Historie van Hughe van Bordeus

¶ Hoe hughe voor Dunalster quam ende sloech aen dat gulden becken dat aen der linden hinck voor dat casteel.

[fol. 23b]

NA dat hughe dat had verstaen van Aliames seyde hi. Neue ghi segt wi willen hier gaen riden god sal ons helpen ende sparen. Als si alle quamen gereden voor die poorte vanden casteel so sagen si daer een werc seer neerstelick gedaen. Daer stonden drie metalen mannen, ende elc had eenen yseren vleghel in sijn hant slaende so crachtelic dat niemant en corde noch en dorfte ge\naken

[fol. 24a]

der poorten vanden casteel. Als si dat saghen so waren si qualick tevreden ende hughe seyde. O lieue here ic en sal binnen den casleel niet comen door die metalen mannen die hier staen. Ende aliames seyde. Dit casteel is onwinlick door dese metalen mannen mer waer die poorte open, so souden dese mannen haer slaen laten dat weet ic wel Doe hadde huge menige gedachte ende hi sach al omme hier ende daer, also dat hy daer sach staen een linde daer aen hinghen twee becken van goude. Ende als hi die ghesien hadde so track hi sijn swaert wter scheyden ende sloech aen dat een becken datmen den clanck bouen hoorde op dat slodt Ende terstont so quam daer een schoone suuerlijcke ionffrouwe in die vensteren bouen die poorte van den casteele, ende si sach terstont ende mercte dattet kerstenen waren ende si liep beneden ende ontdede dye poorte. Ende als die poorte open ghedaen was, so lieten die metalen mannen haer slaen staen: Als nv die poorte open was so ghinck hughe van sinen paerde ende hi is totter schoonder ionffrouwen voorseyt ghegaen binnen der poorten vanden casteel ende Aliames ende gherijn ende die thien ridders bleuen daer buyten. Ende als hi binnen was doen sloten se weder die poorte, ende die metalen mannen sloeghen doen weder aen als si te voren hadden ghedaen. Ende hughe die ghinc met der suuerlijcker Jonffrouwen binnen den casteel, in welcken casteel hi wijf noch man en vernam, waer hi sach altoos op de schoone ioncfrouwe van wat landen si geboren was dat si so wel conde spreken die franssche sprake.

[fol. 24b]

Die ionffrou seyde. Here ic ben gheboren wt vrancrike van hoghe magen ende groten geslachte: ia so groot als in vrancrike eenich heren sijn sonder den coninc, want de kinder van bourdeus sijn mijn neuen, die een heet Gheeraert ende die ander hughe Als dit hughe hoorte greep hi die ioncfrouwe in sinen armen ende seyde wel moet v god doen mijn lieue nichte mijn broeder heet gheraert ende ic ben hughe ende mijn vader was hertoge sanguijn. O lieue nichte hoe lange hebdi hier gewest op dit casteel Doe vertelde si hughen alle de saken ende manieren met wenende oogen seer deerlic screyende ende seyde Mijn oom odom die wreede tyran bracht mi hier in dit ongelouwich lant, ende hi bracht ooc hier den edelen man aliames, ende mijn oom verlochende tkersten geloue ende is geworden een turcx tyran om dat hi coninc woude sijn in Dorimont. Aldus heeft hi mi iammerlick verraden ende die goede here aliames is gheuangen, ende ic sorghe dat hi daer nemmerweer wt comen sal. Doe seyde huge lieue nichte ouer uwen oom sidy ghewroken, want die quade hont hangt aen een galghe buten Dorimont Ende ic bid v lieue nichte wijst mi den here Agayant die soo seer ontsien is in dit lant tot babilonien toe Dye ioncfrouwe seyde. Dat en derf ic niet doen, mer wildy mi ghelouen dat ghi hem verslaen sult ic salten v wijsen Hughe seyde, weerde nichte dat sal ic doen ende ic hope bider hulpen der maghet maria dat ic hem van der werelt v sal quijt maken Doe seyde de ioncfrouwe huge here neue hi leyt ende slaept aldus hebdi hem lichtelic te doden ende sijn hooft af te slaen. Anders als hi op die beenen waer ende hi hem ter weer mocht stellen alwaer uwer hondert so wel gewapent als ghi, daer en soude niet een af ontgaen

[fol. 25a(G)]

hi en sloeghe v allen doot Doe seyde hughe. Lieue nichte so moet wel een fel man sijn jc souden geern sien, ic bid v wijsten mi. Doe seide si, gaet twee cameren door ende in die derde camer leyt hi ende slaept Doe ginc huge in deerste camer daer hi eenen afgod vandt staen gegoten van finen goude mer hi was binnen hol, ende huge werp den afgod ter aerden neder. Ende daerna quam hi in de tweede camer daer hy twee afgoden vant die hi ooc ter aerden werp. Daer na quam hi in die derde camer daer hy sach een bedde staen dat seer schoon ende playsant was daer op lach dye groote Daygant hebbende een hol magher aensicht met twee lippen als een osse mule met eenen groten bulte op sinen rugge, ende hi was seer afgriselic om aensien ende hi hadt een costelijc oorcussen onder sijn hooft. Die stapelen van der bedtstede waren van finen goude seer costelic gewracht, ende op elcken stapel sanck een vogelken elc na sijn behoorte. Als hughe alle dinck wel besien had, ende den groten leliken tyran, so riep he met luder stemmen. Stant op ghi hont, hoe legdi op so schonen bedde die self so lelic sijt Met dese woorden wert dagayant wacker ende hi spranc van sinen bedde ende seyde. Ghi sijt een stoute knape dat ghi hier dorft comen, maer ic weet wel dat v mijn wijf hier gesonden heeft want si mi seere hatende is. Ende bi mamet seyde dagayant, ghi en waert noyt verrader noch ongetrou man haddi van quaden geslachte geweest ghi hadt mi mijn lijf genomen in minen slape, mer segt mi wat ghi hier in mijn lant soect. Hughe seyde ic moet reysen te babilonien totten amirael Gaudijs daer moet ic coninc karel van vrancrijcke een bootschap doen, ende ic moet hem brenghen dat hare van sinen baert ende sijn vier winckele

[fol. 25b]

tanden wt sinen mont, Doe seyde Dagayant lieue knape dat is een grote sake want die amirael en gaue sijn winckel tanden niet om al coninc karels landen die hem toe behoren. Nv segt mi seyde dagayant tot hughen, wt wat lande sidi gheboren. Hughe antwoorde, ich ben gheboren te Bourdeus, ende hertoch Sanguijn was mijn vader, ende mijn broeder heet Gheeraert, ende ic heete huge Ende Dagayant seyde, hoe sidi so koene in mijn landt ende hier op mijn casteel te comen, Hier heeft gheweest een coninc van grooter macht die de crachte hadde van .iiij. mannen, nochtans en mochte hi mi niet verwinnen noch tonderbrenghen met sijnder cracht die hi hadde van natuerlijcker sterckeit, ic heb hier binnen eenen halsberch dye is seer schoone ende claer, daer ouer heeft gewracht meester Seye op die zee .vij. iaer lanc. Ende hi is van sulcken virtuten ende van so grooter cracht ende machte, die den halsberch aen heeft hi en derf niet sorgen dat hi gheslagen worden sal noch stael noch ysere en mach hem niet sniden noch quetsen, noch geen wapenen en mach hen deeren. Ende die den halsberch dragen sal dat moet sijn een vry eedel man hi moet ooc suuer sijn van hooft sonden ende sine moeder moet ooc sijn een goede ghetrou vrouwe Ende doe hem sijn moeder droech dat si doe op eenen anderen man hadde ghedacht om dyen te consenteren buyten haren eyghen man soo en soude dat kint den halsberch niet mogen aen doen. Ende den halsberch sal wel passen een kint van twee iaren. ende eenen groten man soudet oock wel passen, hoe groote, hoe cort hoe lanc dat oock ware. Doen seyde Hughe soo soudick den halsberch wel aendoen, want ic ben een edel man

[fol. 26a(Gij)]

Ende mijn moeder was een goede vrou ende een edel wijf die haren man getrou was Als dagayant hugen dus hoorde spreken seyde hi. O knape ghi vermeet v seer grote dingen, die grote coninc karel en soude hem sulcke dingen niet vermeten dat hy den halsberch oen soude doen Doe dede dagayant Hughen den halsberch, dien hy wel besach ende docht hem veel te cleen sijn voor een kint van twee jaren, mer hughe nam den halsberch ende sloech hem ouer sinen hals ende hy paste huge wel. Dit siende dagayant riep met luder stemmen, trect uut den halsberch Doe seyde hughe. Dagayant siet ghi om eenen anderen desen is mijn, want coninc Abroen prees soo seer desen halsberch dat icken nyet geern en soude willen wt doen. Doe seyde dagayant. O vrient ic weet noch een beter stuck, geeft mi den halsberch weder, ick sal v schincken desen rinck dien ick hier aen mijn hant heb, ende dan suldi v bootscap van coninc karel van vrancrijcke sonder sorghe wel mogen doen, want den rinck is van sulcker virtuyt ende cracht, so verre als ghi dien bi v hebt soo en can v niemant schaden, noch die amirael en sal v nyet dorren misdoen al haddi die helft van sinen heeren ende edelen doot, ende door die cracht des rincx so ontsiet mi die amirael seer. Doe seyde hughe den rinck wil ick hebben ende willen houden voor mi. Neen seyde dagayant dat en sal so niet sijn, so sie ic wel dat wi moeten vechten daer om. Ende doe ghinc hen die ruese wapenen ende hi dede veel harnas aen ende bouen dat harnas nam hi sinen schilt ende een groot swaert dat hughe te wonder aensach, nochtans bleef hughe stout ende onuersaecht.