Den gheheelen Bybel, Inhoudende het oude ende nieuwe Testament (Leuvense bijbel 1548)

Davids iersten Psalm.

Beatus vir.

1

SAlich is die man die niet wech ghegaen en is in den raet der ongoddelijcker, ende in der sondaren wech niet en heeft ghestaen, noch inden setel der pestilencien gheseten.

2

Maer in die wet des Heeren is sijnen wille, ende in sijn wet sal hy ouerdencken dach ende nacht.

3

Ende hy sal sijn ghelijck een hout dat gheplant is aen die vloeden der wateren, dat sijn vrucht sal gheuen te sijnen tijde.

Ende sijn loof en sal niet afvallen, ende al wat hy doen sal dat sal voerspoedich wesen.

4

Alsoe niet die ongoddelijcke, alsoe niet, maer ghelijck dat stof dwelck den wint worpt van daensicht der aerden.

5

Daer om en staen die ongoddelijcke niet op int ordeel, noch die sondaers inden raet der rechtuerdigher.

6

Want die Heere kent den wech der rechtuerdigher, ende den wech der ongoddelijcker sal vergaen.