Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xxxi. Psalm.

Memento Domine.

1

GHedenct Heere Dauids, ende alle sijnder saechtmoedicheyt.

2

Ghelijck hy ghesworen heeft den Heere, ende een belofte beloeft Iacobs Godt.

3

Eest dat ick gae int tabernakel mijns huys, eest dat ick climme opt bedde van mijnder rustplaetsen.

4

Eest dat ick mijnen ooghen slaep gheue, ende mijnen wijmbrauwen sluymeringhe.

5

Ende ruste den slaep mijns hoofts tot dat ick vinden sal een plaetse voer den Heere, een tabernakel voer den Godt van Iacob.

6

Siet wy hebben haer ghehoort in Ephrata, wy hebben haer gheuonden in die velden des wouts.

7

Wy sullen gaen in sijn tabernakel, wy sullen aenbidden in die plaetse daer sijn voeten ghestaen hebben.

8

Staet op Heere in v ruste, ghy ende die arcke van uwer heylighinghen.

9

V priesters laet aenghedaen worden met rechtuerdicheyt ende v heylighen laet verhueghen.

10

Om Dauid uwen knecht, en keert niet aff daensicht van uwen ghesalfden.

11

Die Heere heeft Dauid die waerheyt ghesworen ende hy en sal hem niet bedrieghen, vanden vrucht ws lichaems sal ick stellen op uwen stoel.

12

Eest dat v kinderen bewaren mijn testament, ende dese mijne ghetuyghenissen, die ick hen leeren sal.

Ende hen kinderen tot inder eewicheyt, sullen sitten op uwen stoel.

13

Want die Heere heeft Sion vercoren, hy heeftse vercoren tot een wooninghe voer hem seluen.

14

Dits mijn ruste inder eewicheyt der eewicheden hier sal ick woonen, want ick heb dese vercoren.

15

Haer weduwe sal ick ghebenedijende ghebenediden, haer arme sal ick versaden met brooden.

16

Haer priesters sal ick cleeden met salicheyt, ende v heyleghen sullen met een verhueghen hen verhueghen.

17

Derwaerts sal ick voertsbrenghen den horn van Dauid, ick heb een lichtvat bereydt mijnen ghesalfden.

18

Sijn vianden sal ick cleeden met bescaemtheden, maer op hem sal bloeyen mijn heylichmakinghe.