Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lxiij. Capittel.

1

⁺VIe is dese die daer coemt van Edom met gheuerwede cleederen van Bosra, dese scoone in sijn lanc cleet gaende in die menichfuldicheyt sijnder stercheyt? Ick ben die rechtuerdicheyt spreke, ende ick ben een vooruechter om te behouden.

+ A

2

Waerom is dan v cleedt root, ende v cleederen als der gheender die in die wijnpersse treden?

3

Die wijnpersse heb ick alleen ghetreden, ende vanden volcken en is gheen man met my, ick hebse ghetreden in mijn rasende gramscap, ende ick hebse vertreden in mijnen toren, ende hen bloet is ghesprengt op mijn cleedt ende ick heb alle mijn cleederen besmedt,

4

want den dach der wraken is in mijn herte, het iaer mijns vergheldens is comen.

5

Ick heb al omme ghesien, ende daer en was gheen helper, ick heb ghesocht ende daer en was niemant die hielp, ende mijnen arm heeft my salicheyt ghedaen, ⁺ende mijn verbolghentheyt die heeft my gheholpen.

+ B

6

Ende ick heb die volcken in mijn rasende gramschap vertreden, ende ick hebse droncken ghemaect in mijn verbolghentheyt, ende ic heb hen cracht ter eerden neder ghetrocken.

7

Des Heeren bermherticheden sal ick ghedencken, den lof des Heeren ouer alle dat ons die Heere vergouden heeft, ende op die menichte der goden den huyse van Israel die hy hen ghegheuen heeft nae sijn ghenadicheyt, ende na die menichte sijnder bermherticheden.

8

Ende hy heeft gheseyt. Maer nochtans het is mijn volck, kinderen niet missakende, ende hy is hen gheworden een salichmaker.

9

In alle hen tribulatie en is hij niet ghetribuleert geweest, ende die engel sijns aensichts heeftse behouden, in zijn liefde, ende in sijn ghenadicheyt heeft hijse selue verlost, ende hi heeftse ghedraghen, ende opghehauen alle die daghen der eewen.

10

⁺Maer si hebben tot gramschap verwect, ende hebben ghequelt den gheest van sijnen heylighe, ende hy is hen verkeert tot eenen viant, ende hy heeftse bestreden.

+ C

11

Ende hy heeft ghedachtich gheweest der daghen van Moyses eeuwe, ende van sijnen volck. Waer is hy diese wtgheleydt heeft wter zee met die herders van sijn cudde? waer is hy die int midden van hen ghestelt heeft den gheest van sijnen heylighe?

12

Die aen die rechte hant Moysen wt gheleydt heeft metten arm van sijnder maiesteyt, die de wateren ghedeylt heeft voor hen, om dat hy hem seluen maken soude eenen eewighen naem.

13

Die hen gheleyt heeft door die affgronden als een peert in die woestijne niet struykelende.

14

Als een beeste int velt nederwaerts gaende, den gheest des Heeren heeft sijn leytsman gheweest, alsoo hebdi v volc aenghebracht, op dat ghy v seluen maken soudt eenen naem der glorien.

15

⁺Merct aen vanden hemel, ende siet van uwer heyligher woonstede, ende uwer glorien, waer is v gramme liefde ende v stercheyt, die menichte van uwer binnester hertelijcheyt ende uwer bermherticheden, ouer my hebben die hen seluen onthouden,

+ D

16

want ghy sijt onse vader, ende Abraham en heeft ons niet ghekent, ende Israhel en heeft ons niet gheweten, ghy Heere sijt ons vader, ons verlosser, van die eewicheyt is uwen naem.

17

Waerom hebdi ons Heere doen dolen van uwen wegen? ende hebt onse herte verhart dat wi v niet vreesen en souden? Keert v wederom om uwe dienaren, het gheslachte van uwer erffenisse.

18

Als voor niet hebben sij v heylich volck beseten, onse vianden hebben v heylichmakinghe vertreden,

19

Wij sijn gheworden als int beghinsel, als ghy ouer ons gheen heerschappie en hadt, nocht uwen naem ouer ons niet aengheroepen en was.