Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde die woorden van Tobias sijn voleyndt. Ende nae dat Tobias verlicht was, so heeft hy gheleeft tweenveertich iaren, ende hy heeft ghesien die kinderen van sijns soons kinderen,

+ A

2

Ende als hy hondert ende twee iaren voleynt hadde soo is hy eerlijck begrauen in Niniue.

3

Want sessenvijftich iaren out sijnde verloos hy dlicht van sijnen ooghen, ende ten sestichsten iare heeft hy dat weder ghecreghen.

4

Ende den anderen tijt sijns leuens was hy in blijscappen, ende met goeden voortganck der vreesen Gots, is hy ghereyst in vrede.

5

Maer in die vre sijnder doot heeft hy tot hem gheroepen Tobiam sijnen sone, ende seuen ionghelinghen sijns soons kinderen, ende seyde tot hen.

6

Die verderfenisse van Niniue sal naken, want het woort des Heeren en is niet veruallen, ende ons broeders die verstroyt sijn vanden lande van Israel sullen daer toe wederkeeren.

7

⁺Ende allen haer verlaten lant sal veruult worden, ende dat huys Gods dat daer in verbrant is, sal wederom ghetimmert worden, ende aldaer sullen wederkeeren alle die godtvreesende,

+ B

8

ende die heydenen sullen hen affgoden verlaten, ende comen in Ierusalem, ende sy sullen daer in woonen,

9

ende daer in sullen blyscap maken alle die coninghen der aerden, aenbiddende den coninck van Israel.

[p. *406]

10

Hierom mijn kinderen hoort uwen vader. Dient den Heere in die waerheyt, ende soect dat ghij doet tghene dat hem wel behaghende is.

11

⁺Ende uwen kinders ghebiedt, dat sij rechtuerdicheden ende almoessen doen, op dat sij Gods ghedachtich sijn, ende hem ghebenedijden tot allen tijden inder waerheyt, ende in allen hen cracht.

+ C

12

Daerom nv ghij kinderen hoort mij, ende en wilt hier niet blijuen, maer op wat dach dat ghij v moeder sult begrauen hebben neffens mij in een graf, van dien dach soo scict v voetstappen om van hier wt te gaen,

13

want ick sie dat deser stadt boosheyt, haer een eynde gheuen sal.

14

Ende tis ghesciet nae sijns moeders doot, dat Tobias wech ghegaen is wt Niniue, ⁺met sijn huysvrouwe ende kinderen, ende sijnder kinderen kinderen, ende hij is weder ghekeert tot sijns wijfs ouders,

+ D

15

ende hij heeftse gheuonden weluarende in goeden ouderdom, ende hij heeftse besorcht, ende hij heeft hen ooghen ghesloten, ende alle die erffenisse van Raguels huys heeft hi ontfanghen, ende hij heeft dat vijfste gheslachte ghesien van sijnder kinder kinderen.

16

Ende als hij voleynt hadde neghenen neghentich iaren in die vreese des Heeren, soo hebben sij hem met blyscap begrauen.

17

Ende alle sijn maesscap, ende alle sijn afcoemste is ghebleuen in een goet leuen, ende in een heylighe wandelinghe, also dat sij aenghenaem waren so wel Gode als den menschen, ende alle den ghenen die int lant woonden.

Hier eyndet dat boeck Tobie.