Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xvi. Psalm.

Exaudi Domine iustitiam.

1

VErhoort Heere mijn rechtuerdicheyt, slaet gade mijn ghebedt.

Metten ooren vaet mijn ghebedt, niet met bedrieghelijcker lippen.

2

Van uwen aensicht laet mijn ordeel voort comen, laet v ooghen sien die gherechticheden.

3

Ghy hebt mijn herte gheproeft, ende dat besocht des nachts, metten viere hebdi my ondersocht, ende gheen boosheyt en is in my gheuonden.

4

Op dat mijnen mont niet en spreke der menschen wercken, om die woorden uwer lippen heb ick harde weghen bewaert.

5

Volmaect mijn ghangen in v paden, dat mijn voetstappen niet beroert en werden.

6

Ic heb gheroepen want ghi God hebt my verhoort, neycht v oore te mywaerts, ende verhoort mijn woorden.

7

Maect wonderlijck v bermherticheden, ghy die salich maect die ghene die in v hopen.

8

Vanden ghenen die uwer rechter hant wederstaen bewaert my, als den appel vander ooghen.

Onder die scaduwe van uwen vloghelen bewaert my,

9

van daensicht der ongoddelijcken die my ghepijnicht hebben.

Mijn vianden hebben mijn ziele omringhet,

10

hen vet hebben sij ghesloten, haren mont heeft hoouerdie ghesproken.

11

My verworpende hebben sij my nv omringet, hen ooghen hebben sij opghesteldt ter aerden te neyghen.

12

Sij hebben my ontfanghen als eenen leeuw bereyt totten rooue, ende als een welpen vanden leeuwe woonende in verborghen plaetsen.

13

Staet op Heere ende verrascht hem, ende treedt hem onder die voeten, verlost mijn ziele van den ongoddelijcke,

14

v sweert van die vianden uwer hant.

Heere sceydtse van die luttel menschen vander eerden in hen leuen, ende van uwen verborghentheden is haren buyck veruult.

Sij sijn versaet van kinderen, ende sij hebben hen bleuelinghen ghelaten haren cleynen kinderen.

15

Maer ick sal in rechtuerdicheyt my vertoonen uwen aensicht, ick sal versaet worden als v glorie haer openbaert.