Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

+ 1

⁺MAer wy bidden v broeders doer die toecoemst onsen Heeren Christi, ende onser vergaderinghen in hem,

+ A

2

dat ghy v niet haestelijck en laet beweghen van uwen sin, noch en laet v niet veruaren, noch doer gheest, noch doer woerden, noch doer eenighen brief als van ons ghesonden, recht oft den dach des Heeren aenstonde.

3

Niemant en verleyde v in eenigher manieren. Want ten sij dat ierstmael den afval come, ende dat gheopenbaert worde die mensch der sonde, die sone des verlies,

4

die teghen strijdt ende opghehauen wort bouen alle dat Godt ghenoemt, oft voer Godt gheeert wort, alsoo dat hy in den tempel Godts sitte, vertoonende sij seluen als oft hy Godt ware.

5

⁺En hebdy niet onthouden dat ick (doen ick by v lieden noch was) dese dinghen v seyde?

+ B

6

Ende nu ghy weet wel wat hem achterwaerts houdt, op

[p. *890]

dat hy gheopenbaert soude worden te sijnen tijde,

7

(Want hy werct nu die verholentheyt der boosheyt, alleenlijck op dat hijt, die nu houdt) houdende blijue, tot dat hy vant midden wech ghenomen worde.

+ 8

Ende dan sal die boose gheopenbaert worden, den welcken die Heere Iesus dooden sal doer den gheest sijns monts, ende verderuen hem doer die verlichtinghe sijnder toecoemst.

* 9

⁺Des welcs toecoemst is na dat wercken van satanas, in alle lueghenachighe cracht ende teekenen ende wonderlijcheden,

+ C

10

ende in alle verleydinghe der boosheyt den ghenen die verloren gaen, om dat sij die liefde der waerheyt niet onfanghen en hebben, dat sij mochten salich sijn.

11

Daer om sal hen Godt toe seynden dwerc der dolinghen, dat sij gheloouen sullen der loghenen,

11

op dat sij alle gheordeelt moghen worden die der waerheyt niet ghelooft en hebben, maer consent ghegheuen hebben der boosheyt.

12

Maer wy moeten Gode dancken altijt voer v lieden broeders van Gode bemint, ⁺dat v Godt vercoren heeft voer dierste offeranden ter salicheyt, in die heylichmakinghe des gheests, ende int ghelooue der waerheyt,

+ D

13

tot het welcke hy v lieden oock gheroepen heeft doer ons euangelie, tot vercrijghinghe van die glorie ons Heeren Iesu Christi.

* 14

Hier om broders staet ende houdt die insettinghen die ghy gheleert hebt, het tsij doer woerden, tsij doer onsen brief.

15

Ende die selue onse Heere Iesus Christus, ende ons Godt, ende onse vader die ons bemint heeft, ende heeft den eewighen troost ghegheuen, ende die goede hope in die gratie

16

die vermane v lieder herten, ende verstercke die in alderley goede wercken ende woerden.