Den gheheelen Bybel, Inhoudende het oude ende nieuwe Testament (Leuvense bijbel 1548)



Den .xlvij. Psalm. Magnus Dominus.
1[2] GRoot is die Heere, ende loffelijck bouen maten, in die stadt ons Godts, in sijnen heylighen berch.
2[3] Den berch Sion wort ghefundeert met verhueghen van gheheel aertrijck die syden van noorden een stadt des grooten conincs.
3[4] God sal in haer huysen bekent sijn, als hy haer ontfanghen sal.
4[5] Want siet die coninghen der aerden sijn vergadert, sij sijn tsamen ouer een ghecomen.
5[6] Sij dit siende sijn alsoe verwondert, sij sijn verbaest gheworden, ende beroert,
6[7] een beuinghe heeftse beuanghen. Daer sijn pijnen als der gheender die in barens noot sijn,
7[8] doer eenen crachtighen wint suldi in stucken breken die scepen van Tharsis.
8[9] Ghelijck wy ghehoort hebben alsoe hebben wy ghesien in die stadt van den Heere der heyrcrachten, in die stadt ons Godts, Godt heeftse ghefundeert inder eewicheyt.
9[10] Godt wy hebben ontfanghen v bermherticheyt, int midden van uwen tempel.
10[11] Ghelijck uwen naem Godt alsoe is uwen loff in die eynden der eerden, v rechte hant is vol rechtuerdicheden.
11[12] Den berch Sion verblijde hem, ende die dochteren van Iuda moeten hen verhueghen, om uwe ordeelen Heere.
12[13] Gaet rontsomme Sion, ende omuanchtse, vertellet in haer torrens.
13[14] Stelt v herten in haer cracht, ende bedeylt haer huysen, dat ghijt vertellen moecht int ander geslachte
14[15] > Want dit is Godt, ons Godt inder ewicheyt ende in die eewicheyt der eewicheden, hy sal ons regeren inder eewicheyt.