Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺VVie onderwisinghe bemint die bemint wetenheyt, maer wie straffinghen haet die is onwijs.

+ A

2

Die goet is sal gratie sceppen van den Heere, maer die hem betrout op sijn ghedachten doet ongoddelijck.

3

Gheen mensch en sal ghesterct worden van ongoddelijcheyt, ende die wortel der rechtuerdigher en sal niet beruert worden.

4

Een naerstighe vrouwe is een croone haren man, ende etter in sijn ghebeente is een vrouwe die dinghen doet die der bescaemtheyt weerdich sijn.

5

Die ghedachten der rechtuerdigher sijn ordeelen, ende die raden der ongoddelijcker zijn bedriechelijck.

6

Die woorden der ongoddelijcker legghen laghen den bloede, den mont der rechtuerdiger salse verlossen.

7

Keert omme die ongoddelijcke ende sij en sullen niet sijn, maer thuys der rechtuerdigher sal altijt blijuen.

8

⁺Door sijn leeringhe wort een man bekent, maer die ydel ende ontsinnich is sal versmaedt worden.

+ B

9

Beter is een arm mensch ende voor hem seluen ghenoech hebbende, dan een glorioos ende broots ghebreck lijdende.

10

Die rechtuerdighe kent die zielen van sijnen behelpighen beesten, maer die binnensten der ongoddelijcken sijn wreet.

11

Die sijn lant bouwet, sal met brooden versaet worden, maer wie ledicheyt volcht die is dalder sotste. Die suet is in die maticheden van wijne, in sijn vaste plaetsen sal hy lachter achter laten.

12

Die begheerte des ongoddelijcks is een ghedenckenisse der alder quaetster, maer die wortel der rechtuerdiger sal toenemen.

13

⁺Om die sonden der lippen naket eenen val den quade, maer die rechtuerdighe ontuliet vander benautheyt.

+ C

14

Van die vrucht sijns monts sal een ieghelijck met goeden versaedt worden, ende nae die wercken sijnder handen sal hem wederom ghegheuen worden.

15

Den wech vanden sot is recht in sijn ooghen, maer die wijs is hoort die raden.

16

Een dwaes toont ter stont sijn gramscap, maer die hem ghelaet als oftmen hem gheen onrecht en dede die is scalck.

17

Wie spreect dat hy weet, die is een richter der gerechticheyt, maer wie liecht die is een bedrieghelijc ghetuych.

18

Daer is een die beloeft, ende hy wort ghesteken als met eenen swaerde der conscientien, maer die tonghe der wijser is ghesontheyt.

19

Een lippe der warachticheyt sal vast sijn eewelijck, maer die een haestich ghetuyghe is, voecht te samen een laghen tonghe.

20

⁺Bedroch is int herte der gheender die quaet dencken, maer den ghenen die raden des vreeds aen nemen volcht blijscap.

+ D

21

Ten sal den rechtuerdighen niet bedroeuen al wat hem gheschiedt, maer die ongoddelijcke sullen veruult worden met quaet.

22

Een afgrijselijcheyt eest voor den Heere loghenachtighe lippen, maer die ghetrouwelijck doen, behaghen hem.

23

Een scalck mensche verbercht die wetenheyt, ende therte der onwijser verwect die dwaesheyt.

24

Die hant der stercker sal heerscappie hebben, maer die slap is sal den tribuyten dienen.

25

Truericheyt in eens mans herte sal hem verootmoedighen, ende met een goede redene sal hy verblijdt worden.

26

Wie sijn scade niet en acht om sijnen vrint die is rechtuerdich, maer den wech der ongoddelijcker sal hen bedrieghen.

27

Die bedrieghelijcke en sal gheen winninghe vinden, ende die rijckdom van eenen mensch sal sijn een waerde van goude.

28

Inden padt der rechtuerdicheyt is dleuen, maer den dwael wech leydt ter doodt.