Den gheheelen Bybel, Inhoudende het oude ende nieuwe Testament (Leuvense bijbel 1548)

1

⁺HEERE almachtighe Godt onser vaderen Abraham ende Isaac ende Iacob, ende van haren rechtuaerdighen sade,

+ A

2

die ghemaect hebt hemel ende aerde met allen haren cyraete,

3

die de zee ghebonden hebt metten woerde van uwen ghebode, die den afgront besloten hebt, ende hebt dien toe gheteekent met uwen veruaerlijcken ende loffelijcken naem,

4

denwelcken alle dinghen ontsien ende beuen van daensicht uwer cracht,

5

want onuerdragghelick is die grootdadicheyt uwer glorien, ende onlijdelijck is die gramscap uwer dreyghinghen op die sondaers.

6

Maer onghemeten ende onbegrijpelijck is die bermherticheyt uwer belofte,

7

want ghy sijt die alderhoochste Heere, goedertieren, lancmoedich ende seer bermhertich, ende rou hebbende ouer die boosheyt der menschen.

8

Ghy Heere nae die menichfuldicheyt uwer Goetheyt hebt beloeft penitencie ende verghiffenisse den ghenen die v ghesondicht hebben, ende doer die menichfuldicheyt uwer bermherticheyt hebdi penitencie gheordineert den sondaren ter salicheyt.

9

Hier om

[p. *354]

en hebt ghy Heere Godt der rechtuerdigher gheen penitencie ghestelt den rechtuerdighen, Abraham ende Isaac ende Iacob, den ghenen die v niet ghesondicht en hebben. Maer ghy hebt die penitencie ghestelt om my sondaer

10

want ick heb ghesondicht bouen tghetal van dat sant der zee. Vermenichfuldicht sijn mijn boosheden o Heere, vermenichfuldicht sijn mijn boosheden, ende ick en ben niet weerdich te bescouwen ende te aensien die hoocheyt des hemels om die menichfuldicheyt mijnder boodheden.

11

Ic ben nederghebuycht met veel yseren banden, soe dat ic niet en mach mijn hooft opheffen, ende ick en heb gheen verblasinghe mijns adems. Want ick heb verwect v gramscap ende quaet voor v ghedaen. Ick en heb uwen wille niet ghedaen, ende v gheboden en heb ick niet ghehouden. Ick heb ghestelt afgrijselijcheden ende vermenichfuldicht die misdaden.

12

Ende nu buyghe ick die knyen mijnder herten, biddende van v goetheyt.

13

Ic heb ghesondicht Heere, ick heb ghesondicht, ende mijn boosheden, bekenne ic,

14

waer om soe begheer ick v biddende, Vergheuet my Heere, vergheuet my, ende en wilt my tsamen niet verdoen met mijnen boosheden, noch ooc en wilt niet inder eewicheijt (gram wesende) het quaet my na houden, noch en verdoemt mi niet in die onderste plaetsen der aerden, want ghy sijt Godt, een Godt (seg ick) der gheender die penitencie doen,

15

ende in my suldi alle v goetheyt toonen, want ghi sult my onwaerdich salich maken nae v groote bermherticheyt,

16

ende ick sal v altijt louen alle die daghen mijns leuens. Want v louen alle die crachten der hemelen, ende v is die glorie inder eewicheyt. Amen.