Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxxxv. Psalm.

Inclina Domine aurem tuam.

1

NEycht Heere v oore, ende verhoort my, want ick ben ghebreckelijck ende arm.

2

Bewaert mijn ziele want ick ben heylich, maect ghesont uwen knecht, mijn Godt, die in v hopende is.

3

Ontfermt v mijnder Heere want ick heb tot v gheroepen den gheheelen dach

4

verblijdt die ziele ws dienaers, want ic heb tot v Heere mijn ziele opghehauen.

5

Want ghy Heere sijt soet ende saechtmoedich, ende veel van bermherticheden allen den gheuen die v aenroepen.

6

Metten ooren vaet Heere mijn ghebedt, ende aenmerct mijn ootmoedighe begheerte.

7

Inden dach mijns lijdens heb ick tot v gheroepen, want ghy hebt my verhoort.

8

Daer en is ws ghelijck in die Goden niet Heere, ende daer en is niemant ghelijck uwen wercken.

9

Alle die Heydenen die ghy ghemaect hebt, sullen comen, ende aenbidden voor v Heere, ende uwen naem glorificeren.

10

Want ghi sijt groot ende doende wonderlijcke dinghen, ghy sijt Godt alleen.

11

Leydt my Heere tot in uwen wech, ende laet my wandelen in v waerheyt, laet mijn herte hem verblijden op dat uwen naem mach vreesen.

12

Ick sal v belijden Heere mijn Godt met mijn gheheel herte, ende ick sal uwen naem glorificeren inder eewicheyt.

13

Want v bermherticheyt is groot ouer my, ende ghy hebt mijn ziele verlost wt die onderste helle.

14

Godt die boose sijn teghen my opghestaen, ende die vergaderinghe der machtigher hebben mijn ziele ghesocht, ende sij en hebben v niet voor ghesteldt in hen aensicht.

15

Ende ghy Heere Godt ghenadich ende bermhertich, lijdtsamich ende van vele bermherticheden ende warachtich.

16

Siet op my ende ontfermt v mijnder, gheeft v ghebodt uwen dienaer, ende maect salich den sone uwer dienstvrouwen.

17

Doet met my een teeken int goede, op dat sijt sien moghen die my haten, ende bescaemt worden, want ghy Heere hebt my gheholpen, ende my ghetroost.