Historie van Hughe van Bordeus

¶ Hoe Claramonde haren neue Tryakel badt dat hi wilde doch swighen.

[fol. 40a]

DOe Claramonde hoorde dat Tryakel haer neue wilde die dinghen vanden kersten brenghen aen haren vader, so wertse seer veruaert ende si hadde wel gewilt om al haers vaders goet dat si ghesweghen had ende si noyt vanden kersten vermaent had. Triakel seide Ic wil den kersten sien. Claramonde seyde, lieue neue ic sallen v gheern laten sien, want si was seer veruaert, ende si leyde hem in haer camer daer huyghe was. Ende als hem huge sach, so seyde hi lieue neue ick heete v willecome, ende hughe greep hem in sinen armen ende hi custe hem aen sijn wangen. Doe seyde hughe, alyames lieue neue wat doet Gherijn ende mijn ridders, ende mijn nichte die ic v liet als ic te dunalster van v sceyde. Doe seyde aliames. Ic dede gherijn ende v ridders gheuanghen legghen, want ic meende daer v gheuonden te hebben. Ende ic hebbe ons nichte cameniere doen werden bi Claramonde. Doe hoorde Claramonde hughen ende alyames aldus tesamen spreken, so seyde si tot alyames. O ghi fransoys ghi wetet seer wel die fransche tale te spreken, ende ghi dedet v noemen tryakel als ghy eerst in mijns vaders hof comen waert, ende seyt dat ghi een soone waert van mijnder moeyen mijns vaders suster: ende dat ghi mijn neue waert, ende ghi hebt gheloghen, want ghi niet en bestaet noch mi noch mijnen vadere in gheender manieren van maechschap waerom hebdy mijnen vadere uwen oom gheheten ende ghi seydet v te wesen mijns vaders sustersone, ic salt mijnen heer vadere segghen, hi sal v doen hanghen aen een galghe.

[fol. 40b]

Doe was alyames veruaert ende hi ontstelde in sijn aensicht ende hi viel op sijn knyen ende seyde. Ghenade mijns lijfs eedel vrouwe het soude v cleen profijten, dat ghi mi dedet doden. Doe seyde huge O eedel ioncfrouwe mijn schoon lief vergheuet hem want hi is mi te na van bloede dan dat ghi hem dat soudt doen. Doe seyde die ioncfrouwe. Nv heb ick mi wel ghewroken van der sorghen die hi mi te voren had aenghedaen, dies loech doe hughe ende was wel tevreden, ende hi dede Aliames opstaen van der aerden ende aliames ende claremonde waren goede vrienden, ende doe ginck die ioncfrouwe ende liet gherijn ende die .x. ridders wter gheuanckenisse die al by hugen quamen, ende waren verblijt ende maecten goet chiere, want Claramonde besorchdese al van eeten ende drincken, ende van al dat hen van node was.