Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lij. Psalm.

Dixit Insipiens.

1

DIe onwijse heeft gheseyt in sijn herte, Godt en is niet.

2

Sij sijn verdoruen, ende affgrijselijc gheworden in boosheden daer en is niemant die goet dede.

[p. *460]

[afbeelding]

3

Godt heeft vande hemel wtghesien op die kinderen der menschen, om te sien ofter iemant verstandich is oft Godt soekende.

4

Sij sijn allegader affgheweken, te samen sijn sij onnut gheworden, daer en is niemant die goet doet, daer en is niemant tot eenen toe.

5

En sullen sijt alle niet weten die boosheyt wercken, die mijn volck verslinden als een spijse des broots?

6

Sij en hebben Godt niet aengheroepen, sij hebben daer ghebeeft van vreesen daer gheen vreese en was.

Want Godt heeft die beenderen verstroyt vanden ghenen die den menschen behaghen, sij sijn bescaemt, want Godt heeftse versmaet.

7

Wie sal wt Sion gheuen den salichmakere van Israel? als Godt sal wederom ghekeert hebben die gheuanghenisse van sijnen volcke, dan sal Iacob verhueghen, ende Israel blijde sijn.