Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

LXXX.

⁺ 1612. - Transpoort van vier ponden grooten tsiaers up de stede van Ghendt, ghejond ende ghegheven bij joncvr. Jaeckemijne van Boven⁽¹⁾, weduwe van dher Adolf van Havere, den xxij^en in meije xvi^e twalefve, om daermede te done twee messen ter weeke, dicendach ende saterdach, ter saligher memorie.

‘Kendelic sij allen lieden dat commen ende ghecomparet es voor scepenen vander kuere in Ghendt, Jan Coolman, procureur inden raet van Vlaenderen, als executuer vanden testamente van wilent jo^e Jaeckemijne van Boven, w^e van wijlent dheer Adolf van Havere; de welcken kende, lijde ende verclaersde inde voors. qualijteijt wel ende duechdelic upghedreghen ende ghecedert thebbene, draecht up ende cedeert bij desen, den heere jo^r Jaecques van Selebeke, gheseijt Taccoen, ende dheer Joos de Deckere, als voochden ende ten profijte van het godshuus van

+ F^o (89) v^o.

(1) Haar naam staat soms met van en soms met van̄, in dit stuk geschreven. Men zie ook n^r LXXII.

[p. 86]

S^te Jans ende S^te Pauwels ande Brucssche poorte deser stede, alsulcke eene eerffelicke losrente van vier ponden den penninc XVI, als de voors. jo^e in haren levene ghecommittert heeft ten laste deser stede; naer uuijtwijs ende wettelicke briefven van verbande in datum XV^en novembers XIIII^e LXXXV, up den ploij gheteeckent: Schaubrouck, spreekende ten proffijte van Arendt Saerlet, als deken vande neerijnghe vande temmerlieden deser stede, ende den transport danof voor scepenen vander kuere ghedaen, den XXVII^en lauwe XV^eLIX, bij Joos de Rouck, ten profijte van m^r Willem Doens, met anderen transpoort ooc ghepasseert voor den voors. scepenen vander kuere, den XII augustij XV^e XCIIII, bij Gillis van Haute, f^s Michiels, ten proffijtte vande voors. jo^e Jaeckemijne vander Boven, alle te samen den voorn. voochden, ten desen present, overghelevert; omme bij hemlieden ende huerlieder naercommers, voochden vanden selven godshuuse, de selve rente opgheheven ende ontfaen te wordene, metten croosen van dien verschenen tsindert den XV^en meije XVI^e elfve, ende daer mede int voorn. godshuus ghedaen ende ghelesen te woordene twee messen in elcke wecke, te wetene elcken dijscendaeghe ende saterdaeghe, naer uuijtwijsen den testemente vander voorn. joncvrauwe; de welcke de provijngiereghen ghehauden sullen wesen te hooren ende bidden voor de siele vander gheverighe ende huere vrienden, metgaders voor de voochden ende besorghers. Ende zullen de voorn. voochden, over hemlieden ende huerlieder naercommers als voochden vanden voors. godshuuse, ghehauden sijn tselve ghetrauwelick te doen vulcommen, up peijne dat sowanneer datter sij vande voors. twee messen de wecke te doen lesen, het cros vande voors. rente sal gheapplicquiert ende gheemployert woorden tot proffijte

[p. 87]

vanden ghemeenen aermen deser stede; ghelijc ooc de voors. voochden ende huerlieder naercommers zullen ghehauden zijn, zo verre de voors. rente naermaels ghelost wierde, deselve wederomme anne te leghene ende de capitale pennijnghen te emploeijeren int coepen van eene ghelijcke rente ten effecte voorscreven. Ende up dat al tgone in toecommenden tijde niet en worde verdonckert, zo sal inde rekenijnghe vanden voors. godshuuse, int capitle van ontfanghe, danof ghelijc vande andere ghijfte ende fondatie van het derde broot ofte provene bijde voors. jo^e Jaeckemijne vander Boven metten voorn. wijlent haren man int voors. godshuus ghefondeert, partijculier declaratie ende verclaers ghedaen woorden; ende den voorn. Coolman, sijne hoeirs ende naercommers, als bij vriendelicke cessie ende updracht ghepasseert voor scepenen van ghedeele, trecht vercreghen hebbende vande voors. jo^e omme mette hoeirs vanden voorn. dheer Adolf van Havere, de voors. provene te ghevene ende stellen het derde vraukin neffens den voorn. voochden, te roupen over de voors. rekeninghe, omme te wetene of al tselve naer uuijtwijsen de voors. ghiften behoorlicke vulcommen ende gheeffectueert wordt...Dit was ghedaen den twee en twintichsten meije zesthien hondert twalefve...’

(Geteekend:) J. de Backere.