Den gheheelen Bybel, Inhoudende het oude ende nieuwe Testament (Leuvense bijbel 1548)

1

⁺IUDAS een dienaer Iesu Christi, ende een broeder Iacobi, den beminden die in Godt den vader sijn, ende den behoudenen ende gheroepenen in Christo,

+ A

2

Bermherticheyt ende vrede, ende liefde sij in v lieden veruult.

3

Alderliefste ic alle neersticheyt doende om tot v lieden te scrijuen van v ghemeyn salicheyt heb moeten tot v scrijuen, biddende dat ghy volstandelijkck strijden wilt voor tghelooue dat eens den heylighen ghegheuen is,

4

Want daer sijn heymelijck inghecomen sommighe ongoddelijcke menschen (die langhe te voren bescreuen sijn gheweest in dit ordeel) die onser Godts gratie trecken ter oncuyscheyt, ende onsen eenighen heerscapper ende Heere Iesum Christum loochenen,

5

Maer ick wil v vermanen wetende eens alle dinghen hoe dat Iesus het volck wt den lande van Egipten verlossende, ten tweeden male vernielt heeft die ghene die niet ghelooft en hebben,

6

⁺Maer die Enghelen die hen heerlijcheyt niet behouden en hebben maer hebben hen woonstede verlaten, heeft hy ten ordeel vanden grooten dach met eewighen banden onder die duysterheyt ghehouden,

+ B

7

ghelijck Sodoma ende Gomorrha, ende die steden daer by ligghende, die in ghelijcker manieren oock oncuyscheyt bedreuen hadden, ende wech ghaende waren nae ander vleesch, sijn gheworden tot een exempel, lijdende die pijne des eewichs viers,

8

Desghelijcs ooc dese besmetten voorwaer het vleesch ende versmaden die heerscappie, ende blasphemeren die maiesteyt.

9

Doen die Archangel Michael met den duyuel disputerende keef van Moyses lichaem, soo en heeft hy hem niet dorren het ordeel der blasphemien oplegghen, maer hy heeft gheseydt. Die Heere ghebiede v,

10

Maer dese blasphemeren alle dat sij voorwaer niet en weten, maer alle dat sij van natueren als stomme beesten weten, daer in worden sij verdoruen.

11

Wee den ghenen die in Caims wech ghegaen sijn, ⁺ende door Balaams dolinghe om loon wtghestort sijn, ende in die wederspannicheyt van Core vergaen sijn,

+ C

12

Dese sijn smetten in hen brasserien, brassende sonder vreese, hen seluen voedende, wolcken sonder water, die vanden winden al om ghedreuen worden, herftsche boomen, onuruchtbaer, tweemael verstoruen, wtghewortelt,

13

wreede goluen der zee wtschuymende, hen selfs scanden, dolende sterren, den welcken dat stormende onweder der duysternissen bewaert is inder eewicheyt,

14

Ende van desen heeft ghepropheteert die seuenste van Adam Enoch segghende. Siet die Heere coemt in sijn heylighe duysenden,

15

om te doen ordeel teghen een ieghelijcken, ende om te strauen alle ongoddelijcke, van alle die wercken haerder ongoddelijcheden, waer mede sij ongoddelijck ghedaen hebben, ende van allen die harde woorden welck die ongoddelijcke sondaers teghen hem ghesproken hebben,

16

Dese sijn croonachtich murmureerders, nae hen lusten wandelende, ende haren mont spreect houerdie, wonderlijck seer achtende die persoonen ter saken van winninghen,

17

⁺Maer ghy alderliefste weest ghedachtich der woorden, die voorseyt sijn van die Apostelen ons Heeren Iesu Christi,

+ D

18

die welcke v lieden seyden datter in die wterste tijden comen sullen bedrieghers, nae hen begheerten wandelende in ongoddelijcheden,

19

Dit sijn sij die hen seluen afsceyden, vleeschelijcke menschen den gheest niet hebbende,

20

Maer ghy alderliefste timmerende v seluen op ons alderheylichste ghelooue, inden heylighen gheest biddende,

21

houdt v seluen in die liefde Godts, verwachtende die bermherticheyt ons Heeren Iesu Christi, ten eewighen leuen,

22

Ende dese verdoemde straft,

23

maer dandere maect salich die wten vier treckende, Maer den anderen weest bermhertich in vreesen, hatende oock den besmetten rock die vleeschelijck is,

24

Maer den ghenen die machtich is v te bewaren sonder sonde, ende te stellen voor daenschijn van sijnder glorien onbesmedt, met verhueghen, in die toecoemst ons Heeren Iesu Christi,

25

den eenighen Godt onsen salichmaker door Iesum Christum onsen Heere, sij glorie, ende grootdadicheyt heerlijcheyt, ende macht, voor alle tijden, ende nv, ende tot alle eewen der eewen AMEN.

Hier voleyndt die Epistel van Sint Iudas.