Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xxxviij. Psalm.

Domine probasti.

1

HEere ghy hebt my gheproeft, ende my ghekent,

2

ghy hebt mijn sitten ghekent, ende mijn opstaen.

3

Ghy hebt mijn ghedachten ghekent van verre, mijnen padt, ende mijn seelken hebdi ondersocht.

4

Ende alle mijn weghen hebdi te voeren ghesien, want daer en is gheen sprake in mijn tonghe.

5

Siet Heere ghy hebt ghekent alle die laetste, ende onde dinghen, ghy hebt my ghemaect, ende op my hebdi v hant gheleyt.

6

Wonderlijck is v wetenheyt gheworden wt my, sij is groot gheworden, ende ick en sal daer toe niet connen gheraken.

7

Waer henen sal ick gaen van uwen gheest? oft werwaerts sal ick van uwen aensicht vlieden?

8

Eest dat ick inden hemel climme daer sijdi, eest dat ick nederdale ter hellen daer sijdi teghenwoerdich.

9

Eest dat ick mijn vederen neme des morghens vroech, ende gae woonen aen dat wterste der zee.

10

Soe sal nochtans v hant my derwaerts leyden, ende v rechte hant sal my houden.

11

Ende ick heb gheseyt, bijauontueren sullen my die duysternissen vertreden, ende den nacht is mijn verlichten in mijn wellusten.

12

Want die duysternissen en sullen van v niet verduystert worden, ende den nacht sal als den dach verlicht worden, ghelijck sijn duysternissen, alsoe sal oock sijn licht sijn.

[p. *490]

13

Want ghy hebt mijn nieren beseten, ghy hebt my opghenomen van mijns moeders lichaem.

14

Ick sal v belijden want ghy sijt veruaerlijcke groot gheworden, wonderlijck sijn v wercken, ende mijn ziele salse bekennen wter maten seere.

15

Mijn ghebeente en is niet verborghen voer v dwelck ghy ghemaect hebt int heymelijck, ende mijn substancie in dat onderste der eerden.

16

Mijn onvolmaectheyt hebben v ooghen aensien, ende in uwen boeck sullen sij alle ghescreuen worden, die daghen sullen ghemaect worden, ende niemant daer inne.

17

Maer v vrienden sijn my wtermaten seer eerlijck gheworden o Godt, wtermaten seer is hen heerlijcheyt versterct.

18

Ick salse tellen, ende sij sullen bouen dat sandt der zee vermenichfuldicht worden, ick ben opghestaen, ende noch ben ick met v.

19

Eest dat ghy Godt die sondaren doodt, soe gaet ghy bloedighe mannen van my.

20

Want ghy segghet int ghedachte, sij sullen in ydelheden hen steden ontfanghen.

21

En heb ick Heere niet ghehaet die ghene die v haetten, ende en verdwijnde ick niet op v vianden?

22

Met volcomen haet haette icse, sij sijn my vianden gheworden.

23

Proeft my Godt ende weet mijn herte, vraecht my ende bekent mijn paden.

24

Ende besiet oft den wech der boosheyt in my is, ende leydt mij inden eewighen wech.