De Geomantie in het Middelnederlands

Uitgave van deze voorspeltechniek uit het Münchense handschrift (15de E)

[p. 100]

[De rechter Fortuna major]

(fol. 31v) 7 fortuna maior	j Vander meyninge gemeenlike.	ij Vanden Coninge.
	Dit is een teken den beesten der bomen scade hebbende, der scriften ende brengt wedergebeedt cort dien die van ogen is ende nempt van hem dat hij heefft.	Hy sal mitten coninc bescaet wesen ende beter wert verre van hem te wesen dan bij.
	Dit is een teken des geens die soect van enen dinge dat vter hant sijns heren is ende heefft in een vrage eens wijffs ende in die hant en is niet dies men soect.	Hy sal om tsconincs wille in arbeyde ende in vrese comen ende van hem sceeden ydelre hant.
	Dit is een teken van reysen ende van beroerten des geens dien twiuelt vanden coninge.	Mit aenhangerie den coninc sal hi vercrigen voirspoet ende goet ende wt den beuele des conincs verheuen wesen.
	Dit teken vertoocht hem die reysen wille ende tis hem by.	Hy en sal den coninc niet mogen by wesen ende bliuen mer om lanc sal hy te hem comen.
	Teken des geens die soect scult off enich goet off geuoech mit wiuen ende hij salre vele aff gecrigen.	Hy sal zere nernst wesen in des conincs dienste ende vercrigen vele goets.
	Teken des geens die soect bate van dingen dair hij om gearbeit heefft ende hij esser bij.	Hy sal den coninc by wesen ende van hem goet vercrigen ende voirspoet sonder arbeit ende moeynisse.
	Teken des geuangens wiens verlossen vercregen of eens die in een berouen is off in scaden wie(n)s verlossen men hoept ende onmogelic eest dattet een wyff sy.	Niet van node en sal hij den coninc by wesen, want hij van hem bate ende goet vercrigen sall.
	Teken des geens die mit enen wiue wille wesen dair deen den anderen lieff heuet ende teken der hemel̀cher varewen.	Hy sal sijn begerte van hem vercrigen na arbeyt ende moeynisse.

[p. 101]

(fol. 32r) iij Van dien die recht geert.	iiij Van dien die gelt soect.	v Off hij vercrigen sal daer hy na staet.
Sijn clage wert een tijt wtgesat, ende bi licht der wert een ouerdracht gemaect.	Hy sal vele costs doen ende onmogelic est dat hij gelt vercrige.	Dit wert snel vercregen ende alre meest op datment den wiuen vraeght.
Sijn dinc wert in dese sake middelbair, ende een verbeyden der dedinge.	Sijn vercrigen wert wt beroerten ende wt reysen off wt dingen die den beesten toebehoeren ende hij sal middelbair werden.	Dit sal hi vercrigen by tijde ende mit hem sullen versellen vele lieden.
Hy sal ongeuoecheleke woirden horen int pleit ende wert bescaet ende sal iet van sijnen handen uerliesen.	Sijn geualle van gelt te vercrigene sal middelbair wesen.	Eest dat hi voirgaet in de vrage van desen dingen nemmermeere sal hij hire om arbeyden noch vercrigen.
Sijn plait wert bespot vanden genen die met hem plait ende sijn sake wert middelbair.	Tvercregen gelt sal hi verdoen ouervloydelike, ende niet en sal hem bliuen.	Den heesch van desen dinge wert ontslegen by sinen eegen wille.
Hy sal tuonnesse hebben ende gelt ontfangen.	Sijn vercrigen sal werden in een eenpairlic gelt sonder ophouden, ende wert gemeinicht.	Eest dat hij dit heescht hi vercriget ende ten sal wt sijnre macht niet gaen.
Hy sal sijn clage vercrigen ende sal geuonden dingen hebben dair hij mede verdeelt wert.	Hy sal haest gelt vercrigen ende vergaderen, ende hy ne salt niet verteren.	Sijn dinc wert volbrocht ende vercregen na anxt, off dingen die tontsiene sijn.
Eens deels sal hem recht geschien na dat vele beloeften gedaen sullen sijn in de clage.	Hy ne sal met hem geen gelt moigen hebben.	Dit dinc sal hem volschien na arbeit ende scade, by enen ouden middelbair off by enen ridder.
Sijn recht wert opgehouden een tijt dair na wertet gemaect ende ouer een gedragen.	In sijn ioncheit sal hi gelt vercrigen, ende der na verliesen ende sal al sijn leuen arbeyden.	Op tuercrigen van desen dinge wert gelet, dair na by sijns selffs rade sal hijt laten.

[p. 102]

(fol. 32v)	vj Vanden huweleke.	vij Van der dracht.
	Dit huwelic en is niet goet want deen en mint den anderen niet.	Dit wert een swair dracht ende sij sal baren een dochter, dair men voren duchten sal.
	Dit huewelic off dese brulocht wert voldaen ende der werden brieff af, nochtan duchtmen voir tsceeden eer sij bekent sijn off dair na.	Dese wert ene gehelichde dracht int eynde, ende de vrucht gesont baren.
	Dese sal een bekent wijff hebben die hem lieff hebben sal allene ende hem onderdaen wesen van soeter antwoirde ende niet vele sprekende.	Dit wert ene goede dracht, ende sterc, ende si sal baren enen geluckigen zone.
	Hy sal een lelic wijff hebben sonder duecht.	Te duchten is dat dese niet voldragen en wert, ende est datse voldragen wert soe salse een dochter baren.
	In dit huwelic wert een harde antwoird ende deen sal den anderen niet onderdaen sijn wair om tlaten beste waire.	Dese wert verlost, ende sal baren een gesonde ende gehelichde dochter.
	Dit huwelic wert gemaect al eest dattet verbeyt ende sij moeten tsamen gebrocht werden.	Dese is bijden barene ende sij sal een dochter barenne.
	Dit wert een goet huwelic ende voirspoedich ouer een dragende, ende gelieflijc geselscap ende deen den andren te baten comen.	Teynde van deser dracht wert arbeydelic ende anxtelic ende duchten is voir de dracht int baren.
	Dit wert een goet ende twijff wert een sceldende, van vele worden, ende van vele mannen nochtan sal hair de man te bouen gaen ende een ander wijff hebben.	Dese dracht wert van vele siecheden, ende van vele wints in de buuc, ende sal een dochter baren.

[p. 103]

(fol. 33r) viij Vanden siecken.	ix Vander belegenre scat.	x Off sij kint hebben sal.
Dese sieke sal sonder twiuel steruen, men bereyde hem een doot cleet.	Dese stat sal wedercomen mit sekerhede, ende hair volc sal in vreesen wesen.	Si sal om lanc kindren ontfaen, ende der na salse ontfaen een dochter.
Dese siecte wert so lang datmen ducht voir den doot nochtan sal hij verlost wesen vander siecte.	Dese stat sal wederkeren mit payse ende mit vrede.	Na wanhope salse kindren ontfaen, ende meest dochteren.
Dese siecte wert so lanc dat hem vele lieden bescreven ende beclagen sullen, ende dair na wert hij verlost.	Dese stat wert verlost ende hair heere ende hair viant sal vlien.	Dese sal kindren hebben ende niet steruen voir se een geslechte gehelicht ende voirspoedicht.
Dese sieke wert verlost van sijnne siecte, ende hij sal wt gaen ende dair na weder siec werden.	Tgeual van deser stat wert middelbair, ende sij ne wert van desen jair gewonnen.	Dese sal kindren hebben ende meest dochteren.
Dit wert een lange siecte ende te duchten is voir sijn doot.	Vele van dien die de stede belegen hebben sullen hair manscap doen ende latense.	Dese sal een getal kindren hebben ende die te liue bliuen sullen dat sijn die dochteren.
Te duchten is voir dese siecte, na der weke off na der maent.	Dese stat sal mit haren belagers ouer een dragen ende een goet eynde nemen.	Dese sal kindren hebben een getal ende luttel goet doens dair aff hebben.
Sijn siecte wert seere gemyndert, ende hij wert verlost.	De beligger sal de stat in onwerden hebben ende hi salre zeere om arbeyden.	Dese sal een getal kindren hebben, ende si en salre geen goetdoen aff mogen hebben.
Wert in de vrage geuouch off dochter, so duchtmen voir de doot.	Dese stat sal mit haren vianden gepayst werden.	Sy sullen kindren hebben vele, mer beter wert gode gebeden dat sij geen en hadden.

[p. 104]

(fol. 33v)	xj Vander dieffte.	xij Vander reyse.
	Dese diefte wert hoiren meester weder gegeuen te lichsten datmen mach ende also wert tverlies ende alremeest est een dier.	Dit wert een swair reyse, ende hi ne sal tot sijnre begeerte niet mogen comen.
	Dit wert vercregen, ende het hebben vele liede gestolen, ende het wert hem geopenbairt, dies gelijcs tuerlies vp dattet henxt off merye sij.	Dese reyse wert te lande, ende in sijn geselscip sullen beesten comen.
	Dese dieffte wert vercregen bij des conincs toedoen, ende des gelijcs tuerlies omlanc.	Sijn reyse wert quaet.
	Tvercrigen van deser dieften wert verlanget, ende se sal mogen geuonden werden ende also tuerlies.	Dese sal voirtgaen, ende luttel goet doens in de reyse vercrigen.
	Dit heefft een wijff gestolen, ende si salt der na weder geuen dient toe hoert ende also tuerlies.	Dese reise wert hem swaer ende hij ne sal niet volbrengen dat hij begeert.
	Dit wedergeuen dient toehoert, ende ten mach niet wesen ten moet vercregen sijn.	Sijn reyse wert belet een tijt, ende dair na sal hij anders gaen.
	Dese dieffte en mach niet wedercregen werden, ende heeft een wijf gestolen ende also ne wert tuerlies.	Dese sal sijn reyse doen ende saller aff vercrigen goet ende vele orbaren.
	Dese diefte wert vpgehouden een tijt dair na salse vercocht werden op een wijf.	Dese reyse wert lang belet, ende dair na sal hijse doen.

[p. 105]

(fol. 34r) xiij Van dien die van ogen is.	xiiij Vanden geuangene.	xv Vanden regen.
Dese sal haest wedercomen sonder letten.	Dese wert verlost vander vangenesse mit den andren.	Dit jair wert luttel regens ende die sal de(n) volke hindren.
Sijn wechwesen wert verlanct een tijt ende der na sal hi weder comen mit geselscip van menschen ende van beesten.	Dese geuangen wert verlost ende sijn eynde goet.	Het sullen vele wolken werden ende middelbair regen sonder scade des volx.
Sy sal hem beredene weder te comene, ende dair na comen ter stede dair hy was.	Hy wert verlost ende den coninge gepresenteirt ende hi mach vanden gesinde werden ende goet vercrigen.	Dit iair wert lettel regens dair tvolc genoech by bescaedt wordt.
Dese sal weder te sijnen comen snel, ende hij is te wege.	Dese mach niet lange geuangen bliuen mer hi wert snel verlost.	Lettel regens sal vallen dair tuolc lettel goets aff hebben sall.
Dese sal wedercomen te sijnen ende mit hem brengen goet ende bate.	Dese sal lange inden carker bliuen.	Tes wel mogelic dattet int begynsel of int eynde van den iaire regen mer de regen wert een luttel opgehouden.
Dese sal haest wedercomen ende bringen mit hem een gebonden last off banden.	Men hoept dat dese geuangen cort verlost wert ende men twiuelt dair an.	Tgeual des regens sal dit iair bliuen in sijne gelikenisse.
Dese sal veranderen van lande te lande ende dair na weder comen.	Dese sal langer inden carker bliuen dan hij waende ende dair na wert hi verlost.	Dit jair werden wints ende vele regens, ende tvolc wert bij den winde gescaedt.
Twedercomen van desen wert verlanct, ende van hem sullen gesent werden brieuen off placken.	Dese sal verlost werden na dat hij scade sal gehadt hebben.	De regen wert een luttel dit iair opgehouden dair na sullen winde comen.

[p. 106]

(fol. 34v)	xvj Vanden begrauenen dinge.	xvij Vander comenscap.
	Hier en is niet begrauen.	Dit is van cleenre baten ende tlaten is best.
	Hier en is niet begrauen.	Dese dinc wert zeere arbeydelic ten sal hem baten noch schaden.
	Hier was wat begrauen, ende tes gesocht ende genomen.	Tgeual van desen wert ontslegen ende hij salre niets wasdoms af hebben mogen.
	Hier en is niet begrauen.	Dese comenscip is van cleenre bate ende eest dat hij dair mede reyst hij sal wat wynnen.
	Dese stede is ondersocht ende dair is in begrauen dat licht is te vercrigene ende de stede is west wert.	Dese comenscip is van goeder bate mer tuercopen wert traech ende lanc.
	Hier is eenrehande dinc begrauen dat een deel genomen is ende een deel esser bleuen ten west eynde wairt.	Dese wert orbairlic ende haest vercocht wantet goet loon is.
	Hier en is niet begrauen.	Wairt mogelic dat dese comenscap vercocht werde, so wair best in de apothecarie.
	Hier was wat begrauen mer tes genomen ende niet en esser bleuen.	In dese comenscip wert niet vele baten.

[p. 107]

(fol. 35r) xviij Vanden wtgaenden heere.	xix Vanden toegaenden heere.	xx Vanden tween heeren.
Te duchten is dat dit heere bedoruen mach werden vter verledinge ende drucke.	Men hoept de toecomste van desen heere ende men ducht niet voir enich inder bij hem toecomende.	Dese werden versceeden sonder meer verwins dan sij hebben.
Dit heere wert verwonnen ende sal dogen, ende dair na een goet eynde.	Dit wert een heere van vele volcx nochtan en werter nyemant by bescaedt.	Dese twee en sullen teen tander niet gemoeten, ende een ygelic salt wel vergaen.
Eest dat dit heere wtgaet het wert in goede pays gebrocht mit sijnen viande.	De toeganc van desen heere wert belet ende tvolc werter by bescaedt.	Tusschen dese twee heeren wert nyet voluochten, ende pais is hem naerrer.
Dese wtganc wert ontslegen ende eest dattet wt gaet ten sal geen scade doen.	Dese to(e)ganc wert verlangt ende theer sal anders gane dant wilde.	Teen sal beroert werden iegen tander, mer eerst ouer een dragen ende dan verscheden.
Dit heere wert gehouden soe dattet niet wt trecken en mach.	Dit heere sal af laten toe te gaan, ende dair na sal een deel dair aff toe gaen.	Een ijgelic van desen sal hem bereeden nochtan en sullen sij teen tander niet gemoeten.
Dit sal wt trecken elwair dan et wille heuet.	Dit heere sal toegaen ende lettel scade doen.	Sy sullen onderlinge senden ende sprake houden dair na werden sij gepaist.
Tgeual van desen heere wert onnutte op dattet wtgaet ende beter lest gelet.	Geen orbair en is tangaen van desen here, staen best.	Dit heere wert verwonnen van den andren sonder arbeit ende belet.
Desen heere en sal geen goet geschien in sijn wttrecken dair om wacht hem wel van allen scaleheden.	De toeganc van desen heere wert te broken ende sal verandren sijnen raet.	De sake van desen tween heeren sal int eynde teenen ouereendracht comen.

[p. 108]

(fol. 35v)	xxj Vanden verholen dingen.	xxij Vander bedeuairt.
	Dit is van planten der eerden roke hebbende, wies varewe genegen is ten witten.	Dese sal bestaen de bedeuairt te doen mer si ne wert van desen iair voldaen.
	Dit is van planten ende deelt mitten dieren, ende daer sijn in dingen vergadert ende gehoept.	Dese bedeuairt sal hem berouwen, wt sijns selfse wille.
	Dit is van planten off van clederen ende dair is clairheyt in.	Dese beduairt wert ontslegen ende sine wert van desen iaire gedaen.
	De wortel van desen verholen dinge is van planten ende is hemelscher varewen ende wit cleen of dinc datmen vouden mach.	Dese sal sijn bedeuairt dit iair doen, ende sijn begeerte vercrigen off sijne beloefte voldoen.
	Dit is van mijnen ende meest droechte ende ioncheit ende dair sijn steden in grouere dan ander steden.	Dese bedeuairt en wert van desen iair voldaen.
	Dit is van mijnen dat geleit was in water vaten, ende is een onreyn stede.	Sijn vpsetten vander bedeuairt wert verandert dit jaire by sijnen wille.
	Dit is van mijnen ende dieren ende is dinc in dinc, ende bate esser in, tinderste dinc is picture ende sculpture.	Dese bedeuairt en mach van desen iare voldaen worden.
	Dit is van dieren wiueliker namen hebbende in hem lichticheit ende holhede.	Hy wert vander begeerte der bedeuairt gedaen, ende sal mit enen wiue die hij begeert sijn bederue doen.

[p. 109]

(fol. 36r) xxiij Vanden vechters.	xxiiij Vanden coop der leeftochten.	xxv Vanden geualle des iairs.
Dese hoeptmen en sal niet vechten bin desen iaire.	De coop wert ondiere ende ontslegen mer int einde vanden iare sal hi een lettel dieren.	Dit wert een iaire van vele goets ende de bomen sullen zere vruchtbare wesen.
Hy sal wt trecken te vechtene, ende hi ne sal niemant vinden ende also weder keren.	Dit jair wert de coop ondiere ende ontslegen ende en sal niet mogen diere werden.	Dit wert een goet iaire ende zeker ende die bomen sullen vele vruchten dragen.
Dese en sal vanden iare vechten.	Dese coop wert al te voren mer int middel des jairs ondiere.	In dit iair werden vele vergaderinge des volcs ende men ducht voir enige der coningen.
Hy sal wtgaen om strijt te soeken ende niet en sal hij voluechten.	Int beginsel vanden iare sal een lettel dier tijt werden ende int middel des iairs wert de dier tijt ontslegen.	De geuallen van desen iare werden quaet ende de coninc sal trecken van eenre stede ter andre.
Hyne sal te vechtene niet mogen comen dit iare.	De coop sal dit iaire een lettel dierbair wesen.	Zeer vele goeden dingen sullen geschien dit iare ende vele voirspoets ende tvolc seker.
Eest dat hij sijnen wech te vechtene voldoet, so is te duchten voir hem.	Int beginsel des iairs sal de coop wat diere sijn dair na wert hij ontslegen ende ondier.	Dit wert een seker iair nochtan sal onder tuolc beroerte werden ende wigen.
Eest dat dese kemp sinen wech volbrengt dit iaire te duchten is voir sijn doot.	De coop wert ondier dit jair nochtan sal hij wat dieren int eynde.	Dit wert een iare van vele zeeren, bootsen ende ziecheden.
Eest dat hij wtgaet ende hem de viande te gemoete comen, hij wert geuangen.	Int eerste des iairs wert diere coop ende int eynde wert goet coop.	Tgeual van desen iare wert middelbair ende de wiuen sullen genoech baren.

[p. 110]

(fol. 36v) 8	j Vanden geualle der meninghe.	ij Vanden Coninge.
	Dit is een teken des geens die geert bliscap ende bruylochten ende betekent ene joncfrouwe, ende een maecht ende een beeste mit edelen banden gebonden.	Beter is hem dat hi den comine niet by en sij want hire geen bate af gecrigen en sal.
	Dit is teeken der vruechden ende blijscepen der begeerte van maechden ende der geenre die mit vrouwen wesen willen in donckerheden.	Sijnen heesch ten coninc wert verleyt ende geen bate der aff hebben.
	Dit is een teken der vresen ende des verlies van gelts ende betekent lieden die mit wyuen ommegaen ende quade lieden.	Dese sal anxt lijden vanden coninc ende der na wert hem sijn sake veruult.
	Dit is een teken des geens die soect een genomen dinc vten handen ende wt sijnre macht ende want hijt niet wedercrigen en mach, so is hir omme in wanhope ende droeue.	Dese sal vanden coninc sijn begeerte vercrigen om lanc.
	Dit is een teken der geenre die soeken een sake der sij hem af ontsien ende teken der quader mannen ende stridende.	Hem wair goet dat hij den coninc niet bij waere, want blijfft hij hem by hi mach wel duchten voir druc ende anxt.
	Dit is teken des geens die meent te soeken harde of starke dingen mit loescheyden ende valscheiden.	Dese mach seker voir den coninc myt sijnre sake staen want hij veruult wert om lanc.
	Dit is een teken der wege gangers ende der scrijuers suekende haire auenture wetteleke.	Hy sal sijn sake vercrigen vanden coninc ende dat sal wesen letteren brieuen off den heesch.
	Dit teken betekent enen die soect van dingen die hem verre sijn, ende is een teken der scriften.	Dit lichte sal hij sijne dingen vercrigen vanden coninc by brieuen ende hij sall den coninc ontsien.

[p. 111]

(fol. 37r) iij Vanden rechte.	iiij Vander rijchede.	v Off hi vercrigen sal dat hi begeert.
Dese sal verwonnen werden van sijnen wederman al heeft hij recht.	Dese en sal niet neirnst genoech wesen om gelt te crijgene, hij ne salt oic niet vercrijgen en sij dat hij vroet sij in sijnen dagen.	Dit dinc sal gescien om lanc na vele arbeits ende wanhope.
Dese sal mit sijnen wederman in een starc plait vallen ende hi ne sal te rechte niet mogen comen.	Hy wert van cleenre haue ende sal verliesen dat hij vercregen sal hebben.	Dese en sal te sijnen heesch niet mogen comen.
Dese wert beroert int gerechte ende hem wert gehulpen so dat hij niet vele baten der af hebben en sal.	Hy sal meer vercrigen in steden die in twiuel staen dan hij sal in arbeydeliken dingen.	Dit sal hem gescien so het eerst mach ende wert ouerlidende.
Dair en sal geen eet mogen vallen tusschen hem beyden ende hij salre luttel bate af hebben.	Hy sal gelt vercrigen mer ten sal hem niet bliuen.	Dit dinc wert voldaen als hire om gearbeit sal hebben.
Te duchten is dat desen ongelijc gescien sal dair hi om gemoeit sal wesen ende quaet hebben.	Hy sal by wegen gelt vercrigen in gerechticheit ende niet te bouen gaen.	Hier wert opgelet ende in sijnen heesch sal hij vreese ende druc hebben.
Hem sal plait vallen tegen den aduersaris. dairna wert hem vonnesse opgehouden.	Hy sal gelt vercrigen wt cleene dingen arbeydelic ende anxtelic.	Hy ne sal dit niet mogen vercrigen ende tlaten is beter dant heeschen.
Tvonnes sal meer mit hem gaen dan iegen hem ende sullen wesen brieuen ende scalcheden tusschen hem beyden.	Hy sal gelt vercrigen mit scrijuene ende sijn geualle middelbair.	Dit dinc sal hem geschien ende salre af hebben brieuen diemen hem ionnen en sal.
Dit vonnisse wert licht te keren ende hij sal te sijnen rechte comen.	Hy sal gelt vercrigen mit rusten middelbairlic.	Dit sal hem geschien haestelic, ende lichtelic sonder arbeyt.

[p. 112]

(fol. 37v)	vj Vanden huweleke.	vij Vander dracht.
	Die huelic is bequamelic gehelicht ende abel ende twijff sal maecht wesen.	Eest dat de dracht voldragen wert so salse baren een dochter.
	Dit wert een bequame huelic mer verlanc ende een bekent wijff.	Dese wert arbeydelic ende dair na blide, want sij bij den baren is.
	Dit wijff is maecht ende by hairs selues stouden sal hij dogen anxt scade ende arbeyt.	Dese sal een ophouden des bloets hebben eer se baert, ende te duchten is voir de dracht int baren.
	Dit huelic en wert niet versaemt ten sij mit groten arbeyde ende dair na wert een goet eynde.	Dese dracht wert niet voldragen ende eest datse voldragen wert, so sal sij baren eenen sone.
	Dit wert een huelic gestadich ende gehelicht, ende hij sal mit hair woirden hebben in geselscepe tes hij met hair is.	Dit wert een goede dracht mit vele vreesen ende sij sal baren enen zone gehelicht.
	Dit huelic en mach geens sins volbracht werden ende beter achterlaten.	Wert dese voldragen so salse enen zone baren geluckich ende teynde goet.
	Dit is een goet gehilicht ende bequame huelic ende is teken der hueleken scriften ende bequameleker staet.	Dese dragende vrouwe sal sterck ende gesont wesen ende de dracht wert eene dochter cranck.
	Desen man sal geuallen dat hij een wijff hebben sal ende der na werden sij verscheden.	Es dit deerste dracht, so duchtmen voir ene ontidige geboirte, ende is de dracht volmaect so salse baren een dochter.

[p. 113]

(fol. 38r) viij Vanden ziecken.	ix Vander belegenre stat.	x Off sij kindren hebben sal.
Teuel des siecs menschen is van blode ende hi sal in groter vresen wesen.	Tbeliggen van deser stat wert middelbair int goede ende int quade.	Sij sal ontfaen kindren na tijt, ende na wanhope, ende wert gebootscapt ene dochter.
Men ducht voir dese siecte ende tscreyen ouer hem is bereet.	Dit beliggen wert verlanget ende tuolc der stat salt tekenen, ende dair wert vreese ende slach.	Tontfangen der kindren wert in hair verlangt ende si sal zeere begeren.
Tende van desen sieke wert goet ende hij sal bloet losen welc sijn gesonde wesen sal.	Dese stat wert sterc tegen hare beliggers, ende sij en salse niet duchten.	Den ontfanc der kindren wert opgehouden ter wanhopen toe dair na sal sij kindren ontfaen die goet sullen sijn.
Dese wert vander siect verlost ende ten sal geen bloet van hem gaen, ende tende goet.	Dese stat wert sterc ende behouden ende de viant sal snel van hair trecken.	Sij en sal geen kindren mogen ontfaen, dair om is tafter laten best.
Dese siecte sal hem liggen int hoefft, ende se wert verleet ende tende wert goet.	Tvolc van deser stat sal begeren wt te gaen ende sij werden bedwongen inden moed.	Dese wert van luttel kindren, ende tusschen hem ende den genen die van den kindren de vpperste wesen sal sal twist ende oirloge wesen.
Men hoopt op sijn verlossen eest dat int beginsel der vragen coemt Auenture de meeste.	Teynde van deser belegenre stat wert in payse ende in stercheden.	Dese sal kindren ontfaen ende ten sal niet baten want hij wert biden dochteren bescaedt.
Men ducht voir tverlangen van deser siecte, ende hij sal vele sweeten.	Dese stat sal maken een bestant mit haren viant ende sij sal tenen goeden eynde comen.	Dese sal nernst wesen om kindren ende salre niet toe mogen comen.
(D)esen sieken sal een bloet toecomen wair om datmen ducht voir sijn doot.	Dese stat wert verlost.	Dese is onderdrachtich ende en sal geen kindren hebben.

[p. 114]

(fol. 38v)	xj Vander diefte.	xij Van der reyse.
	Dese diefte wert geuonden om lanc ende heeft een wijf genomen vanden mesnieden vanden huys, ende wert lanc eer tuerlies wedercregen wert.	Sijn wech is goet ende zere verre, ende lichte hi ne sal niet wedercomen.
	Dese diefte mach niet vonden werden noch tuerlies, ende diet nam is een wijf.	Dese sal voirtgaen in enen langen wech ende sal dogen moeynisse, ende belet werden int wedercomen.
	Dese diefte wert weder vonden diense toebehoirt die dat nam die neemt nv een ander ende verlanc wert wedercregen.	Hy sal voertgaen in sijne reyse, ende die uervairt was sal wedercomen behoudende dair na mit goede.
	Dese diefte wert geuonden ende hair here salre een deel wtnemen.	Hy sal snel sijn reyse doen ende dair in bate vercrigen ende gracien.
	Tvinden van deser dieften wert verlangt ende diese nam is bruyn of van hemelscher varewen of heeft int ansicht een smette ende also bij enden wert tuerlies vercregen.	Niet goets is in dese reyse ende tachter laten best.
	Dese diefte mach niet vercregen werden noch tuerlies ende de dieff is een man dair men niet toe seggen en mach.	Dese sal gaen ende sijn wech wert hem verlanget ende dair lange wesen.
	Dese diefte mach wesen van clederen ende van vele dincs ende is vercrigelic mit arbeyde ende also tuerlies.	Hy sal gaen ende vercrigen goet ende onuerre is sijn wech.
	Dese diefte en mach niet verholen bliuen noch diese nam ende se wert haest vonden ende also tverlies.	Sijn voirtsetten wert verandert vander reyse ende sal sijns willen wederkeren.

[p. 115]

(fol. 39r) xiij Van dien de van ogen is.	xiiij Van den geuangene.	xv Van den regen.
Dit betekent sijne staet in sijne stede mit lettel begerten van wedercomene mer om lanc sal hij wedercomen.	Nv voirt an hooptmen sijn verlossen na lanc verbeyden.	Dit iair wert lettel regens ende orbairlic ende zere grote hette des zomers.
Dit wech wesen wert verlanct in verder stede dan hij was.	Te duchten is voir desen want hem sal groten anxt toecomen.	Hier mach niet af comen dan een lettel regens.
Dese is biden wedercomene ende bi lichte hij sal den coninc dienen, want in hem is ouervloeyende cracht.	Men ducht voir tuermoeyen des geuangens ende men hopet sijn verlossen dair nae.	Vele wolken ende lettel regens dair tvolc lange by gequetst sal wesen.
Sijn wedercomen wert verlanct vanden heere ende dair na sal hij wedercomen.	Dese wert cort verlost beede vander vangenisse ende vander boete.	Dit iair salt alte zere vele regens vallen ende wints.
Dese coemt ende tsal tusschen hem ende dien dair hij toe coempt werden geschill.	Te duchten is dat hij gheslegen wert mit massen ende dair na verlost.	Dit iair wert zere lettel regens ende sal den volke deeren.
Sijn coemste wert belet lange tijt dair na sal hij comen.	Hy wert verlost ende sal der moeynisse ontgaen.	Het sal zere vele wayen ende dair wt sal regen comen.
Dese is op sijn wedercomen als off hij inden wech waere ende men brenger brieuen aff.	Dese wert verlost ende een goet eynde sal hij doen.	Dit iair wert vele regens dair tuolc bate aff hebben sal ende orbare.
Men berede desen tauentmael want sonder twiuel hi sal snel wedercomen.	Dese sal lange geuangen bliuen, ende dair na verlost werden.	Zeere vele regens wert dit iair sonder aff laten.

[p. 116]

(fol. 39v)	xvj Vanden begrauen dinge.	xvij Vander comenscap.
	Hier en is niet begrauen.	Hier en is geen wasdom in.
	Dit begrauen dinc is onseker.	Hier en mach gene wasdom aff comen en sij dat specerye sij.
	Hier en is niet begrauen.	In dese comanscip sal hem allene tgoet vertogen ende ten sal niet vercregen werden sonder nernstichede.
	Hier heeft in gesocht geweest ende tesser wt genomen.	Dit wert een scadelic ende droeue comanscip nochtan salse sonder gelt niet wesen.
	Hier en is niet begrauen.	In dese comanscip sal allene tgelt gelieuen ende hart wertet te vercrigene.
	Hier en is niet begrauen.	In dese comanscip salmen niet mogen wynnen.
	Hier en is niet begrauen.	Dese comanscip wert vol wasdoms nochtan wert tuercopen traech.
	In dese stede is gesocht ende dair sijn onreyn steden in swart ende waterich.	De stat van deser comenscip wert rastelic groter baten ende haest vercocht.

[p. 117]

(fol. 40r) xviij Vanden wtgaenden heere.	xix Vanden toegaenden heere.	xx Vanden tween heeren.
Beter is desen heere staen dan wtgegaen want het sal bedruct wesen.	Dit en sal sijne toeganc niet volcomen ende beter is staen dan toegaen.	Eest dat si versaemt werden, so sullen sij gelijc wesen int verwint int goede ende int quade.
Tes de duchten trectet wt dat het verwonnen wert ende staen is beter dan wtgaen.	Sijn toegaen wert belet ende est dat toegaet so es te duchten dattet bescaet wert.	Eest dat sij vergadert werden so sal de slach of tsweert vallen op de mogenste.
Tmeeste deel van desen heere wert verraden ende dair wert in bloet gestort vele.	De verradenisse sal hier te bouen gaen ende alremeest est dat toegaet.	Dese en sullen niet versaemt werden ende dat wert belet by andre dingen.
Dit heere heeft een gewillich herte ende sijn geual wert goet, het sal verwinnen ende te bouen gaen.	Dit here en sal niet toegaen ende dat is den volke beter.	Sy en sullen niet mogen vergaderen ende sij sullen behouden verscheeden werden.
Hier sal een verlangen ende verbeyden in sijn ende het sal vreze hebben ende belet.	Dit heere sal toegaen ende sal een deel van sijnre begerten vercrigen ende sijn geual middelbair.	Toosterste sal tander verwynnen mit looshede ende verradenisse.
Dit heere sal wtgaen tot eene stede verder dairt begeerde.	Dit heere wert belet ende ten sal niet gaen ter begeerder stede.	Onderlinge sal twist geuallen ende sij werden belet teen vanden andre.
Staen van desen heere is beter dan den wtganc want est dat wtgaet het verlieset.	Dit sal angaen ende onder hem, ende den genen dairt toegaet wert bestant ende pais.	Tusschen dese twe sal werden een bescreuen bestant.
Dese wtganc en sal niet volcomen mogen ende theere sal weder keren sijns willen.	Die hem sal toegaen sonder cracht ende sonder deren.	Teen salt ander ontsien ende behouden off vercrigen sijne begeerte vanden andren.

[p. 118]

(fol. 40v)	xxj Vanden verholen dinge.	xxij Vander bedeuairt.
	Dit is van planten die roke hebben ende van groenre varewen.	Hy sal gaen nochtan en sal hij niet comen ter stede der bedeuairt bin die iair.
	Dit is verholen dinc dat demoet mint off dat die mensche lieff heeft wareliker namen ende is van goeder roke.	Hy sal de bedeuairt doen ende ter stede comen ende vercrigen vander bedeuairt dat hij begeerde.
	Dit is een dinc dat int vier gaet lanc ende is deelachtich mit myne ende heuet rode varewe.	Dese bedeuairt en wert van desen iair voldaen.
	Dit is van planten den dieren onderworpen ende is in sijn stede, der na wertet verandert van eenre stede ter andre.	Dese sal voirtgaen sonder twiuel nochtan sal hij ter stede der bedeuairt niet geraken dit iair.
	In dit verholen sal wesen smette of gaten bruynheit off gelucheit.	De bedeuairt wert van desen iare gedaen ende hi is onmogelijc dair toe.
	Dit is van harden planten ende van dingen die eens geuals sijn ende sijn bekert ten dieren.	Hy sal gaen ende de bedeuairt doen na moeyenisse ende arbeit.
	Dit is van onwindelike dingen off onvoudeliken dingen of van witten planten.	Dese bedeuairt en wert niet voldaen mer hij salre weder af keren sijns willen.
	Dit heuet wacheit ende swartheit of picture licht in tasten ende wacheit esser in.	Hy wert verandert vander bedeuairt ende dat is hem van vele baten.

[p. 119]

(fol. 41r) xxiij Vanden vechtere.	xxiiij Vanden coop der leeftochten.	xxv Vanden geualle des iairs.
Het wair onmogelic dat hij vochte in sijnen wech ende hij sal weder keren sijns willen.	De coop blijft staende dair na sal hij beteren ende mynderen.	Dit wert een goet iaire ende in hem sullen vloyen vruechden ende blijscappen.
Niet vechten dit iair wair best want vecht hij te duchten is voir sijn doot.	De coop wert gemeerst ende tvolc dair by bescaedt ende der na salt ondieren.	Dit wert een iair van goede geuallen nochtan saller in vallen twist manslachten ende grote geruchten.
Hy sal wt gaen ten vechtene nochtan duchtmen voir hem ende voir vele bloetstortinge.	De coop blijft staende ende int lest des iairs soe wertet een dier tijt.	Dit jair sal werden int eynde louelic mit siecte der wiuen.
Dese sal wtgaen ten vechtene ende hij wert int einde behouden.	Dit jair sal de coop bliuen staende ende wert dair na ontslegen ende ondiere.	Dit wert een salich ende louelic jair ende coningen werden in beroert.
Dese en sal van desen iaire niet vechten.	De coop sal dit jair bliuen in sijne staet, ende dair na wert hij ontslegen ende ondiere.	Dit wert een jair van vele goets ende tuolc veruairt.
Hy sal voirtgaen ende tes mogelic dat hij vechte dit iair.	De coop sal wassen, ende lettel sonder hinder.	Dit wert een jare van goeden geualle ende licht, ende die lieden sullen sterc wesen.
Eest dat hij vechten moet so sal hij verwinnen ende sijn einde wert goet ende gehelicht.	De coop sal dit jair zere ondiere wesen.	Dit wert een goet voldrachtich iair, ende de melancerale vuchticheden werden gemenicht.
Hy sal verandert werden vander meninge des vechtens dit iair ende hijne sal niet vechten.	De coop wert dit jair zere ondiere ende en mach niet dierer werden.	Dit wert een gehelicht jair van vele waters, ende tuolck werter zeere mede gemoeyt.