Dit boecxken leert hoemen mach voghelen vanghen

¶ Hier na volghet in wat tijden vanden Iare een yeghelijc visch tot sinen besten is

[fol. 3Bv]

¶ Item den salm is inden April ende Mey. ende een wile daer na tsinen besten ende blijft salm tot nae sint Iacobs dach. Daer na hietmen hem laß tot op sinte Andries dach ende is ten besten tusschen sints machiels ende sinte martens misse.

¶ Item den snoec is inden Hoymaent alder best mer een out snoec is altijt goet. mer behaluen wanneer hij den roghen sciet.

¶ Item een melchlinck van eenen snoec oft kerper is altijt beter dan een roechgheuer aldus ist met ander visch.

¶ Item een slie oft louwe is altijt best in die bramaent

¶ Item den baers is altijt goet behaluen inden Mey ende inden April.

¶ Item den brasem ende maeckereel. sijn goet inden sprokel ende Merte.

¶ Item mullinck sijn goet inden merte ende inden april

¶ Item een kullinc is alder best tonser vrouwen licht misse ende voert goet totten April.

¶ Item die rottel is goet inden sporkel ende Maerte ende neemt af inden Mey.

¶ Item die voren oec somer inden winter sijn si goet.

[fol. B4r]

¶ Item die grundelen sijn goet inden sporkel ende Merte ende inden April tot meye toe. maer dat ionghe grondelinc is altijt goet in die peterceli.

¶ Item een blieck is alder best inden Herst

¶ Item die stekelinghe sijn goet inden Merte ende inden beghinne vanden Meye soe sijn si vol so sal mense met eyeren rueren.

¶ Item den ael is goet inden Meye tot nae onser vrouwen hemeluaert dach.

¶ Item een lamprey is nemmermeer beter dan inden mey.

¶ Item een berlijn is des lampreyen broeder is goet van dertienmisse tot onser vrouwen boetscap dach.

¶ Item den Kreeft is best in die Merte ende April. ende sonderlinge als die mane wast dan sijn si alder best.

¶ Hier eyndet een boecxken dat seer profitelijck is voer allen visschers. ende vogheleers. Ende is gheprent Tantwerpen binnen die camer poerte int huys van Delft bi mi Henrick eckert van homborch. Int iaer ons heren .M.CCCCC. ende neghen.