voirscr. vendrich groote woorden gecregen, soe datter bynae inde stadt eenen oploop geschiede, meynende, dat de stadt verraeden was, dergestaldt, dat den vendrich hem syn huys voir gevenckenisse gegeuen wart totte aencompste vanden gouuerneur Cigoigne.

Den 18 Septembris syn bynnen Ruremunde eenen hoop van crancke soldaeten vuyten leger gebracht ende om die selue van daer naer Maestricht op te doen vhueren, aen einen schipper ende voirts aende stadt vourluyden betaelt 132 gulden.

Daer naer is syne hoicheit wie oick het leger vanden Rhyn wederom op Ruremunde op comen ende sich tot Echt gelacht, aenden coronnel Verdugo schenckaige gedaen ouer de 109 gulden.

Om desen tyt syn etlicke dobbel cartouwen vanden Rhyn herwarts naer Ruremunde opgebracht ende voirts nyet sonder groote costen vande stadt naer Maestricht gesonden mit seker conuoy van borgers.

Den 17 Nouembris heeft sich een vendel hoichduytsche Mansfeldischen regiments tot Harthen nedergelacht, van meyninge bynnen Ruremunde te comen doir ordre van don Gaston de Spinula vuyt het leger van Karcken⁽¹⁾ mit

(1) Karcken bij Heinsberg.

[p. 283]

beuel, soe difficulteit gemaeckt werde te logeren inde voirsteden biss wyder ordre van haere hoicheit, ten welcken eynde oick Verdugo seluer ende don Gaston aende magistraet den 19 Nouember 1591 gescreven, dan is het seluige vendel mit drye schippers naer Aerssen gefhuert worden, doch heeft de stad d'officiers opt raedthuys genomen ende aldaer hun eenige schenckagie gedaen ad 27 gulden.

In desen jaere als Herman den bode doir den gouuerneur Cigoigne mit brieuen aen syne Alteze was gesonden ende onder wegen vanden vyandt geuangen wart, naer dat hy langh geseten, heeft hem de stadt mit 100 gulden moeten rançonneren.

In dit selue jair heeft de stadt aenden ridder Cigoigne bouen syn ordinaris seruis gelt mit eenige tafellaecken, handtdwelen ende handtdoecken moeten versien ende groote reparatien als in voerige jaeren gedaen, oick in consideratie vande costen by hem aengewendt, int tracteren van syne hoicheit ende andere groote heeren hem vereert mit eenen vetten oss ende twee verckens. Insgelicx aenden sergeant maior een vet vercken ende andere verscheydene schenckagien mit een ahme wyn wegen syn pretens seruice.