Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺HET visioen van Abdias. Dit seyt die Heere Godt tot Edom. Wy hebben een ghehoor ghehoort vanden Heere, ende hy heeft eenen bode tot die heydenen ghesonden. Staet op, ende laet ons te samen teghen hem op staen ten strijde.

+ A

2

Siet ick heb v cleyn ghemaect onder die Heydenen, ghy sijt seer versmadelijck.

3

Die hoouerdie ws herten heeft v op ghehauen die daer woont in die spleten der steenroetsen, die uwen stoel verheft, die in v herte segt. Wie sal my nedertrecken ter eerden?

4

⁺Ist dat ghy verhauen wordet als eenen arent, ende ist dat ghy tusschen die sterren uwen nest stelt, van daer sal ick v neder trecken, seyt die Heere,

+ B

5

Waert dat die dieuen tot v inghegaen waren, oft die mordenaers inder nacht, hoe soudi stil ghesweghen hebben? en souden sij niet ghestolen hebben dat henlieden ghenoech gheweest hadde? Hadden die wijnsnijders tot v inghegaen, en souden sij v te minsten niet een druyfken achterghelaten hebben?

6

Hoe hebben sij Esau doersocht, ende sijn verborghentheden ondersocht?

7

Totten eynde hebben v alle die mannen ws verbonts wt ghesonden, sij hebben v bespot, die mannen ws vreedts hebben douerhant ghehadt teghen v, die met v eten sullen laghen legghen onder v, ⁺in hem en is gheen wijsheyt.

+ C

8

En sal ick niet op dien dach (seyt die Heere) die wijse van Idumeen te niet doen, ende die voersienicheijt vanden berch Esau?

9

Ende v stercke sullen vreesen vanden suyden op dat die man vergae van den berch Esau.

10

Om die doodinghe, ende om die boosheyt teghen uwen broeder Iacob, sal v die bescaemtheyt ouerdecken, ende ghy sult inder eewicheyt vergaen.

11

Inden dach als ghy teghen hem stont, als die vreemde sijn heyr vinghen, ende die buyten landers binnen sijn poorten ghinghen, ende op Ierusalem het lot wierpen, soo waert ghy oock als een van dien.

12

Ende ghy en sult niet versmaden in ws broeders dach, ⁺in den dach van zijnder pelgrimmagien, ende ghy en sult v niet verblijden op die kinderen van Iuda, inden dach van hen verderffenisse, ende ghy en sult uwen mont niet groot

+ D

[p. *700]

maken inden dach der benautheden.

13

Noch ghy en sult in mijns volcs poorte niet gaen, inden dach van haerlieder val, noch ghy en sult oock niet versmaden in hen quaden in den dach van zijn verwoestinghe, ende ghy en sult niet wtghesonden werden inden dach van hen verwoestinghe.

14

⁺Noch ghy en sult niet staen in die wtganghen der weghen, dat ghy die soudt dootslaen die vlieden, ende ghy en sult haer bleuelinghen niet bestuyten inden dach der tribulacien.

+ E

15

Want des Heeren dach is nae by op alle die Heydenen, alsoo ghy ghedaen hebt soo sal v ghescieden, v vergheldinghe sal hy v wederom keeren op v hooft.

16

Want ghelijck ghy ghedroncken hebt op mijnen heylighen berch, soo sullen alle die Heydenen ghestadelijck drincken, ende sij sullen drincken, ⁺ende opsuypen, ende sij sullen wesen als oft sij niet en waren.

+ F

17

Ende op den berch van Sion sal behoudenisse wesen, ende hy sal heylich wesen, ende thuys van Iacob salse besitten, die hen beseten hadden.

18

Ende Iacobs huys sal een vier wesen, ende Iosephs huys een vlamme, ende thuys van Esau stoppele, ende sij sullen doer henlieden ontsteken worden, ende sij sullense verslinden, ende des huys van Esau en sullen gheen bleuelinghen wesen, want die heere heuet ghesproken.

19

⁺Ende dese die ten suyden zijn sullen den berch van Esau tot een erue besitten. Ende die in die veltachtighe plaetsen zijn van die Philistijnen. Ende sij sullen besitten dat lantscap van Samarien, ende Beniamin sal Galaad besitten.

+ G

20

Ende die ouer voeringhe van dit heyr der kinderen van Israel, sal alle der Cananeen plaetsen besitten tot Saraptam toe, ende die ouervoeringhe van Ierusalem die in Bosphoren is sal die steden van tsuyden besitten.

21

Ende die salichmakers sullen opclimmen op den berch van Sion, om te ordeelen den berch van Esau, ende dat rijck sal den Heere toebehooren.

Hier voleynt die Propheet Abdias.