Der ionghe dochters tijt-cortinghe

[fol. 67r]

Register ende cort inhouden van alle de geschiedenisse in desen Boecke begrepen, elck op zijn ghetal der bladeren ghestelt, om elcke gheschiedenisse lichtelijck te vinden.

¶ De eerste gheschiedenisse.

Polinesso bemint Genevra, die hem haedt, ende bemint Ariodant, vande welcke sy weder bemint wort. Polinesso doet Ariodant sien, ende gheloouen (hoe wel qualijc) dat hy by Genevra slaept. Ariodant werpt sich seluen van onuerduldicheyt inde Zee. Lurcain de broeder van Ariodant beschuldicht Genevra van hoererye, sy wort ten viere verwesen, maer wert wonderbaerlijck verlost.

Folio. 3.

¶ De tweede gheschiedenisse.

Gabrina bemint Philandre, die haer oncuysheyt haet, en versmaet, sy claecht haer man dat hy haer vercracht heeft, die doet hem in een toorn gheuanghen setten, sy doet haer man door hem ombrenghen, buyten zijn weten, doch vlucht met haer in zijn vaders huys, daer brengt sy hem om, met een medecijn, ende oock de vader van Philandre, eyntelijck is sy naer haer verdienste leuendich aen een stake verbrandt.

Folio. 9.

¶ De derde gheschiedenisse.

Alcestes een Baroen wt Trachien, bemint Lidia, de dochter vanden Coninck Noradin, Coninc van Lidien. Hy doet om haer vele vrome feyten van wapenen, sy wet hem ten houwelijck gheweyghert. Dies hy haers vaders vyant wert, ende brengt hem, ende haer in grooten noot, maer sy door schoone woorden hem bedrieghende, coemt weder in haer Rijck, ende doet hem daer na van liefden steruen, eyntelijck wert sy met haer vader wt haer Rijck gestooten, ende steruen int geuanckenisse ellendichlijck.

Folio. 12.

¶ De vierde gheschiedenisse.

Sinato ende Sinori beminnen Camna, Sinato trout haer Sinori brengt hem om hals, hy eyscht haer ten houwelijc, sy consenteert dat met die meeninghe om haer mans doot te wreken, ghelijckse oock doet, want sy hem ende haer seluen vergheeft.

Folio. 15.

¶ De vijfde gheschiedenisse.

Paganin van Munnich, voert wech de huysvrou van Richart van

[fol. 67v]

Kinsick, de welcke vernomen hebbende waer sy is, maeckt kennisse met Paganin, haer wederom eysschende van hem, hy is te vreden, soo sy wil, sy wil niet, dies Richaert van hertseer sterft. Paganin trout haer naer Richarts doot, tot een huysvrouwe.

Folio. 17.

¶ De seste gheschiedenisse.

Reynaert van Ast, berooft sijnde, comt naeckt aen Willemsfoort, daer hy van een Weduwe gheherbercht ende inghelaten wert, ende zijn schade verhaelt, ende zijn goederen wederom ghecreghen hebbende, is ghesont weder thuys ghecomen.

Folio. 20.

¶ De seuenste gheschiedenisse.

Olimpia des Hertogen dochter van Wallia, bemint Landijn Coninck van Noorweghen, sy wort bemint van den Prince van Yrlant, die sy haet, hy brengt haer vader ende broeder om hals, ende neemt Landijn gheuanghen, sy ghevlucht zijnde, door middel van een Ridder, verlost Landijn met die doot van haer vyanden. Landijn trout haer, die haer daer na troulooselijcken in een Eylandt verlaet, sy wort ghenomen om haer een zeemonster op te offeren, maer door een Ridder verlost zijnde, wert Landijn door den Coninc van Hyberniens volck, om zijn trouloose meneedicheyt omghebracht, die haer daernae tot zijn huysvroue neemt.

Folio. 22.

¶ De achtste gheschiedenisse.

Paulo Malatesta, door onordentlijcke boose liefde verwonnen zijnde, slaept by zijn broeders huysvrouwe. De welcke t'selue vernemende seer ghestoort is, ende haer beyden naeckt byden anderen op een bedde vindende, met eenen slach haer beyder hoofden afslaet.

Fol. 26.

¶ De neghenste gheschiedenisse.

Meester Symon Medecijn tot Florence, gheeft door begheerte van Bruyn, Buffelmacho ende Nello Schilders, te verstaen aen Calandrijn. Dat hy kint draecht, de welcke gheuende ghelt ende Capoenen, wort sonder baren ghenesen.

Folio. 29.

¶ De thiende gheschiedenisse.

Saluagio heeft drie sonen, de oudste gaet na Roomen, trout de weduwe van een Lakencooper, die hy qualijck tracteert, zijn broeders comen om hem te besoecken, sy verbercht die voor haer man in een Verckenscot, daer sy van stanck steruen ende smooren, ende werden alsoo doot zijnde, inden Tyber gheworpen, desghelijck oock den anderen die leuendich was.

Folio. 31.

[fol. 68r]

¶ De elfste gheschiedenisse.

Camilla bedriecht onder t'dexel van biechte, ende suyuere consciente een Religieus. Daer deur sy verblijt sijnde op Octauio Foscarino, so veel weet te practiseeren dat de Religieus haer (buyten sijn weten) middel gaf, om by hem te slapen.

Folio 33.

¶ De twaelfste gheschiedenisse.

Alsina bemint Partinopeo, hy wil naer haer niet hooren, maer zyn huysvrouwe ghetrou blijuen. Door d'ingheuen van Alsina, besoeckt hy zijns wijfs getrouheyt, die hy in faute vint. Dies hy haer verliest, waer deur hy sijn leuen in droefheyt voleynt.

Folio. 37.

¶ De derthiende gheschiedenisse.

Trufaldijn bemint Roosemonde, die hem haet, ende is verlieft op Polinde, die haer oock hertelijc bemint, Trufaldijn crijcht door middel van Polinde, hoe wel sonder sijn weten, Roosemonde in sijn ghewelt, ende haer beyden met oock haer broeder Horrisel ommebrenghende, wert daer naer oock van Agrican aen een peerts steerte ghebonden, ende alsoo ghedoot.

Folio. 39.

¶ De veerthiende gheschiedenisse.

Cinthia bemint Dellio, ende haedt Laselua, die haer bemint, Dellio huwelickt aen Angelica, die hem een costelijcken rinck gheeft. De welcke Cinthia van hem begheert, maer wert gheweygert, daer deur sy haer liefde in een rasende gramschap verandert, ende soeckt hem deur Laselua om hals te brenghen, t'welc hy haer belooft, ende tot lidtteecken soude hy haer brengen den ringhe van Angelica, dan Laselua gheeft het Dellio te kennen, die hem den ringe gheeft, hy verclaert aen Cinthia dat hy Dellio omghebracht heeft, ende wert door toedoen van Cinthia gheuanghen, ende ter doot veroordeelt, dan wert door Dellio verlost.

Folio. 42.

¶ De vijfthiende gheschiedenisse.

Caltan doorsteeckt binnen Roomen een Guibellins edelman, ende vlucht tot Milanen, daer hy verlieft op een Weduwe, genaemt Hippolita, die hy heymelijcken trout, wert daer na grootelijck veruolcht om den dootslach, hy valt door raet van Hippolita den Keyser te voet, ende crijcht ghenade, maer vergheet voorts Hippolita, de welcke den Keyser oock te voet vallende, ouer Caltan claecht, eyntelijck door beuel des Keysers trouwen malcanderen, ende leuen vredelijck t'samen.

Folio. 47.

[fol. 68v]

¶ De sesthiende gheschiedenisse.

Diego bemint Catulle, hy wert van haer met ghelijcke liefde bemint, maer door ongheluck vande Mooren gheuanghen sijnde, verliefde op hem Mandoque, des Conincx Airadins dochter, Catulle vercoopt al haer bagghen, ende iuweelen, ende treckt in mans cleederen, om hem te verlossen, ende verrantsoenen, maer wert gheuanghen vande Mooren, ende te coop gebracht. Diego coopt haer om t'ghelt dat Mandoque hem gaf, daer deur hy in twist gheraeckt, met eenen Moor die hy doorsteeckt, ende wert met Catulle gheuanghen, ende ter doot veroordeelt, maer werden deur Mandoque verlost, ende vry ghemaeckt.

Folio. 51.

¶ De seuenthiende gheschiedenisse.

Nicolaes Trinitie verlieft op de huysvrouwe vanden Capiteyn van Nocera, die t'selfde merckende hem ende sijn broeder om brengt, met grooter wreetheyt, ende sijn huysvrou van bouen ter veynsteren wt eenen toorn smeet. Maer wert van Coenraet Trinitie straffelijck gewroken, ende hy met alle sijn medehulpers wreedelijcken ghestraft.

Fol. 56.

¶ De achthiende gheschiedenisse.

Pauwels Iordaen Vrsijn doet zijn huysvrouwe, des Hertoghen van Florencen suster, van hem, haer beschuldighende van ouerspel. Sy sterft. Hy wert verlieft op een Romeyns Edelmans huysvrouwe, sy doet haer man om brenghen, met haer consent, hy trout haer, daer na wert hy vergheuen, sy wert vermoort met haer twee broeders, die haer vermoorden werden door de Iustitie oock omghebracht.

Folio. 62.

FINIS.