Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺GHy heeren doet uwen knechten dat recht ende ghelijck is, wetende dat ghy lieden eenen heere hebt inden hemel.

+ A

+ 2

Gheeft v stadelijc ten ghebede, wakende daer in, met danck segghinghen,

3

biddende te samen oock voor ons, dat Godt ons open doe die doore des woerts, om te spreken die verborghentheyt Christi (Waer om dat ick oock ghebonden ben)

4

om dat ict mach openbaren, alsoo ick dat behoir te spreken,

5

in wijsheyt wandelt tot die ghene die buyten sijn, den tijt waernemende.

6

⁺V woert sij altijt in gratie met sout ghemenghet, op dat ghy weten moecht hoe dat ghy eenen ieghelijcken antwoerden moet.

+ B

* 7

Die dinghen die my aengaen sal v al te kennen gheuen Tychicus die alderliefste broeder, ende ghetrouwe dienaer, ende mede knecht inden Heere,

8

den welcken ick tot v lieden ghesonden hebbe, om dat selue stuck, om dat hy weten soude, hoe dat met v lieden staet, ende dat hy v herten soude vertroosten

9

met Onesimo den alderliefsten ende ghetrouwen broeder, die van den uwen is. Alle dat hier ghesciet, sullen sij v te kennen gheuen.

10

Aristarchus mijn mede gheuanghen groet v, ende Marcus Barnabas neue, ⁺(vanden welcken ghy gheboden ontfanghen hebt. Eest dat hy tot v lieden coemt soe ontfanct hem)

+ C

11

ende Iesus die ghenoemt wort die gherechtighe die wter besnydenissen sijn. Dese sijn alleene mijn mede helpers int rijck Godts, die my tot solaes gheweest hebben.

12

V groet Epaphras die wt v lieden is, een dienaer Christi Iesu, altijt sorchuuldich voer v lieden metten ghebeden, op dat ghy moecht staende blijuen volmaect ende vol in alle Gods wille.

13

Want ic gheue hem ghetuygenis, dat hi veel arbeyts heeft voer v lieden ende voer die ghene die te Laodicien sijn, ende die te Hierapolen sijn.

14

⁺V lieden groet Lucas die medecijn die alderliefste, ende Demas.

+ D

15

Groet die broeders die te Laodicien, ende Nympham ende die kercke die in haer huys is.

16

Ende als by v lieden desen brief ghelesen is, soo maect dat dien oock in die kercke van die Laodicensen ghelesen worde, ende dien brief die den Laodicensen toebehoirt leest ghy lieden.

17

Ende segt Archippo. Siet aen den dienst den welcken ghy ontfanghen hebt inden Heere, dat ghy dien volbringhet.

18

Mijn groete met mijnder hant Pauli. Weest ghedachtich mijnder banden. Die gratie sij met v lieden. Amen.

Hier voleyndt die Epistel van Sinte Pauwels totten Colossensen.