Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlij. Capittel.

1

⁺ENde Iob den Heere antwoerdende heeft gheseyt,

+ A

2

Ick weet wel, dat ghy alle dinck vermoecht, ende dat gheen ghedachte voer v verberghen en is.

3

Wie is dese die den raet verbercht sonder wetenheyt? daer om heb ick onwijselijck ghesproken, ende dinghen die bouen maten mijn kennisse te bouen ghinghen.

4

Hoort, ende ick sal spreken, Ick sal v vraghen, ende thoonet my,

5

Met dat ghehoor der ooren heb ick v ghehoort, maer nu siet v mijn ooghe.

6

Daer om straffe ick my seluen, ende doe penitencie in voncken ende in asschen.

7

Ende nae dat die Heere dese woerden ghesproken hadden tot Iob, soo heeft hy gheseyt tot Eliphaz den Themaniter. Mijn verbolghentheyt is gram op v ende op v twee vrienden, want ghy en hebt voer my niet recht ghesproken ghelijck mijn knecht Iob.

8

⁺Daer om neemt voer v lieden seuen stieren, ende seuen rammen, ende gaet tot mijnen knecht Iob ende offert brantoffere voer v lieden. Ende Iob mijn dienaer sal voer v lieden bidden, sijn aensicht sal ick ontfanghen, dat v die dwaesheyt niet gherekent en worde tot scult. Want ghy en hebt tot my gheen rechte woerden ghesproken, ghelijck mijn knecht Iob.

+ B

9

Hier om sijn wechghegaen Eliphaz die Themaniter, ende Baldad die Suhiter, ende Soghar die Naamaniter, ende sij hebben ghedaen ghelijck die Heere tot hen gheseyt hadde.

10

Ende die Heere heeft Iobs aensicht ontfanghen. Ende die Heere is oock ommeghekeert tot Iobs penitencie, doen hy badt voer sijn vrienden. ⁺Ende die Heere heeft Iob alle dat hy ghehadt hadde tweeuout weder om ghegheuen.

+ C

11

Ende tot hem sijn ghecomen alle sijn broeders, ende alle sijn susters, ende alle die hem te voren kenden, ende sij hebben met hem broot gheten in sijn huys, ende sij hebben op hem haer lieden hooft gheroert, ende hem vertroost van alle tquaet dat die Heere ouer hem ghebracht hadde.

Ende sij hebben hem ghegheuen een ieghelijck een scaep, ende eenen gulden oorinck.

12

Ende die Heere heeft Iobs laetsten ghebenedijt meer dan sijnen beghinsel. Ende hy heeft ghecreghen veerthien duysent scapen, ⁺ende ses duysent kemels, ende duysent paer ossen, ende duysent eselinnen.

+ D

13

Ende hy heeft ghehadt seuen sonen, ende drij dochteren.

14

Ende hy heeft den naem van deen dochter ghenoemt. Dies ende den naem vander tweeder Cassia, ende den naem vander derder Cornustibij.

15

Ende daer en sijn gheen vrouwen gheuonden soo schoon ghelijck Iobs dochteren in alle dlant. Ende haer vader gaff hen erffenisse onder hen broeders.

16

Ende Iob heeft nae dese ghesciedenissen gheleeft hondert ende veertich iaren, ende heeft sijn kinderen ghesien, ende die kinderen van sijnen kinderen totter vierder generatien toe, ende hy is ghestoruen out, ende vol daghen.

Hier eyndt dat boeck van Iob.