Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxxiij. Psalm.

Vt quid Deus.

1

GOdt waer om hebt ghy wech ghestooten totten eynde, ende waer om es gram uwen rasenden torn op die scapen uwer weyden?

2

Weest ghedachtich uwer vergaderinghen, die welcke ghy beseten hebt vanden beghinne.

Ghy hebt verlost die roede van uwer erffenissen, den berch Sion daer ghy in ghewoont hebt.

3

Heft op v handen op hen houerdicheden totten eynde, hoe groote quaetheden heeft die viant ghedaen in die heylighe plaetse?

4

Ende sij hebben gheglorieert die v haten, int midden van uwer hogher feesten.

Sij hebben hen selfs teekenen ghestelt tot teekenen,

5

ende sij en hebben niet bekent als inden wtganck opt hoochste.

Als int bossch der boomen hebben sij met bijlen

6

haer doeren tsamen wt ghehouwen, met een bijl ende een aexe hebben sij die neder gheworpen.

7

Sij hebben metten vier verbrant v heylighe plaetse, in die eerde hebben sij besmet dat tabernakel ws naems.

8

Sij hebben in hen herte gheseyt hen maeschap te samen, laet ons doen rusten alle Godts feestdaghen vander eerden.

9

Ons teekenen en hebben wy niet ghesien, daer en is nu gheen propheet ende hy en sal ons niet meer kennen.

10

O Godt hoe langhe sal die viant verwijten, ende die teghenpartijder uwen naem creyten totten eynde?

11

Waer om keerdi v handt aff ende v rechte handt, wt dat midden van uwen schoodt totten eynde?

12

Maer Godt ons coninck voer die eewen, heeft salicheyt ghewracht int midden der aerden.

13

Ghy hebt in v macht versterct die zee, ghy hebt tsamen ghebroken die hoofden der draken in die wateren.

14

Ghy hebt ghebroken die hoofden des draecs, ghy hebt hem ghegheuen tot een spijse den volcken der Morianen.

15

Ghy hebt ouermidts gheschoort die fonteynen ende beken, ghy hebt ghedroocht die vloeden van Ethan.

16

Vwe es den dach ende uwe es den nacht, ghy hebt ghemaect den dagheraert ende die sonne.

17

Ghy hebt ghemaect alle die eynden der aerden, den somer ende voersomer hebdi ghescapen.

18

Weest des ghedachtich, die viant heeft den Heere bescimt, ende een dwaes volck heeft uwen naem tot gramscappen verwect.

19

En leuert den beesten niet die zielen die v belijden, ende die zielen van uwen armen en vergheet niet totten eynde.

20

Siet toe op v verbont, want sij zijn veruult met den huysen der boosheyt die met der aerden verduystert zijn.

21

En laet den ootmoedighen niet aff ghekeert worden, als hy bescaemt gheworden is, die arme ende behoeuighe sullen uwen naem louen.

22

Staet op Godt, ordeelt v sake, weest ghedachtich uwer verwijtinghen, der gheender die vanden onwijsen ghescieden den gheheelen dach.

23

En vergheet niet die stemmen van uwen vianden, die houerdie der gheender die v haten climt altijt.