Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺ENde tis ghesciet int neghenste iaer sijns conincrijcs in die thiensten maent, opden thiensten dach der maent, dat Nabugodonosor die coninck van Babilonien hy ende alle sijn heyr is comen te Ierusalem ende sij hebben die omleydt, ende sij hebben daer rontsomme bolwercken opghericht,

+ A

2

Ende die stadt worde besloten ende heel verbolwerct totten elfsten iare des conincs Sedecias

3

tot op den neghensten dach der maent, Ende den hongher is seer sterc gheworden in die stadt, ende daer en was gheen broot voor tvolck des landts,

4

Ende die stadt worde ghebroken, ende alle die strijtbaer mannen sijn des nachts gheulo-

[p. *309]

den, door den wech der poorten die daer is tusschen den dobbelen muer tot des conincks hof (Maer die Chaldeen hadden beleyt rontsomme die stadt) Aldus is Sedecias gheuloden door den wech die ghaet nae die platte velden der woestijnen,

5

⁺Ende het heyr der Chaldeen heeft den coninck vervolcht, ende heeft hem achterhaelt int pleyn lant van Iericho, ende alle die strijtbaer mannen die by hem waren, sijn verstroyt gheworden ende hebben hem verlaten,

+ B

6

Aldus hebben si den coninc gheuanghen ghebracht tot den coninc van Babilonien in Reblatha, die welcke heeft met hem recht ordeel ghesproken,

7

Ende Sedecias sonen heeft hi voor hem ghedoot, ende hy heeft hem sijn ooghen wtghesteken, ende hem met ketene ghebonden, ende in Babilonien ghebracht,

8

In die vijfste maent, opden seuensten dach der maent, welc is het neghenthienste iaer des conincs van Babilonien, soo is Nabuzardan die ouer capiteyn des heyrs des conincks van Babilonien dienaer ghecomen in Ierusalem.

9

Ende hy heeft ontsteken des Heeren huys, ende des conincs huys, ende die huysen van Ierusalem, ende alle die huysen heeft hy metten vier verbrant,

10

Ende alle theyr der Chaldeen dat metten ouer capiteyn der orloghen was heeft die mueren rontsomme Ierusalem afghebroken,

11

⁺ende dat ander deel des volcks dat daer bleef in die stadt, ende die ouerulieders die totten coninc van Babilonien ouergheuloden waren, ende alle dat ander ghemeyn volc heeft Nabuzardan die ouercapiteyn des heyrs wech gheuoert,

+ C

12

Ende vanden armen volcke des lants heeft hy ghelaten wijngaerders ende ackerlieden,

13

Maer die metalen columnen die in des Heeren tempel waren ende die basementen, ende die metalen zee, die in des Heeren huys was hebben die Chaldeen ghebroken, ende sij hebben allen dat metael wech gheuoert in Babilonien,

14

Ende oock die metalen potten, ende watervaten, ende riexkens met drij tacken, croesen, ende mortierkens, ende alle die metalen ghereetscappen daermen mede diende hebben sij wech ghenomen

15

Ende ooc die wieroocvaten, ende fiolen, ende alle die ghereetscappen tsij oft die gulden waren oft silueren heeft die ouercapiteyn wech ghenomen,

16

⁺te weten die twee columnen, ende die zee, ende die basementen, die welcke Salomon in des Heeren tempel ghemaect hadde Ten was niet om weghen het metael van alle die ghereetscappen,

+ D

17

Die een columne hadde achthien cubitus in die hoochde, ende op die was een metalen capiteelken drij cubitus hooghe, ende een netteken, ende granaet appelen waren op dat capiteelken der columnen al metalen, ende die tweede columne hadde desghelijcs cieraet,

18

Ende die ouercapiteyn der orloghen heeft ghenomen Saraiam den iersten priester, ende Sophoniam den tweeden priester, ende drij doorwachters,

19

Ende vander stadt eenen ghesneden camerlinc, die ouerste ghemaect was ouer die strijtbaer mannen, ende vijf mannen vanden ghenen die voor den coninc ghestaen hadden, die welcke hy in die stadt vonden heeft, ⁺Ende Sopher den prince des heyrs die de nieuwe orloochs mannen vanden volcke des lants leerde, ende ses mannen vanden ghemeynen volcke, die in die stadt gheuonden waren,

+ E

20

Die welcke Nabuzardan die ouercapiteyn der orloochser mannen genomen ende ghebracht heeft totten coninck van Babilonien te Reblatha

21

Ende die coninc van Babilonien heeftse gheslaghen ende ghedoodt te Reblatha int lant van Emath, ende Iuda is wech gheuoert wt sijnen lande,

22

Ende ouer tvolck datter ghelaten was int landt van Iuda, het welck die coninck van Babilonien daer ghelaten hadde, heeft hy ghestelt Godoliam Ahicams sone des soons Saphans,

23

Dwelck als alle die hooftluyden der orloochscher mannen ghehoort hadden sij ende die mannen die met hen waren, ⁺te weten dat die coninc van Babilonien Godoliam ghestelt hadde, soo sijn sij tot Godoliam comen te Maspha, Ismael Nathanie sone, ende Iohanan Caree sone, ende Saraia, Thanehumeths sone die Netophathiter, ende Iezonias Maachathi sone, sij ende hen ghesellen,

+ F

24

Ende Godolias heeft hen ende haren medeghesellen ghesworen, segghende. En wilt niet vreesen den Chaldeen te dienen, blijft int lant, ende dient den coninc van Babilonien, ende tsal wel met v sijn,

25

Ende het is ghebuert in die seuenste maent, dat Ismael Nathanie sone des soons Elisama van des conincs sade is ghecomen, ende thien mannen met hem, ende sij hebben Godoliam gheslaghen, die welcke oock ghestoruen is, ende oock hebben sij verslaghen die Ioden, ende Chaldeen die met hen waren te Maspha,

26

Ende alle tvolck opstaende vanden cleynen totten grooten, ende die hooftluyden der orloochscher mannen sijn in Egipten ghecomen vreesende die Chaldeen.

27

⁺Ende tis gheschiet int seuenendertichste iaer van Ioachin den coninck van Iuda wechuoeringhe, in die twaelfste maent, opden seuenentwintichsten dach der maent, dat Euilmerodach die coninck van Babilonien int iaer doen hy begonste te regneren, opghehauen heeft Ioachins des conincks van Iuda hooft wten kerker,

+ G

28

Ende hy heeft hem goedertierlijcken aenghesproken, ende hy heeft sijnen conincklijcken stoel ghestelt bouen alle die conincklijcke stoelen der coninghen die met hem in Babilonien waren,

29

Ende hy heeft sijn cleederen verandert die hy inden kerker ghehadt hadde, ende hy adt altijt broot in sijn teghenwoordicheyt alle die daghen sijns leuens.

30

Ooc heeft hy hem ghestelt sijn prouande sonder ophouden, welck hem vanden coninck ghegheuen worde telcken daghe, alle die daghen sijns leuens.

Hier voleyndt het vierde boeck der Coninghen.