Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxxiij. Psalm.

1. Prijs der eendracht inder Kercken, ende in het rijcke. Uerciertse dannoch met suyuerlicke verghelijckingen, met balsem, welcx reuck hem wijdt wtbreydet, ende met Hemelschen dauwe, daer landen ende weyden, door sonnenbrandt verdorret, mede verquickt worden.

A.1

Een liedt Dauids inden hooghen Choor. SIet ^a hoe fijn ende lieffelick isset, dat broeders eendrachtich by malcanderen woonen.

a Dat is, wanneer de rijcke groote heylige ende wijse, hen der armen kleynen sondaers doruen aennemen. Roma. 14.a.1. Syrach. 25.a.2. Ephes. 4.a.2. Philip. 2.a.2.

2

Als den kostelicken ^b balsem is, die vanden hoofde Aarons af vliett in synen gantschen baert, die af vliett in zijn kleedt.

b Exod. 30.c.22. Leuitic. 8.b.12.

3

^c Als den dauwe die van Hermon af valt, op de bergen Zions: want aldaer gheloeft de Heere den seghen ende het leuen, altoos ende eewichlick.

c Prouerb. 19.b.12.