Het hofken der geestelycker liedekens

[Nv laet ons alle danckbaer sijn]

Een gheestelijc Liedeken, om op die gratie te singen.

Nv laet ons alle danckbaer sijn
Ons Heer ons Godt ons Vader
Die ons van bier van wijn van dranck
Versaeyt heeft alle gader
Van vleys en ander goede spijs
Ghecockt bereyt seer menich wijs
Wilt hem v hert aencleuen
Hij en sal v niet begeuen.

Die sone Godts gebenedijt
Die willen wij mede louen
Die ons van sonden heeft bevrijdt
Wanneer wij waren verschouen
Die soo minnelijck ons heeft ontfaen
Ende inder noot niet af en wilt gaen
Bemint hem in dit leuen
Hij en sal van v niet scheyden.

Wij dancken oock Godt den heyligen Gheest
Van sijnder visitatie
En hadden hij by ons niet gheweest

[p. clxxxiiij]

 

Ons vreucht waer tribulatie

 

Hij es een trooster int verdriet

 

Want sonder hem en sijn wij niet

 

Wilt hem v herte bereyden

 

Hij en sal van v niet scheyden.

 

 

 

Wij willen die waert oock dancken seer

 

Diet al heeft laeten coken

 

Hij heeft soo wel bewaert sijn eer

 

Want ons en heeft niet ghebroken

 

Wij dancken oock dit gheselschap goet

 

En sijt vrolijck met herten soet

 

Dat ghijlien sijt ghecomen

 

Wort dancbaerlijck ghenomen.

 

 

 

Wij en willen oock vergeten niet

 

Die van hier sijn ghescheyden

 

Op datse den Heer wt allen verdriet

 

Al in sijn rijck wilt leyden

 

Want soo wij doen, sal ons gheschien

 

Wanneer wij dit leuen vlien

 

Aldus soo wilt voor desen

 

Eenen pater noster lesen

 

 

 

Wij willen ons wat verblijden nv

 

Tis nv een dach van vreuchden

 

Van swaricheyt ons maken schouw

 

Soo mogen wij wat verieuchden

 

Den boghe en mach niet gespannen staen

 

Hier om altijt laet droefheyt gaen

 

Tis nv gheenen tijt van schreyen

 

Wij willen ons wat vermeyen.