bloys, ende v dochter sal wel van haer leeren fransoys Doe seyde die amirael lieue neue dit salmen al doen dat ghi segt. Ende gherijn ende die .x. ridders worden in die geuanckenisse brocht ende alyames voldede ende sach waer si bleuen. Doe seyde gherijn, schande moet v geschien o Triakel ghi dedet ons verstaen dat ghi aliames hete ende nv is die Amirael v oom Ay lacen nv en sal ic nemmermeer in kerstenrijc weder comen noch ooc die goede ridders die hier sijn. Doen seyde Aliames, och swiget toch goede gherijn, dit heb ic al om pratijken ghedaen, ic meende hugen int geuangenis te vinden, mer nv weet ic wel dat hi doot is ende verslagen nv wi hem inden kercker niet en vinden Maer ic bid v om gods wille en bedroeft v lieden niet ic sal v hier cortelinghe weder wt helpen, ende ick en sal uwer niet vergheten dat gheloue ic v lieden bi god almachtich die mi, gescapen heeft. Ende alle dese woorden spraken si tesamen in Fransoys daer die toren wachter tegenwoordich stont. Hier om sorchde alyames seer oft die kerckerier haer sprake verstaen hadde. Soo nam alyames sijn swaert ende sloech den kerckerier dat hooft af dat hi doot ter aerden viel, ende alyames nam dat hooft ende brachtet gedragen voor den amirael Gaudijs die tot Alyames seyde. O triakel lieue neue van waer coemt dat hooft dat ghi daer brenghet. Tryakel seyde het is dat hooft van uwen dienaer die v gheuanckenisse bewaerde dyen heb ic af gheslaghen, want hi ende de kersten droeghen so wel ouer een dat ick wel verstonde dat hi cortelinghe soude die kersten hebben laten ghaen ende wt ghelaten.
Auteursrechtvrij