Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij Capittel.

1. Hy bewijst het ampt der Dienaren, 11. ende harer huysghesinnen, 15. de weerdicheyt der Ghemeynte, 16. ende het principael stuck der Hemelscher leere.

A.1

DIt is een waer woordt: So yemant eens ^a Bisschops ampt begheert, die begeert een schoon werck.

a Dat is, Dienaers des woorts

2

^b So moet dan een Bisschop onstraffelic zijn, eender vrouwen man, wacker, nuchteren, ghemaniert, herberghich, gheschickt om te leeren.

b Titi 1.a.6 2.Timoth. 2.c.24

3

Gheen wijnsuyper, gheen vechter, geen vuyl ghewinsoecker: maer redelick, niet kijfachtich, niet gheltghierich:

4

Die zijn huys wel regeert, die ghehoorsame kinderen heeft, met aller eerlickheyt.

5

Want ist dat yemandt zijn eygen huys niet en weet te regeeren, hoe sal hy de Ghemeynte Gods besorghen?

6

Gheen nieuwelinck, op dat hy niet opgeblasen en worde, ende in het ^c oordeel des ^d Duyuels en valle.

c Of, beschuldinge, verdoemenisse

d Of, Lasteraers

7

^e Ende hy moet oock een goet ghetuygenisse hebben van de ghene die buyten zijn, op dat hy niet en valle in de ^f versmadinghe ende in den strick des Duyuels.

e Deut. 1.b.13 Actuum 1.c.21 ende 6.a.3 ende 16.a.2

f Of, verwijtinghe

8

^g De Diakenen [moeten] desghelijcks ^h ghestadich [zijn,] niet tweetongich, gheen wijnsuypers, geen vuyl ghewinsoeckers:

g Actuum 6.a.3

h Of, eerlick

9

ⁱ Die de verborgentheyt des gheloofs houden in reyner consciencie.

i 1.Timoth. 1.b.19

B.10

Ende dese sullen eerst beproeft worden, ende daer na dienen, so sy onstraffelick zijn.

11

De vrouwen desghelijcks ghestadich, gheen lasterschen, wacker, allesins ghetrouwe.

12

De Diakenen sullen eender vrouwen man zijn, die hare kinderen ende hare eygen huys wel regeeren.

13

^k Want die wel dienen, verkrijgen henseluen eenen goeden opganck, ende veel vrijmoedicheyt in den ghelooue in Christo Iesu.

k Matth. 25.c.21

14

Dit schrijue ick tot dy, hopende seer haestelick tot dy te komen:

15

Ist dat ick vertoeue, op dat du wetest hoemen behoort te verkeeren in het huys des Heeren, welcke is de Ghemeynte des leuenden Gods, ^l de pilaer ende vasticheyt der waerheyt.

l Matthei 16.b.18

16

Ende sonder twijffel, de verborghentheyt der Godsalicheyt is groot, ^m God is geopenbaert in den vleessche, gerechtueerdicht in den Gheeste, ghesien van de Enghelen, ⁿ ghepredickt onder de Heydenen, ghelooft inde werelt, opghenomen in eerlickheyt.

m Ioannis 1.b.14 Baruc 3.d.38

n Ephes. 3.a.5.6