Den gheheelen Bybel, Inhoudende het oude ende nieuwe Testament (Leuvense bijbel 1548)

1

⁺DIE ouder Gaio den alderliefsten, dien ick lief hebbe inder waerheyt,

+ A

2

Alderliefste ick bidde dat ghy in alles soo wel moecht wandelen ende te passe sijn, als v ziele wel varende is.

3

Ick heb seer blijde gheweest als die broeders quamen ende ghetuyghenis gauen van uwer waerheyt, ghelijck ghi in die waerheyt wandelt.

4

Ick en heb gheen meerder gratie dan dese, dat ick hoore dat mijn kinderen in die waerheyt wandelen,

5

⁺Alderliefste ghy doet ghetrouwelijck al wat ghy doet aen die broeders, ende dat aen die pelgrims,

+ B

6

sij hebben ghetuyghenis ghegheuen uwer liefden voor daenschijn der kercken, ghy sult wel doen die gheleydende weerdelijc voor Godt.

7

Want om sijnen naem sijn sij ghereyst, niet ontfanghende van die Heydenen,

8

Daerom moeten wij sulcke ontfanghen, op dat wij mede werckers der waerheyt wesen moghen,

9

Ick soude by auontueren der kercken ghescreuen hebben maer Diotrepes die ouer hen bemint die ouerheyt te hebben, die en ontfanct ons niet,

10

⁺Daerom eest dat ick come soo sal ick sijn wercken openbaren die hy doet, met quade woorden snaterende teghen ons, ende als oft hem dese dinghen niet ghenoech en waren, soo en ontfanct hy die broeders niet, ende die ghene diese ontfanghen verbiedt hijt, ende worptse wter kercken,

+ C

11

Alderliefste en wilt niet nae volghen tquaet, maer dat goet is, Wie wel doet die is wt Gode, Wie qualijck doet die en heeft Godt niet ghesien.

12

⁺Demetrio wort ghetuyghenis ghegheuen van een ieghelijck ende van die waerheyt selue, ende wij gheuen oock ghetuyghenis, ende ghy weet dat ons ghetuyghenis warachtich is.

+ D

13

Ick heb veel ghehadt v te scrijuen, maer ick en hebs met inct ende penne v niet willen scrijuen,

14

Ick hope cortelijck v te sien ende dan sullen wij mont aen mont spreken,

15

Vrede sij v. Die vrinden groeten v, Groet die vrinden by name.

Hier voleyndt die derde Epistel van Sint Ian Apostel.