Den gheheelen Bybel, Inhoudende het oude ende nieuwe Testament (Leuvense bijbel 1548)

Dat eerste Capittel.

1

⁺ENde die Heere heeft Moysen gheroepen ende tot hem ghesproken van dat tabernakel des getuyghenis segghende,

+ A

2

Spreect tot die kinderen van Israhel, ende ghy sult tot hen segghen Een mensch van v lieden, die den Heere een slachofferande offert van den vee, dat es vanden ossen ende scapen, offerende

[p. *111]

slachofferanden.

3

⁺Eest sake dat sijn offerande is brantoffer, ende vanden vee, soo sal hy een onbesmet manneken offeren, aen die doore van dat tabernakel des getuyghenis, om sij seluen aenden Heere te versoenen,

+ B

4

ende hy sal sijn handen legghen opt hooft vander offeranden, ende die sal ontfancbaer sijn, ende tot sijnder versoeninghen profijtelijck.

5

Ende hy sal een calf ten offer dootslaen voor den Heere, ende Aarons sonen die priesters sullen tbloet van dien offeren, stortende dat al omme den outaer die daer is aen die doore des tabernakels

6

Ende als dat vel vander offeranden afghetrocken is, soo sullen sij die leden in stucken snijden,

7

ende onder in den outaer tvier steken als sij daer te voren eenen tas houts ghemaect hebben,

8

ende die leden die ghedeylt zijn daer op legghende, ⁺te weten het hooft, ende alle dat aen die leuer hanghet,

+ C

9

dat inghewant ende die voeten met water ghewasschen sijnde, ende die priester sal dese verbernen op den outaer, tot eenen brantoffer, ende tot eenen sueten rueck den Heere.

10

Maer is sijn offerande vanden cleynen vee, te weten brantoffer vanden scapen oft bocken, so sal hy een eeniarich lammeken sonder smette offeren,

11

ende hy sal dat ten offer dooden aen die noortsijde des outaers voor den Heere, maer dat bloet van dien sullen Aarons sonen opden outaer storten al rontsomme,

12

ende sij sullen die leden deylen, dat hooft met alle dat aen die leuer hanct, ende dat legghen opt hout, ⁺daermen tvier onder steken sal,

+ D

13

maer dat inghewant ende die voeten, sullen sij met water wasschen. Ende alle dese sal die priester opden outaer offeren ende ontsteken tot eenen brantoffer ende tot eenen aldersuetsten rueck voor den Heere.

14

Maer eest dat die offerande des brantoffers is van den voghelen, van tortelduyuen, oft ionghe duyuen

15

soo sal die priester die offeren opden outaer, ende als hy dat hooft achter aen den hals omghewronghen heeft, ende die plaetse der wonden opgheborsten is, so sal hy het bloet doen druppen opden cant des outaers,

16

maer dat croppeken vander stroten, ende die pluymen sal hy by den outaer worpen aen die oostsijde, op die plaetse daermen die asschen pleech wt te storten,

17

ende hy sal haer voghelkens breken, ende hy en sal die niet clieuen, oft met ijsere afsnijden, ende hy salse ontsteken op den outaer, stekende vier onder dat hout, het es een brantofferande, ende een offerande vanden suetsten rueck voor den Heere.