Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Benoemet de sonde ende lasteringe des volcx, omme welcker wille des Heeren ernstighe straffe ouer haer gaen soude: 12. met eener toesegghinghe van den Rijcke Christi.

A.1

VVee den ghenen, die daer ^a† poogen schade te doen, ende gaen met boosen stucken om op haren leger, dat sy het vroech, wanneert licht wort, volbrenghen, dewijle sy de macht hebben.

a† An. trachten

2

^b Sy rucken ackeren tot hen, ende nemen huysen, welcke sy slechs willen: als drijuen sy ghewelt, met eens yegelicken huyse, ende met eens yeghelicken erue.

b 1.Reg. 21.a.2. Amos. 5.b.12.

3

Daeromme spreeckt de Heere also: ^c Siet, ick dencke wat quaets, ouer dit gheslachte, daer ghy uwen hals niet wttrecken, ende so stout niet henen gaen en sullet, want het sal eenen boosen tijdt zijn.

c Amos. 5.b.11.

4

Terseluer tijdt, salmen eene spreucke van v maken, ende klaghen, Het is wt, salmen segghen: wy zijn verstooret: mijns volcx lant krijcht eenen vreemden Heere: wanneer sal hy ons de ackeren toe deylen, die hy ons ghenomen heeft?

5

Ia wel, ghy sullet gheen deel behouden, in der Ghemeynten des Heeren.

6

Sy seggen: Men soude niet ^d druppen: want sodanich druppen en gaet ons niet aen: ^e wy sullen so niet te schanden worden.

d Dat is, predicken:

e Mich. 3.b.11.

7

Het huys Iacobs troostet hem also: Meynstu, des Heeren Gheest zy verkortet? soude hy sulcx doen willen? het is waer, myne redenen zijn vriendtlick den vromen.

8

Doch mijn volck heeft hem opghemaeckt als een vyandt, want sy roouen, beyde rocken ende mantelen, die, die daer seker henen gaen, gelijck als die, die wt den krijghe komen.

9

Ghy drijuet de vrouwen mijns volcx, wt haren lieuen huysen, ende nemet ^f stadelicken van haren ionghen kinderen, mijn ^g verciersel.

f Of, alleweghe

g Oft, gesmucke. Wat ick hen gegeuen hebbe, dat nemet ghy van hen.

B.10

Daerom maeckt v op, ghy moetet daer van, ghy en sullet hier niet blijuen: om harer ^h onreynicheydt wille, moeten sy onsaechte verstooret worden.

h Of Afgoderije

11

ⁱ Wanneer ick een dwalende gheest ware, ende een Leughenpredicker, ende predickede, hoe sy suypen ende swelgen souden: dat ware een Predicker voor dit volck.

i Iesai. 5.b.11. ende 16.b.12.

12

Ick wil dannoch dy Iacob, gantsch versamelen, ende de ouerghebleuene in Israel, te hoope brenghen: ^k ick wilse als een kudde te samen in eenen ^l vasten stal brenghen, ende als een kudde in syne koyen, dat het van menschen deunen sal.

k Ioan. 10.b.16.

l Hier spreect hy van den Rijcke Christi, die is onse Heldt, die voor ons henen door gebroken heeft, ende de bane gemaeckt door den doot, sonde, duyuel ende alle quaet: dien snellet flucks na etc.

13

Een Doorbreker sal voor hen daer op varen, sy sullen doorbreken, ende ter poorten wt ende in trecken: ende haer Koninck sal voor hen henen gaen, ende de Heere voor aen.