Jaarboek van de Maatschappij der Nederlandse Letterkunde, 1971

4. Verslag aangaande die ‘Maatschappij’ in die Republiek van Suid-Afrika oor die jaar 1970

Die ledetal van die ‘Maatschappij’ in die Republiek van Suid-Afrika bedra tans (Desember 1970) 46. Tydens die afgelope jaar is geen nuwe lede gekies nie, maar die bestuur het prof. dr. B. Kok, rektor van die Universiteit van die Oranje-Vrystaat, Bloemfontein, as lid benoem. Prof. Kok het die benoeming aanvaar.

Prof. dr. S.P.E. Boshoff, in 1922 as lid gekies, het die begeerte uitgespreek om te bedank.

Gevoelige verliese is, in die eerste plek vir Suid-Afrika en terselfdertyd deur die ‘Maatschappij’ gely deurdat die volgende lede aan hul naasbestaandes, hul land en hul volk ontval het: Prof. dr. Willem J. de Kock (benoem in 1964), 'n bekende Suid-Afrikaanse historikus en redakteur van die Suid-Afrikaanse Biografiese Woordeboek (s.a.b.w.); prof. dr. Thomas H. le Roux (gekies in 1910), 'n vooraanstaande taalgeleerde en die oudleermeester van 'n groot aantal studente in die vak Afrikaans-Nederlands aan die Universiteit van Pretoria; en dr. Pieter C. Schoonees (gekies in 1949), in lewe hoofredakteur van die Woordeboek Afrikaanse Taal (w.a.t.). Prof. dr. Wilfried de Pauw het, in verband met sy amptelike werksaamhede, na België teruggekeer.

Prof. dr. G.S. Nienaber, oud-hoogleraar aan die Natalse Universiteit, is deur die Universiteit van die Oranje-Vrystaat met 'n ere-doktoraat vereer en tree tans o.m. as 'n deeltydse lid van die Publikasieraad op.

Wyle dr. P.C. Schoonees is, as hoofredakteur van die w.a.t. deur dr. F.J. Snyman opgevolg, terwyl dr. I.D. du Plessis as die eerste kanselier van die Universiteit van Wes-Kaapland benoem is.

Aan prof. dr. M. Bokhorst is die Besondere Erepenning vir Kultuurhistoriese Prestasie deur die Suid-Afrikaanse Akademie vir Wetenskap en Kuns toegeken, terwyl die Akademie die Markus Viljoen-medalje vir Joernalistiek aan mnr. L.W. Hiemstra en die Akademieprys vir vertaalde werk

[p. 200]

aan André P. Brink vir die vertaling van Alice deur die Spieël en al sy vertalings tot dusver toegeken het.

Prof. dr. Ernst van Heerden het wyle prof. dr. N.P. van Wyk Louw as hoof van die departement Afrikaans-Nederlands aan die Universiteit van die Witwatersrand, Johannesburg, opgevolg terwyl out-rektor prof. dr. H.B. Thom 'n ere-doktorsgraad in die Opvoedkunde van die Universiteit van Stellenbosch ontvang het.

Prof. dr. A.N. Pelzer, tans registrateur van die Universiteit van Pretoria, is as departementshoof (Geskiedenis) deur prof. dr. F.J. du Toit Spies opgevolg.

Voorsitter van die Boekekommissie van die Suid-Afrikaanse Akademie is prof. dr. P.J. Nienaber, terwyl prof. Meyer de Villiers en prof. dr. G.S. Nienaber o.m. lede van die Taalkommissie van reeds genoemde Akademie is.

In die jongste uitgawe van die Jaarboek van die Suid-Afrikaanse Akademie (1970) kom 'n aantal van bogenoemde besonderhede voor, terwyl in dié publikasie tewens vermeld is dat m.e.r. (dr. M.E. Rothmann) met die Tienie Holloway-medalje vir Kleuterlektuur (1970) vereer is. Ten slotte dien vermeld te word dat dr. Stephanus J. du Toit met die ere-lidmaatskap van die Suid-Afrikaanse Akademie vereer is.

In die uitgawe van die Nuusbrief van die Suid-Afrikaanse Akademie (jg.8, Augustus 1970) kom 'n keurlys van oorspronklike en vertaalde Afrikaanse jeugboeke voor.

'n Terugblik oor 1970 vertoon, met betrekking tot die ‘Maatschappij’ se lede in die r.s.a. veral kenmerke van gevoelige verliese wat gely is. Andersyds bied die feit dat 'n aantal lede se verdienstes in die een of ander vorm erkenning gevind het redes tot dankbaarheid. Die hoop word ten slotte uitgespreek dat die middele gevind mag word waardeur die ledetal van die ‘Maatschappij’ in die Republiek binne die eersvolgende jare vergroot mag word.

Jan Ploeger