De Geomantie in het Middelnederlands

Uitgave van deze voorspeltechniek uit het Münchense handschrift (15de E)

[p. 180]

[De rechter Coniunctio]

(fol. 71v) coniunsio 15	j Van' der meninge gemeenlijck.	ij Vanden coninge.
	(D)it is teken der sceldender der tymmerlieden ende der sarasinen ende vertoecht hem enen die soect genogen mit dingen.	Sijne heesch wert machtich by den coninc ende hi sal sijn aduersaris verwinnen.
	(D)it is teken der lieden die plaite ende twiste aen nemen ende die mit crachte yet begeren te vercrigene.	Sijnen heesch wert volcomen vanden coninge ende sijn eynde louelic.
	(D)it is teken der geenre die vragen om teinde ende victorie ende besiet ofse verandert so niet ende geuoech mit enen dinge dair hi verre aff is.	Hy sal sijn dinc vercrigen vanden coninge ende te sijnre begeerte comen.
	(D)it betekent enen die vraget nae beroerte off na wegen off om geuoech mit wiuen ende betekent oic lere of scole.	Sijnen heesch wert hem onthouden ene cortte tijt, ende dair na sal hijt vercrigen.
	(D)it betekent beroerte te reysen ende veranderinge van state te beteren state.	Hy sal schade lijden vanden coninge ende dair na te sijnre begerten comen.
	(D)it is teken eens die soect geuoecht te sijn mit enen coninge of enen edelen man ende ontsiets hem ende sijn geuoech is voir ogen off iegenwordich.	Hy sal den coninc by wesen ende goet van hem hebben ende brieuen.
	(D)its teken eens die soect gracie ende leeftocht de is in een stede dair hi gerne wt wair int ruyme of die vraget om enen ziecken.	Hy sal gaen tot enen goeden coninge dair hi grote gracie aff hebben sal.
	(D)its teken eens die geert geuoech mit enen die van ogen of buten is ende vertoecht hem enen die vraecht van hueleken der wiuen.	Hy sal by lichte om sijnen heesch arbeiden, ende niet dair af vercrigen.

[p. 181]

(fol. 72r) iij Vanden rechte.	iiij Van den gelde.	v Van enige dinge.
Hy sal in plaiten ende vonnesse vallen ende int einde verwinnen.	Hy sal gelt ende goet vercrigen mit woerden ende mit arbeyde.	Hy sal dit vercrigen mit vele vresen ende arbeyden.
Dese sal helpe hebben int gerechte.	Hi sal gracie ende goet vercrigen wt menigerhande stede.	Dit wert belet een tijt ende dairna sal hijt vercrigen.
Hy sal iegen sijnen wederman sijn begeren behouden als is hij onrechtich, ende dair in helpe hebben.	Hy sal goet ende gracie vercrigen van wiuen, mer hoede hem dairna van wederspoet.	Lichtelic sal hi sijnen heesch vercrigen.
Sijne sake wert opgehouden mit rechte der na wert hem gehulpen.	Hy sal haue ende goet vercrigen mit reysen beroerten ende mit veranderingen.	Hy sal een deel sijnre b(e)gerten vercrigen, ende dair na all.
Hi sal een deel sijns rechts vercrigen na dat hi beloefte gedaen sal hebben.	Hy sal lichte haue hebben ende geen rijchede vergaderen.	Tuercrigen van desen dinge wert belet een tijt ende dair na sal hijs een deel hebben na wanhope.
Sijne sake wert opgehouden in dese clachte ende cort der na wert hem gehulpen.	Hy sal goet vercrigen ende tmeeste deel vanden coninge of van verre saken.	Cume sal hi hier toe comen ende tlaten best.
Hy sal hinder hebben in dit vonnes ende gepens ende vertrec in sijne sake.	Hy sal goet ende haue hebben ende dair na sal hijt delen ende te niete brengen.	Hy sal dit vercrigen ende sal verandren ende vertrecken.
Hy sal anxt liden in dit vonnes ende dair na sal sijn wesen beteren ende goet vercrigen.	Int ierste van sijnen leuen wert hi quaets vercrigens ende van lettel gelts ende int laetste so wert hi rike.	Hy ne sal tot sijnre b(e)gerten niet connen comen.

[p. 182]

(fol. 72v)	vj Van den huelic.	vij Vander dracht.
	In dit huelic en is niet goets en si een bekennen vleeschlic iegen 'recht.	Dese sal baren want dit is een teken des screyens of des arbeits ende te duchten is voirt baren.
	Wert dit huelic gedaen mit den persoen diemen heescht, so sullen si haest versceyden werden.	Dese sal baren gesont nochtan sal si anxt lijden ende enen zone baren.
	Dit wert een voirspoedich ende gehelicht huelic ende de man sal goet vanden wiue vercrigen.	Sy sal baren ende weder opstaen gesont ende sterck, ende de dracht een dochter ende vrome.
	Onmogelic wert dit huelic te volcomene tusschen hem beden ende wert ontslegen.	Sy en sal hair dracht niet voldragen ende sal hebben een dochter.
	Dit wert een goet gehelicht hielic ende si sullen goet vercrigen ende vele gracien ende elc sal den andren zere mynnen.	Dese dracht wert gehelicht ende gesont ende si sal baren enen zone.
	Te duecht(en) van desen hueleke es emmer tochten derende dair om en sultu niet narer gaen om de vrese der quaetheit ende des sceldens.	Dese is biden barene ende sal anxt liden int baren.
	Dit is een goet huelic ende is een wijf vanden meester oude dan de man ende gracien ende vele goet.	Sy sal liden ende si sal gesont werden ende baren een dochter gehelicht ende geluckich.
	Dit wert licht vercregen, want dwijff begeres, ende die man van dagen.	Hy sal in anxte ende vreesen wesen ende sal baren een dochter gesont.

[p. 183]

(fol. 73r) viij Vanden ziecken.	ix Vander belegenre stat.	x Off si kint hebben sall.
Dit is een warachtich teken der witheit ende wanneert hem vertoecht so is voir hem te duchten.	Dese stat wert gewonnen ende voir tuolc en is niet te duchtene.	Hy sal ontfaen een tal der kinderen.
Comet in de vrage fortuna maior off puella so magmen hem wail tdoot cleet bringen.	Merc dit teken en(de) laet de stat niet winnen mer tuolc sal vele quaets lijden.	Hy sal ontfaen vele kindren by vele wiuen dair hem mede gehulpen wert.
Hy sal vele anxten lijden ende men moet voir hem duchten.	De stat en mach niet gewonnen werden ende voir tvolc en is niet te duchten.	Hy sal ontfaen kinderen ende meest dochteren ende si sullen lange leuen.
Sijn siecte wert verlanct ende te duchten is vanden wederualle.	De viant sal mitter stat ouer een dragen ende der van sceeden.	Hy sal een tijt letten eer hi kindren sal hebben, ende dair na sal hise hebben.
Men ducht voir desen siecken ende sal verlost werden ende ontgaen.	Tvolc deser stat sal loeselike sijne dingen doen ende der mede wert hem geholpen iegen den viant.	Dese en sal geen kindren hebben dan in sine outhede.
Op desen sieken salmen roepen ende screyen ende hi sal anxt lijden ende comt in de vrage barbatus so wert hi verlost.	Dese stat is starc ende tbeliggen en sal hair geen hinder doen ende wert verlost.	Hy sal vele kindren hebben der hem lettel mede geholpen wert ende geen goet en sal hi van hem hebben.
Sijn siecte wert lange tijt verlanget ende men hoopt hem beternesse.	Voir dese stat en is niet te duchtene, want haer einde wert velich ende goet.	Hy sal kindren hebben, ende meest, dochteren, ende hi werter mede geholpen ende gemint.
Te duchten is voir dese siecte want si dobben in sijn lichaem.	De viant wert sekere van de stat ende dat is de sake des verlossens der stat.	Eerst wert belet ende der na sal si kindren hebben ende meest dochteren.

[p. 184]

(fol. 73v)	xj Vander diefte.	xij Vander reyse.
	Dese diefte wert wedercregen na dat de dief geureest wert ende also tuerlies.	Hem sal belet toecomen en(de) sal affhouden vander reyse.
	Een tijt sal dese diefte verloren bliuen ende der na sal mer een deel af vinden ende tuerlies wert vercregen.	Hy sal belet werden een tijt ende dair na sal hi gaen mit vele lieden ende mit pairden.
	Tvinden van deser diefte wert belet, nochtan wertse geuende om lanc ende also tuerlies.	Dese reyse wert belet en sij dat een here off een meester van enen scepe off des ridens sij.
	Deser diefte wert ende blijft tmeeste verloren ende een deel wert geuonden na tijt by enen wiue ende tuerlies en wert niet vercregen.	Hy sal gaen ende sijn wech wert zeere verlanget.
	Dese diefte en mach niet geuonden werden noch tuerlies ende by desen tekene en salmer geen geruchte af hooren.	Sijn wech wert voirspoedich ende niet lange en sal hi vander begeerder stede wesen.
	Tuerlies van deser diefte wert verlanct ende dair na geuonden ende niemende en saller duecht aff comen ende also tuerlies.	Hy sal vele pensen in de wegen ende geselschap hebben van enigen lieden sonder mate.
	Dese diefte is van minen ende wert haest vercregen sonder verbeyden ende tuerlies wert vercregen.	Hy wert belet vanden wege mit bate ende gracie.
	Dese diefte en wert niet vercregen ende is van planten, en si dat een merie off een wijf si.	Hy sal gaen ende vercrigen goet mit lettel arbeits ende mit clene nernste.

[p. 185]

(fol. 74r) xiij Vandien die van ogen is.	xiiij Vanden geuangene.	xv Vanden regens.
Hy sal snel wedercomen mit menichte van lieden.	Sijne carker wert verlanct ende te duchten is dat hi geslegen wert.	Dit jair sal regens lettel wesen, ende lettel vloeyen.
Dese sal comen geluckich mit groten laste ende gratie.	Hy sal lange geuangen bliuen nochtan wert teynde goet na tquade.	De regen wert opgehouden dit jair ende der na salt lettel (regenen).
Hy en is niet in wille van wedercomen want hi is in duechden ende gracien.	Dese blijft in sine staet mit enen goeden eynde ende sal verlost werden in een ander tijt dan dit jair.	Het sal regenen dit jair te maten te lettel noch te vele.
Dese sal wedercomen ende verre vanden lande reysen.	Emmer toe is sijn verlossen nakende ende hi sal wtgaen haest.	Des regens wert vele dit jair ende ten sal niet ophouden.
Hy sal veranderen van stede te stede, ende sijn meninge en is niet weder te lande te comen.	Sijn vangenisse wert een tijt verlanget, ende hi wert bescaet.	De regen wert opgehouden dit jair.
Hy sal verlanc wtwesen ende veranderen ende als nu niet wedercomen.	Dese wert vander carker verlost na cortte tijt.	Zeer lettel regens salt wesen dit jair ende tvolc werter by gequetst.
Dese sal haest wedercomen ter steden dair hi begeert.	Sijn vangenisse wert verlanct mer teynde wert velich ende goet.	De regen wert opgehouden dit jair, ende tuolc dair bij bescaet.
Sijn wechwesen en mach niet lange wesen mer hi sal haest wedercomen.	Hy wert cort verlost ende sal reysen na dat hi verlost wert.	De regen wert middelbair dit jair noch te luttel noch te vele.

[p. 186]

(fol. 74v) 151v	xvj Van den begrauen dinge.	xvij Vander comenscap.
	Dit begrauen dinc is seker ende groet scat isser in, mer tancomen is seer zwaer, ende is in twesteynde van dair ment soect.	Dese wert zeere vol wasdoms seere orbairlic ende groter baten.
	Dit is seker ende in vele steden ende een vander steden es te scolen off ter stede eens toegancs.	In dese comenscap is last ende cleene oirbair.
	Dit is sekere ende emmertoe afgenomen mit nernste ende grote bate vercregen.	Dit wert een geluckege comenscap mit groter baten nochtan salt hem lange bliuen by.
	Hier en is niet begrauen mer die wech is seker.	Hier in wert vele wasdoms ende snel vercocht.
	Hier en is niet begrauen.	Dit is sonder bate ende tlaten beter dan tsoeken.
	Hier en is niet begrauen.	Hem is beter dat hi de comenscip achterlate om de vrese der scade.
	Hier is seker in begrauen ende onder de name van desen heeft gedoluen geweest ende leecht ten oesten wairt.	Dit wasdomme wert cleen geenre wairden.
	Dit is seker ende hier is gedoluen int oosten, ende int oesten es sijn stede mer tuercrigen lanc.	Hem wair goet dat hise achterliet wanter schade in is.

[p. 187]

(fol. 75r) xviij Vanden wtgaenden heere.	xix Vanden toegaenden heere.	xx Vanden tween heeren.
Den wtganc van desen heere sal goet sijn geluckich ende gehulpen.	Dit here sal toegaen ende goet vercrigen sonder gepens ende bloetstortinge.	Dese sullen te gader loepen, ende grote twiste onderlinge ende vele woerden.
Dit wert van vele vergaderingen ende crachten, ende woerden, ende twist sal hem toecomen.	De toeganc van desen heere wert opgehouden een lettel ende der na salt toegaen.	Onder dese twee heren sullen vallen gepensen ende teynde wert goet.
Desen heere wert geholpen ende het sal verwonnen wedercomen gesont.	Eest dat dit heere toegaet het wert gepaist mitten genen dairt toegaet.	Dese sullen versaemt werden ende de pais wert hem by.
Dit heere sal haest wtgaen al comet hem wat quaets te gemoete.	Sijn toeganc wert vertraecht ende ne sal ter andre stede gaen dairt begerde.	Dese en werden nemmermere versaemt, ende verscheeden is hem narer.
De geuallen van desen here werden groot nochtan heeft het scade gehadt voir tbeginsel des weges.	Sijn toeganc wert belet ende niet goets en salt hebben, ende tlaten best.	Onder dese twe sal schade vallen, ende tgepens is iegen woirdich.
Tgeual van desen heere wert bequame ende sterc sonder scade ende gepens.	Dit wert beroert toe te gane, ende ten sal niet voldoen sijnen toeganc.	Tusschen dese twee sal wijch vallen mer teynde goet.
De geuallen van desen heere werden alte quaet.	De toeganc van desen heere wert wtgeset, ende ten sal niet mogen toegaen.	Een ygelic van desen wert beroert tander te ondersoekene.
De geuallen van desen heere werden middelbair int goeds ende int quade.	Dit heere sal toegaen by der stede, ende niet ontsien.	Sij sullen teen tander toecomen nochtan sullen si niet toelopen ende vechten.

[p. 188]

(fol. 75v)	xxj Vanden verholen dinge.	xxij Vander bedeuairt.
	Dat hier meest in is, is mine die onder hamers geleit heefft geweest of van dingen gesneden in tween.	Hy sal de bedeuairt doen in een ander iair dan hi vraeght.
	Dit mach van mine wesen ende is zwaere ende bi lichte by hem is dinc dat men vouden mach, ende der is af gesneden.	Ydel wert de meninge van desen de bedeuairt doen wille dit jair.
	Dit is enich cleet want datter meest in is is voudelic ende lanc ende dynne.	Onmogelic wair dat hi de bedeuairt dede in sijn jair.
	In dit verholen dinc is witheit ende cleenheit ende veelrande varwe ende dair sijn steden in.	Hy ne sal te sijnre bedeuairt niet comen dit jair.
	Hier in is wtgehouwen dinc ende blenckende ende dinc onder hamers geleit of onder scaren of mit scaren of mit scaren gesneden ende vele planten.	Dese bedeuart en wert niet voldaen dit jair ende sij wert belet.
	Hier in is lettel ende een deel dair af is bescreuen ende is een dierbair dinc ende orbairlic.	Hy sal bider bedeuairt comen nochtan en saller niet toecomen.
	Dit is dinc hart hebbende rontheit wegende ende orbairlic.	Dese bedeuairt en wert van desen jair niet gedaen.
	Dit is van planten hebbende varwe die verandert is, ende emmer toe esser wat aff gesneden.	Hy sal gaen om de bedeuairt te heeschene ende hi ne salre toe comen dit jair.

[p. 189]

(fol. 76r) xxiij Vanden vechtere.	xxiiij Vanden coop der vruchten.	xxv Vanden geualle des jairs.
Eest dat hi vecht dit jair te duchten is dat hi geuangen wert.	De coop sal bliuen staende dit jair.	Dit wert een bequame jair ende enige grote coningen suller siec in worden.
Hy sal vechten ende behouden bliuen sonder scade.	De coop sal dit jair voirt gaen ter groter orbare ende ontslegen werden.	Dit wert een mogende jair in rijcheden ende in gracien.
Dese sal ophouden tuechten dit jair.	De coop sal wassen ende dieren dit jair.	Dit wert een jair van goeden geualle ende drachtich.
Hy sal vechten ende men ducht voir sijn lange bliuen.	De coop wert ontslegen ende vloeyen dit jair.	Dit wert een jair van goeden geualle ende de voetgangers werden vele.
Hy sal lichtelic vechten ende wel.	De coop sal wassen in ondiertseden dit jair.	De geuallen van desen jair werden middelbair ende te duchten is voir den coninc.
Hy sal vanden vechtene sinen wille hebben ende twert gestreden.	De coop sal wesen in sinen staet ende voertgaen ter orbair.	De geuallen van desen jair werden middelbair ende de coninc zeere vrome ende starck.
Hy sal tuechten ophouden willens.	De coop wert opgehouden dit jair ende dair na dieren.	Dit wert een jair van goeden geualle ende van vele goets.
Niet vechten is hem best ende comter toe hi wert gemoeit ende der af is te duchtene.	Int beginsel des iairs wert de coop ontslegen ende der na wederkeren te sijnen state.	Dit wert een jair van vele goets ende van vele voetgangers.

[p. 190]

(fol. 76v) 16	j Vander meninge gemeenlike.	ij Vanden coninge.
	Dit is teken der warachtiger sprake ende eene wair seggende mans ende vertoecht hem enen die recht geert of soect off enen rechtere.	Hy sal vanden coninge begerte vercrigen.
	Dits teken eens die geert off soect vonnesse mit enen goeden dinge, dat lange op gehouden heeft geweest, ende onmogelic wert hi ne sout vercrigen.	Dit dinc sal hem geschien on lanc.
	Dits teken eens die vraget na enen die buten is te lande of te watere off na enen geuangen ende betekent onuolmaectheit ende wederstekens.	Beter is hem den coninge niet genaect want ist dat hi hem genaect hem comter lijden ende anxten aff.
	Dits teken eens die soect van eenre beroerten of reyse die hi doen soude ende is te slac int soeken ende salt laten.	Hy sal vercrigen sijnen heesch vanden coninc ende geeert werden.
	Dit is teken eniger lieden vergadert op de mesdaet der sangers ende der wijndrinckers, ende teken der brulochten der mannen ende der wiuen.	Hem is beter dat hi den coninge niet by en sij want hem comter hinder ende belet aff.
	Dits teken eens die soect een dinc dat verre is dat hi niet vercrigen mach haesteleken ende eens die soect vruechden ende hueleken.	Sijnen heesch wert belet ende tlaten is best.
	Dits teken des versamens mit allen dingen die by sijn ende der wiuen ende der scoonder cleederen bleckende.	Hy wert versaemt mit den coninge ende sal sijnen heesch vercrigen om lanc.
	Dit teken vertoecht hem eenre draegender vrouwe, ende enen die soect dinc dat by den vercrigere is ende niet en salt hem vertogen enen die in moeynessen is.	Hy wert van groten state bi den coninc ende sal sijnen heesch vercrigen lichtelic ende van hem geeert werden.

[p. 191]

(fol. 77r) iij Van den rechte.	iiij Vanden gelde.	v Van enigen dinge.
Sijn recht sal den rechter cont wesen ende hem wert van hem allen gehulpen.	Hy sal vercrigen goet mit arbeyde ende dair in liden hebben.	Dit dinc sal geschien na nernsticheit ende vele woerden tevergeefs.
Sijn recht is kont ende hem wert gehulpen om lanc.	Hy en sal geen goet hebben in sijn ioncheit, mer dair na sal hi wat vercrigen in sijne outheit.	Dit is veruult in sijn hant sonder letten.
Hy wert verblijt int rechte dat hij heescht ende sal sijn begeerte vercrigen.	Hy sal haue hebben sonder arbeit ende gelt vercrigen ende weder verliesen.	Dit sal hi vercrigen ten lichsten datmen mach sonder nernst ende arbeyt.
Hy sal sijn recht behouden ende sijn begerte ende wert verblijt in sijn clage.	Hy sa(l) wat vercrigen by beroerten ende wt versoeke ende mine te maten.	Hy is verre vanden vercrigene nochtan sal hijt vercrigen na tijt.
Sijn sake wert in dit recht ontslegen, ende geen orbair en salre hem af comen.	Hy sal haue ende goet vercrigen onbehoirlic ende haestelic mer niet en sal hem bliuen.	Hy sal dit vercrigen na arbeit ende sal eenen mede deelre hebben.
Sijn geuallen werden quaet in dit vonnesse ende sal vallen in stride ende in plaite.	Tuercrigen des goeds wert hem wtgeset, ende niet en sal hem bliuen.	Dit en is niet licht sijns vercrigens, want het wert hem geboret (?)
Het wert geuonnest hoe hi wille ende hi sal ontfangen brieuen ende sekerheit van sijnen wederman.	Hy sal goet vercrigen ende orbairlic wt allen vercrigene ende dat sal hem bij bliuen.	Hy sal dit vercrigen ende der nae salt hem weder ontgaen.
Hy ne sal sijn begerte niet hebben in dit rechte, mer hi sal wasdom ende gout nemen van sijnen wederman.	Hy sal vele hauen ende gelts vercrigen sonder arbeit ende sal hem bi bliuen.	Hy sal dit vercrigen ende gelt ontfaen of een wijff trouwen.

[p. 192]

(fol. 77v)	vj Vanden hueleke.	vij Vander dracht.
	Dit huelic wert zere quaet ende niet en salt volcomen ende tlaten waere best.	Vele moeynissen sullen hair toecomen int baren ende sal baren enen zone.
	Dit huelic is off wert verboden of vele verbiedens ende de persoen de men heescht.	Dese dracht is van dochteren ende lanc eerse baren sal vanden dage dat mens vraget.
	Dits een zere quaet hielic ende beter ist dat hijs niet en nake om de vreese ende de quaetheit des wijffs.	Sy sal eenen zone baren na der vreese des ontidelics barens.
	Dit teken bederft thuelic ende betekent versameninge sonder gerecht huelic.	Wert dese dracht voldragen so sal si baren eenen zone nochtan duchtmen voir tkint int baren.
	Dit is een huelic van goede geual ende twijff is maecht ende tuersamen mit hair is bi sonder belet.	Wert dese dracht voldragen so is te duchten voir tkint int baren.
	Dit is teken der hueleken ende der vruechden ende het verblijt hem in hueleken nochtan mit verbeyde(n).	Sy wert verlost ende si sal baren een dochter ende sal opstaen gesont.
	Dit huelic wert goet ende spoedich ende zere orbairlic ende sij sal kindren ontfaen.	Dits teken der dracht want het is ene figure des bloets ende der lanke si is vast ende sterck ende sal baren een dochter.
	Dit is bequame ende gehelicht ende hi sal vanden wiue goet hebben ende sij van hem.	De dracht wert versekert ende si sal baren enen voirspoedigen ende gehelichden zone.

[p. 193]

(fol. 78r) viij Vanden siecken.	ix Vander belegenre stat.	x Ofsij kint hebben sal.
Hy wert genesen van sijnre siecte ende verlost.	Van dese stat en is niet te duchtene, ende si is seker iegen haren viant.	Si sal kindren hebben in sonderlinge tijden ende meest dochteren.
Sijn ziecte wert verlanct ende der na wert hij gesont ende verlost.	De geuallen van deser stat werden quaet ende bliuen also si is, mer niet en isser voir te duchten.	Eerst wert den ontfanc der kinderen vogehouden ende der na sal hi kint hebben eene dochte.
De siecte sal minderen ende hem sal een vloet toecomen die sake wesen sal der gesonde.	Twesen van deser stat sal zere quaet wesen, ende te duchten is datse hair volc verraden sal.	Hair ophouden in de kinderen wert quaet ende vele saller aff tontide geboren werden.
Dese wert verlost vander siecte ende sal opstaen gesont.	Tbeliggen en wert niet volbracht mer de viant sal vander stat sceeden.	Si sal kindren hebben dair voren te duchten is in haire ioncheit van steruene.
Sijn siecte is int hoeft.	Te duchten is voir dese stat ende bi lichte sal sij groten anxte liden.	Sy sal kinderen hebben sonen ende dochteren ende dair in verbliden.
Hy wert verandert van siecte te siecte ende die siecte en sal hem niet laten.	Te duchten is dat dese stat gewonnen wert mit den zweerde ende een deel des volcs bedoruen.	Het wert lanc eer si kinderen sal krigen ende dair na sal hi se hebben in sijn outheit.
Sijn siecte wert verlanget ende bouen mate.	De geuallen van deser stat werden goet ende hair viant sal keytiuich werden iegen hair.	Sy sal vele kinderen hebben in allen vren ende in allen tijden.
De sake van desen is ouervloet des bloets ende coemt fortuna maior so is voir hem te duchten.	Dese stat is drachtich ende dair sal bloetstortinge in vallen.	Sy sal kinderen ontfaen na datter vele mesuallen wert ende sal out werden.

[p. 194]

(fol. 78v)	xj Vander diefte.	xij Vander reyse.
	Dese diefte noch tuerlies en werden niet wedercregen.	Hy sal gaen ende gesont in die reyse wesen ende in goeden state.
	Twechwesen van deser dieften ende des verlies wert verlanct ende der nae wederuonden een deel dair aff.	Hy sal in sinen wech sijne begerte vercrigen ende den wech wert ouerlidende ende gehelicht.
	Dit betekent dat die diefte ende tverlies snel wedercregen werden.	Sijn meninge van reysene sal achterbliuen ende veranderen.
	Dese diefte ende tuerlies wert verlangt ende der na werden si hairen here geopenbairt.	Hy sal gaen ende sijn dingen voldoen ende wedercomen.
	Dese diefte en wert niet wedercregen ende een wijff is de dief off een sonder bairt ende tuerlies wert wedercregen.	Tletten is hem best ende ist dat hi vertrect so is voir hem te duchtene.
	Dese diefte wert behemelt ende lanc salt wesen eer mer aff verheescht en si dat een dier si ende also tuerlies wert verlangt.	Gaet hi ter zee so werden sijn dingen wtgestort gaet hi te lande so sullen si hem toelopen ende hout hi de reise op so sal hi een deel hebben dair aff.
	Die dit genomen heeft is by sijnen huyse ende wert haest sonder scelden wedercregen ende also tuerlies.	Hy sal gaen ende sijne wech wert gehelicht ende hi sal goet ende gracie vercrigen.
	In dese diefte is gout of dierbair dinc ende al weetmen den dief nochtan ist van verlange vercrigene ende alsoe wert tuerlies wedercregen.	Dese sal groten orbair doen ende haest wedercomen sonder vreese.

[p. 195]

(fol. 79r) xiij Van dien die van ogen is.	xiiij Vanden geuangene.	xv Vanden regen.
Hy wert traech int wedercomen ten lande dair hij meent.	Sijn verlossen sal naken ende al goet sal hem toecomen.	Lettel regens salt vallen dit jair ende den volke saller hinder af comen.
Sijn wechwesen wert verlanct ende hijne sal niet wedercomen en si dat hij gesont si ende wel hebbe.	Sijn vangenisse wert verlangt mer teynde goet.	Lange wert de regen opgehouden dair na int eynde des jairs salt lettel regenen.
Hy is nakende sijnen huyse ende hi ne sal niet letten.	Hy sal lange geuangen wesen mer sijn eynde wert goet.	Dit jair salt vele regenen ende zeere ende orbairlic den volke wesen.
Sijn wedercomen wert een lettel wtgeset, ende der na sal hij comen.	Dese wert snel verlost ende der na sal hij wten lande trecken.	Dit jair wert de regen een lettel verdragen ende sal der na vallen.
Emmertoe heeft hi moeinesse leden ende noch lijden sal ende wedercomen.	Voir desen is te duchtene ouermids den verlange.	Des regens wert lettel dit iair dair den volke hinder af comen sal.
Sijn wedercomen wert lange wtgeset.	Te duchten is voir den doot van desen geuangen bynnen den jaire.	Dit jair salt zere luttel regenen ende de hette des zomers zere grote.
Hy sal wedercomen sonder letten hebbende mit hem gracie ende goet.	Men ducht voir den geuangen mids den verbeidens al es teynde goet.	Zeer lettel salt regenen dit jair nochtan salt helpen op dat gode gelieft.
Hy sal wedercomen mit placken mit gelde ende mit vele gracien.	Men ducht voir desen mids den verlangen ende voir sijn doot.	Vele rode wolken sullen hem openbaren aen den hemel ende zere lettel salt regenen.

[p. 196]

(fol. 79v)	xvj Vanden begrauen dinge.	xvij Vander comenscap.
	Hier en is niet begrauen nochtan esser een alle groete vermoeden in.	Hier in en is scade noch bate.
	Dit begrauen dinc is seker ende inden toeganc nernst ende arbeit ende een lanc wtstel ende tlaten best.	Dese mercerie is traech wijt ende wtgaende.
	Hier en is niet begrauen.	Dese comenscip is lichts vercrigens mit clenen wasdome.
	Hier en is niet begrauen.	Hier en is bate noch scade in ende tlaten is best.
	Dit is seker nochtan is vrese int toegaen van tsconinx wege ende anders.	Comt hem dese mercerie te hant hi salre mede in vreese ende in moeynisse comen.
	Beter is van der stede gegaen ende niet gesocht.	Dese comenscap is narer der baten dan der scade ende van lange verbeydene.
	Dit is zeker ende heeft vele gracien ende men salre toecomen cort ende is westwairt.	Es dese comenscap van wasse of van liquore dat mach wesen dat nat is of snelten mach so esse vol wasdoms ende eest anders so ist niet.
	Dit is seker ende vele gracien sijnre in ende es oestwert ende wert lichtelijc geuonden.	Es dese comenscap van dieren so sal hi vele gracien hebben ende ist anders niet.

[p. 197]

(fol. 80r) xviij Vanden wtgaenden heere.	xix Vanden toegaenden heere.	xx Vanden tween heeren.
Dit heere sal verwinnen ende in sijne viande lopen sonder arbeit ende moeynesse.	Tmeeste deel van desen heere sal vlien ende sijn sake wert wtgestelt.	De sake van desen twe heeren wert opgehouden ende tgewin van hem beden is dat sij niet versaemt en werden.
Den wtganc van desen heere wert verleit ende de raet sal bliuen binnen den lande.	Dit heere en sal sijn dinc niet veruullen ende het wert belet.	Een ygelic van desen sal vast staen ende teen en sal int ander niet willen lopen.
Dit heere en sal niet wtgaen ende eest dat wtgaet het sal wedercomen gemoeit.	Dit here sal toegaen ende niemende deren.	Tanlopen van desen heeren wert middelbair, ende hair ne geen en sal verwinnen.
Dit here sal wtgaen ende wederkeren sonder bate.	Sijn toeganc wert een tijt wtgeset ende dair na salt toegaen.	Dese en sullen niet anlopen ende sullen sceeden teen vanden anderen.
De vorste off de beleder van desen heere sal anxt lijden ende verdriet in sijne ziele.	Tvolc van desen here sal versonderlingen ende ten sal niet mogen toegaen.	Eest dat si toelopen, so wert die beginre verwinre.
Dit heere sal vallen te zweerde ende moeynisse liden ende beter wert niet wtgegaen.	By desen tekene siet men den toeganc van desen heere ende geen volc en werter aff gequetst.	Eest dat sij toelopen so wert die beginre verwonnen.
Tletten is desen here beter dan den wtganc.	Dit toegaande heere is van snellen wedercomene ende sal vercrigen vele gracien.	Vele van desen twee heeren werden bedoruen ende dair nae sal hair sake veranderen int goede.
Men ducht voir dit heere van bloetstortinge anxten ende vreesen.	Dit here sal toegaen ende wert ontsien.	Quaet sal onder dese twee heeren geschien, want van hairen bloede vloeyen sal ende dair na werden sij gesceeden.

[p. 198]

(fol. 80v)	xxj Vanden verholen dinge.	xxij Vander bedeuairt.
	Dit is van cleenre wairden ende tmeeste is myne ende dinc datmen houden mach.	Hy sal de bedeuairt doen dit jair ende sien edele steden of begeuene steden.
	Dit is van planten der erden hebbende geluwe varewe ende heeft emmer toe onder hamers geweest off is gesneden.	De bedeuairt wert verleyt ende afgelaten sijns willen.
	Hier is in zwaerheit ende eenen lichten treck.	Hy sal meenen ende nernst wesen de bedeuairt te doene dair na sal hi hem dair af keeren.
	Dit is van planten der erden die geenre wairde en sijn ende emmertoe gesneden of verandert van dair sij waren.	Es hi volmaect om de bedeuairt te doene so sal hi vanden wege wederkomen.
	Dit is van planten ende mynen hebbende in hem riekende dinc ende smetten van gaten.	Hy sal de bedeuair(t) doen dit jair mit arbeyde, vreese ende anxten.
	Dit verholen dinc is verblidende den moet ende wit, ende emmertoe esser wat af gesneden ende bedoruen een deel.	Dese bedeuairt wert gedaen sonder arbeit ende vreese.
	Dit is een dinc gesielt of leuende ende wiueliker namen.	Dese bedeuairt en mach niet voldaen werden.
	Dit heeft een ziele, ende bloet off rootheit ende mach een vergaderlic dinc wesen, dair een deel of besmet of bedoruen is.	Sijn meninge wert verandert vander bedeuairt ende wert belet.

[p. 199]

(fol. 81r) xxiij Vanden vechtere.	xxiiij Vanden coop der vruchten.	xxv Vanden geualle des iairs.
Hyne sal vanden jair vechten noch dair wert gaen.	Int beginsel des jairs sal de coop dieren ende vele diere tijts.	Dit wert een zere crachtich jair int gerechte ende de rechters sullen openbair trechte hebben.
Hy sal tuechten ophouden ende dat is hem dbest.	De coop blijft staende dit jair ende in geen dinc dieren.	Dit wert een jair van vele goets ende is bequame ende de staet der menschen wert goet.
Hy ne sal niet vechten mer vanden vechtene wedercomen.	De coop wert dit jair narer den ondierne dan te dierne.	Dit wert een jair van vele vruchten ende goets ende orbairlic.
Hy sal vertrecken ende weder keren vanden vechtene.	De coop blijfft staende dit jair ende dair na sal hi ondieren.	Dit wert een middelbair jair ende de voergangers sullen vele gracien in hebben.
Vecht hij dit jair so is te duchten voir sijn doot.	Een tijt wert de coop opgehouden ende een tijt wert hi ondiere.	Dit wert een goet jair ende bequame.
Hem is best dat hi den vechtene niet en nake want dit is teken der doot.	De coop sal bliuen also als hij was.	In dit jair sullen beroerten geruchten ende vertoegenessen der zwairden werden.
Hy hoede hem te vechtene op dat hij niet verwonnen en werde.	De coop blijft staende ende sal ter orbair wassen.	Dit wert een geluckich jair ende gehelicht jair ende twesen der menschen werter in verbetert.
Eest dat hij wtgaet te vechtene so is te duchten voir sijne doot.	De coop wert dit jair opgehouden ende dair na wert hij een lettel ondieren.	Dit wert een vruchtbarich iair ende zere vele dieren sullen in werden.