Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

XIV^bis.

⁺ 1459. - Chaertre van afwinnijnghen sprekende up den vors. tsaertre.

‘Wij, Jacop Hildebrant, als scoutheete ende wettelic maendre miins heeren mer Colaerts Vilayns in Assenede ambocht,...Anthonis Triest, Joos Diedolf ende Joos vanden Haudenvoorde, scepenen...doen te wetene...dat...Jan Baes ende Heynderic Smaud, als voochden ende machtich over Sente Jans huus ter Waelbrugghen binnen Gend, kenden ende lijeden dat zij hadden daen doen drie tsondaechs wettelike keregheboden ter vierscaren van Assenede ambacht, an eenen reep lants, ligghende binnen der prochien van Assenede up den waterganc, groot ziinde vijf ghemeten, lettel min of meer, met alden ghelaghen die daer up ziin ende toebehoren, daer Jan Martin ende ziin wijf up plaghen te wonene, naer thinhauden van eenen wettelicken tsaertre...An welken vorn. gront ende lant waren ghedaen drie tsondaechs wettelike kercgebode ter vierscaren van Assenede ambacht.....; al daer so camen de vorn. Jan Baes ende Heyndric Smaud, inden name als boven, daden toghen ende segghen hoe dat, tanderen daghen

+ F^o XIII v^o.

[p. 29]

ende tijden, Jacop de Vlascoopere ghecocht hadde ieghen den vorn. Jan Martin ende Lijsbette, Jan Callins dochtere, ziinen wetteliken wive, drie pont twalef scelle paris. tsiaers erveliker renten, te betalene te sulcken daghe ende met sulker ghij eltheere ende ghifte alsden tsaertere mencioen maect, duer den welken desen ghesteken ende gheinfixeert es; versochte den vorn. gront ghewijst te hebbene in hueren handen. Ende wij, scepenen vorn., ghemaent ziinde vanden scautheete boven ghenomt, ende naer tblijken vanden vorn. tsaertere, wijsden den vors. gront inden handen vanden vorn. voochden, svorn. godshuus behouf, tot ander stont dat yement quame die upleide alle achterstellen, wettelike costen, ende voort bleve staende inde toecommende rente. Omme dieswille dat de vorn. voochden niet en wisten wel ende te wat plaetsen de vorn. gront gheleghen was, mids der haudheden vanden vorn. tsaertere, begheerden anden scautheete te hebbene een wettelic besouc up den vorn. gront, te sulken daghe als scepenen redelic diincken zoude; wij, scepenen boven ghenomt, vanden scautheete ghemaent ziinde, wijsden den scautheete ende ons scepenen up tstic, teenen competenten daghe; ten welken daghe, quamen de voorn. voochden, daden tooghen ende segghen dat de vorn. rente ghiinc ende sculdich was te gane uuten daervorn. reepe lants..., daer of vermet legghende inden vorn. tsaertere ende andere notabele oorconden; waer up wij scepenen ghevisenteert hebben den tsaertere ende ghehoort hebben de vorn. oorconden toot achte notabele persoonen; ghemaent ende ghelast ziinde vanden scautheete, alsoot behoorde, wijsden den vorn. voochden, inden name als boven, te hebbene ende te behaudene de vorn, rente jaerlicx up den vorn. reep....Dit was ghedaen

[p. 30]

int iaer Ons Heeren duust vierhondert neghene ende vichtich, den twintichsten dach in april.’